تۋنيستە وتكەن 5 IOFS باس اسسامبلەياسىنىڭ مينيسترلىك سەسسياسىنىڭ جۇمىسىنا IOFS-كە مۇشە 37 مەملەكەتتىڭ 33-ءى جانە ءياۇ-نىڭ 41 رەسمي وكىلى قاتىستى. بۇل تۋرالى ازىق-ت ۇلىك قاۋىپسىزدىگى جونىندەگى يسلام ۇيىمىنىڭ (IOS) ءباسپاسوز قىزمەتى حابارلادى.
وتىرىستى قازاقستان رەسپۋبليكاسىنىڭ اۋىل شارۋاشىلىعى ءمينيسترى ەربول قاراشوكەەۆ اشتى. وسىدان كەيىن ول تۋنيس رەسپۋبليكاسىنىڭ اۋىل شارۋاشىلىعى, سۋ رەسۋرستارى جانە بالىق شارۋاشىلىعى ءمينيسترى ماحمۋد ەليەس حامزەگە توراعالىقتى تاپسىردى.
ءارى قاراي IOFS ە.پ. باس ديرەكتورى ەرلان بايداۋلەت قازاقستان توراعالىعىنىڭ قورىتىندىسى, سونداي-اق IOFS-ءتىڭ 16 ستراتەگيالىق باعدارلاماسىن ىسكە اسىرۋ بويىنشا جەتىستىكتەرگە ارنالعان پرەزەنتاتسيامەن تانىستىردى. سونىمەن قاتار 5-ءشى IOFS باس اسسامبلەياسىنىڭ مينيسترلىك سەسسياسى بارىسىندا ءارتۇرلى سەرىكتەستەرمەن, سونىڭ ىشىندە اراب قۇرعاق ايماقتار مەن قۇرعاق جەرلەردى زەرتتەۋ ورتالىعىمەن (ACSAD), ءتۋنيستىڭ ۇلتتىق اۋىلشارۋاشىلىق زەرتتەۋلەر ينستيتۋتىمەن (INRAT), گۆينەيانىڭ ساۋدا-ونەركاسىپ پالاتاسىمەن جانە تۋنيس ونەركاسىپ, ساۋدا جانە قولونەر وداعىمەن (UTICA) ورتاق مۇددە بار سالالاردى زەردەلەۋ جانە ىنتىماقتاستىقتى نىعايتۋ بويىنشا ءوزارا تۇسىنىستىك تۋرالى بىرقاتار ەكىجاقتى مەموراندۋمدارعا قول قويىلدى.
وتىرىس قورىتىندىسى بويىنشا 5 باس اسسامبلەيانىڭ قارارى قابىلداندى, وعان مىناداي شەشىمدەر كىردى: ءياۇ-نىڭ ازىق-ت ۇلىك قاۋىپسىزدىگى كۇنىن 11 جەلتوقساندا اتاپ ءوتۋ, IOFS وڭىرلىك كەڭسەلەرىن اشۋ, ازاماتتىق قوعاممەن تىعىز ىنتىماقتاستىقتى كەڭەيتۋ, تاماق ونەركاسىبى حالىقارالىق يسلام قاۋىمداستىعىن (IFPA) قايتا قۇرۋ جانە دامىتۋ, وسىمدىكتەر مەن جانۋارلاردىڭ گەنەتيكالىق رەسۋرستارىن ساقتاۋ جانە پايدالانۋ جونىندەگى ىنتىماقتاستىقتى كۇشەيتۋ. ولار – «الماتى فورۋمى» دەكلاراتسياسىنىڭ قۇرامداس بولىگى.
سونىمەن قاتار شارا اياسىندا IOFS باس ديرەكتورى تۋنيس قالاسىنداعى Kram كورمە ورتالىعىندا وتكەن 14 حالىقارالىق اۋىل شارۋاشىلىعى ينۆەستيتسيالارى مەن تەحنولوگيالارى كورمەسىنە (SIAT) قاتىستى.