1995 جىلدان باستاپ قازاقستاندىق قۇتقارۋشىلار تج جويۋعا بايلانىستى 1 ملن 545 مىڭنان استام شاقىرتۋعا شىققان. بۇل تۋرالى توتەنشە جاعدايلار جونىندەگى ءبىرىنشى ۆيتسە-مينيستر يبراگيم كۇلشىمباەۆ مالىمدەدى, دەپ حابارلايدى Egemen.kz.
«جۇمىس جىلدارى, ياعني 1995 جىلدان 2022 جىلدىڭ قىركۇيەگىنە دەيىن تج قىزمەتتەرى توتەنشە جاعدايلار مەن ورتتەردى جويۋعا 1 ملن 545 مىڭنان استام ساپار جاسادى. ولاردىڭ قىزمەتى, كاسىبيلىگى مەن جەدەلدىگىنىڭ ارقاسىندا 401 مىڭنان استام ادام قۇتقارىلدى, تج ءتۇرلى ايماقتارىنان 366 مىڭنان استام ادام ەۆاكۋاتسيالاندى, 66 مىڭنان استام زارداپ شەككەندەرگە مەديتسينالىق كومەك كورسەتىلدى», دەدى يبراگيم كۇلشىمباەۆ ورتالىق كوممۋنيكاتسيالار قىزمەتىندە وتكەن بريفينگ بارىسىندا.
سونداي-اق ۆيتسە-مينيستر بيىلعى جىلدىڭ باسىنان باستاپ توتەنشە جاعدايلاردى جويۋ ءۇشىن ءورت ءسوندىرۋ قىزمەتى, جەدەل-قۇتقارۋ جانە تجم-ءنىڭ باسقا دا بولىمشەلەرى 61 مىڭنان استام شىعۋدى جۇزەگە اسىرعانىن, 9 مىڭنان استام ادامدى قۇتقارعانىن, 10 مىڭعا جۋىق ادامدى ەۆاكۋاتسيالاعانىن, 3 مىڭنان استام ازاماتقا العاشقى مەديتسينالىق كومەك كورسەتىلگەنىن قوسا ايتتى.
سپيكەردىڭ ايتۋىنشا, وسى جىلى 9 مىڭنان استام تابيعي جانە تەحنوگەندىك سيپاتتاعى توتەنشە جاعدايلار مەن وقيعالار تىركەلگەن. «112» شۇعىل قىزمەتتەرىنىڭ تەلەفوندارىنا 4 901 489 رەت, «101» پۋلتىنە 1 143 323 رەت قوڭىراۋ شالىنعان. 2021 جىلدىڭ ۇقساس كەزەڭىمەن سالىستىرعاندا توتەنشە جاعدايلاردان زارداپ شەككەندەر سانى 0,1%-عا وسكەنى بايقالدى, بۇل رەتتە قازا تاپقاندار سانى 26,4%-عا تومەندەسە, ماتەريالدىق شىعىن مولشەرى 40,3%-عا ازايدى.
ەسكە سالا كەتسەك, بۇگىن قازاقستاندا قۇتقارۋشىلار كۇنى اتاپ وتىلەدى.