قىزىلوردادا «Road show Enactus Kazakhstan» رەسپۋبليكالىق فورۋمى ءوتتى. حالىقارالىق Enactus ۇيىمى باستاماشى بولعان جيىنعا قورقىت اتا اتىنداعى قىزىلوردا ۋنيۆەرسيتەتىنىڭ ستۋدەنتتەرى, مەكتەپ وقۋشىلارى, جاس كاسىپكەرلەر قاتىسىپ, يننوۆاتسيالىق جوبالارىن تانىستىردى.
فورۋم اياسىندا قورقىت اتا اتىنداعى قىزىلوردا ۋنيۆەرسيتەتى رەكتورىنىڭ مىندەتىن اتقارۋشى نۇرلان ورازباەۆ پەن Enactus Kazakhstan قورىنىڭ پرەزيدەنتى البينا ەرجانوۆا ىنتىماقتاستىق جونىندەگى مەموراندۋمعا قول قويدى. كەلىسىمگە سايكەس الدا كەيىنگى تولقىن وكىلدەرىنىڭ كاسىپكەرلىك الەۋەتىن دامىتاتىن جوبالار جۇزەگە اسادى.
رەسپۋبليكالىق فورۋمدا قورقىت اتا اتىنداعى قىزىلوردا ۋنيۆەرسيتەتىنىڭ عىلىمي جۇمىستار جانە حالىقارالىق بايلانىستار جونىندەگى پرورەكتورى ماينۇر بورىباەۆا وقۋ ورنىندا بيزنەس باستاعىسى كەلەتىن جاستارعا بارىنشا مۇمكىندىك قاراستىرىلعانىن اتاپ ءوتتى.
– ۋنيۆەرسيتەتتە ستۋدەنتتەر اراسىندا كاسىپكەرلىكتى دامىتۋ, ولاردىڭ تىڭ يدەيالارىن قولداۋ ماقساتىندا كاسىپكەرلىك ورتالىعى جۇمىس ىستەيدى. وسى كەزگە دەيىن «Startup Bolashak. Menin armanym» جوباسى, «Zhas project» باعدارلاماسى, «HackDay» جانە «Smart city Kyzylorda» حاكاتوندارى جانە بيزنەستە جاستارعا باعدار بەرەتىن باسقا دا ءىس-شارالار ۇيىمداستىرىلدى. ورتالىق بەس جىل ىشىندە 7 مىڭنان اسا جاسقا باعىت بەردى, – دەدى ماينۇر ابىلتايقىزى.
فورۋمدا Enactus Kazakhstan قورىنىڭ پرەزيدەنتى البينا ەرجانوۆا, جوبا ديرەكتورى مارجان جانعالي پرەزەنتاتسيامەن تانىستىرىپ, الداعى جوسپارلار, وقۋشىلار مەن ستۋدەنتتەرگە ارنالعان مۇمكىندىكتەر جايلى تاراتا ايتتى.
قورقىت اتا اتىنداعى قىزىلوردا ۋنيۆەرسيتەتىندەگى كاسىپكەرلىك ورتالىعىنىڭ جەتەكشىسى جانارىس تۇبەكباەۆ بيزنەس يدەيانى جۇزەگە اسىرۋ, ينۆەستور تارتۋ جولدارىن ءتۇسىندىردى.
قىزىلوردا