بۇل تۋرالى مەملەكەت باسشىسى جەتىسۋ وبلىسىنىڭ جۇرتشىلىعىمەن كەزدەسۋ بارىسىندا ايتتى, دەپ حابارلايدى Egemen.kz.
«جەتىسۋ ولكەسىنىڭ اۋىل شارۋاشىلىعىنداعى الەۋەتى وتە زور. تابيعاتى – جايلى, جەرى – قۇنارلى. مۇندا جەر دە, سۋ دا جەتەدى. تەك ونى ءتيىمدى پايدالانۋ كەرەك», دەدى ق.توقاەۆ.
سونداي-اق پرەزيدەنت تاپسىرماسى بويىنشا ۇكىمەت بيىل 5 ميلليون گەكتارعا جۋىق بوس جاتقان جەردى مەملەكەت مەنشىگىنە قايتاردى.
ء«بىز وسىلاي اۋىلداردىڭ ماڭىنداعى جەر تاپشىلىعى ماسەلەسىن شەشەمىز. قايتارىلعان جەر جەرگىلىكتى شارۋالاردىڭ اراسىندا ءادىل ءبولىنىپ, بەرىلۋگە ءتيىس. بۇل ادىلەتتى قوعام قۇرۋ جولىنداعى ماڭىزدى قادام بولادى. بۇگىندە جەتىسۋ وبلىسى بويىنشا 100 مىڭ گەكتاردان استام يگەرىلمەي جاتقان جەر انىقتالدى. سونىڭ جارتىسى مەملەكەت مەنشىگىنە قايتارىلدى. جەر – حالىقتىڭ بايلىعى. ول بارلىق ازاماتتىڭ يگىلىگىنە جاراۋى كەرەك. اكىمدەر بۇل ماسەلەنى قاتاڭ باقىلاۋدا ۇستاۋى قاجەت», دەدى مەملەكەت باسشىسى.