قازاقستان مەن تۇرىكمەنستان پرەزيدەنتتەرى باق وكىلدەرى ءۇشىن بريفينگ وتكىزدى, دەپ حابارلايدى Egemen.kz.
مەملەكەت باسشىسى, ەڭ الدىمەن, تۇرىكمەنستان پرەزيدەنتى رەتىندە قازاقستانعا العاش رەت مەملەكەتتىك ساپارمەن كەلگەنى ءۇشىن سەردار بەردىمۇحامەدوۆكە شىنايى ريزاشىلىعىن ءبىلدىردى. سونداي-اق تۇرىكمەنستان ءبىز ءۇشىن سالت-ءداستۇرى, مادەنيەتى, ءتىلى مەن ءدىنى ۇقساس باۋىرلاس ۇلت ءارى سەنىمدى سەرىكتەس ەكەنىن اتاپ ءوتتى.
– ءبىز – ءتۇبى ءبىر تۇركى حالىقتارىمىز. ءاردايىم ءبىر-بىرىمىزگە قولداۋ كورسەتىپ كەلەمىز. وسىنداي قۇندىلىقتار – ەڭ باستى بايلىعىمىز. سوندىقتان باۋىرلاستىق قارىم-قاتىناستى نىعايتۋ – ورتاق پارىزىمىز, – دەدى مەملەكەت باسشىسى.
پرەزيدەنت بۇگىن سەردار بەردىمۇحامەدوۆپەن ەكى ەلدىڭ مۇددەسىنە ساي كەلەتىن اسا ماڭىزدى ۋاعدالاستىقتارعا قول جەتكىزىلگەنىن, حالىقارالىق جانە وڭىرلىك وزەكتى ماسەلەلەر بويىنشا پىكىر الماسقانىن مالىمدەدى. سونداي-اق كەزدەسۋ ناتيجەسىندە بىرلەسكەن مالىمدەمە قابىلدانىپ, بىرقاتار قۇجاتتارعا قول قويىلدى.
– مەن بۇگىنگى كەلىسسوزدەردىڭ ناتيجەسىن جوعارى باعالايمىن. بۇگىن ءبىز قازاق-تۇرىكمەن قارىم-قاتىناسىنىڭ ستراتەگيالىق ماڭىزىن تاعى دا ناقتىلادىق. ەكى تاراپ تا باۋىرلاس حالىقتاردى ودان ءارى جاقىنداتۋعا تالپىنىستارىن ءبىلدىردى. ءبىز دوستىق نيەتتەگى ءارى ءوزارا ءتيىمدى جان-جاقتى ىنتىماقتاستىعىمىزدى ودان ءارى كۇشەيتۋدىڭ باسىمدىقتارىن انىقتادىق. ساۋدا-ەكونوميكالىق سەرىكتەستىككە ايرىقشا نازار اۋدارىلدى. بىرلەسكەن شارالاردىڭ ارقاسىندا بىلتىر ەكىجاقتى تاۋار اينالىمى ەكى ەسە ءوسىپ, 250 ميلليون دوللاردان استى. بۇل باعىتتاعى وڭ ديناميكا بيىل دا ساقتالدى. جەتى ايدا ءوزارا ساۋدا-ساتتىق كولەمى 2 ەسە ءوستى. ەكى ەلدىڭ ۇكىمەتتەرى مەن ىسكەرلىك توپتارى اراسىندا بايلانىس جاندانا ءتۇستى. ەكونوميكانىڭ ءارتۇرلى سالاسىنداعى بىرقاتار جوبالار جۇزەگە اسىرىلىپ جاتىر, – دەدى مەملەكەت باسشىسى.
قاسىم-جومارت توقاەۆتىڭ ايتۋىنشا, ەكى مەملەكەتتىڭ ساۋدا-ەكونوميكالىق ىنتىماقتاستىعىن كەڭەيتە تۇسۋگە مۇمكىندىك مول. ماسەلەن, قازاقستان تۇرىكمەنستانعا شىعاراتىن ەكسپورتىن 80 تاۋار تۇرىنە دەيىن ۇلعايتا الادى.
– ءبىزدىڭ ماقساتىمىز – ءوزارا ساۋدا-ساتتىق كولەمىن الداعى جىلدارى 500 ميلليون دوللارعا دەيىن ارتتىرۋ, ال كەلەشەكتە ميلليارد دوللارعا جەتكىزۋ. بۇل ءۇشىن تاۋار اينالىمىن ۇلعايتۋ جانە جەتكىزىلەتىن تاۋار نومەنكلاتۋراسىن كەڭەيتۋ جونىندەگى جۇمىس توبىنىڭ قىزمەتىن جانداندىرۋعا تاپسىرما بەردىك. ەكى ەلدىڭ ۇكىمەتتەرى ءبىزدىڭ تاپسىرمامىز بويىشا وسى مۇمكىندىكتەردى قاراستىرادى, – دەدى پرەزيدەنت.
ءوز كەزەگىندە تۇرىكمەنستان پرەزيدەنتى سەردار بەردىمۇحامەدوۆ قاسىم-جومارت توقاەۆقا قوناقجايلىعى جانە اشىق ءارى ءوزارا تۇسىنىستىك جاعدايىندا وتكەن سىندارلى كەلىسسوزدەر ءۇشىن العىس ايتتى.
– قازاقستان پرەزيدەنتىمەن كەزدەسۋىمىز ەكى مەملەكەت باسشىلارىنىڭ اراسىندا بارلىق باعىت بويىنشا ءوزارا قارىم-قاتىناستى دامىتۋعا ەرىك-جىگەر, دايىندىق, سونداي-اق ونى جۇزەگە اسىرۋعا زور مۇمكىندىكتەر بار ەكەنىن كورسەتتى. مۇنى نىق سەنىممەن ايتا الامىن. ءبىز جاھاندىق كۇن تارتىبىندەگى ماڭىزدى باعىت سانالاتىن تۇراقتى دامۋ مەن ونىڭ قۇرامداس بولىگى سانالاتىن ەنەرگەتيكالىق قاۋىپسىزدىك, حالىقارالىق كولىك-ترانزيت جولدارىن دامىتۋ, ەكولوگيا جانە قورشاعان ورتانى قورعاۋ ماسەلەلەرى بويىنشا ورتاق ءىس-ارەكەتتەردى ۇيلەستىرۋ ءىسىن جالعاستىرامىز, – دەدى تۇرىكمەنستان پرەزيدەنتى.
سونداي-اق سەردار بەردىمۇحامەدوۆ بۇگىنگى كەلىسسوزدەر ناتيجەلى بولعانىن جەتكىزىپ, قازاقستان پرەزيدەنتىن تۇرىكمەنستانعا كەز كەلگەن قولايلى ۋاقىتتا ساپارمەن كەلۋگە شاقىردى.