قاسىم-جومارت توقاەۆ پەن سەردار بەردىمۇحامەدوۆ كەڭەيتىلگەن قۇرامدا كەلىسسوز جۇرگىزدى, دەپ حابارلايدى Egemen.kz پرەزيدەنتتىڭ ءباسپاسوز قىزمەتىنە سىلتەمە جاساپ.
مەملەكەت باسشىسى قاسىم-جومارت توقاەۆ سەردار بەردىمۇحامەدوۆكە جانە تۇرىكمەن دەلەگاتسياسىنا ءىلتيپات ءبىلدىرىپ, ەلىمىزدىڭ قازاق-تۇرىكمەن اراسىنداعى عاسىرلار بويى قالىپتاسقان دوستىق ءارى تاتۋ كورشىلىك قارىم-قاتىناستىڭ نىعايۋىنا زور قۇرمەتپەن قارايتىنىن اتاپ ءوتتى.
– قازاقستان ءۇشىن بۇل ماڭىزدى وقيعا دەپ سانايمىن. ءسىزدىڭ ساپارىڭىزدىڭ تاريحي ءمانى زور. سەبەبى ءبىز جابىق فورماتتا ىنتىماقتاستىقتى دامىتۋدىڭ وزەكتى ماسەلەلەرىن تالقىلادىق. كۇن تارتىبىندەگى بارلىق ماسەلەلەرگە وڭ كوزقاراس تانىتقانىڭىز ءۇشىن العىس ايتامىن. مەن ەلدەرىمىز اراسىنداعى ىنتىماقتاستىقتىڭ پەرسپەكتيۆالارىنا قاتىستى ءسىزدىڭ بارلىق كوزقاراستارىڭىز بەن پىكىرلەرىڭىزگە وڭ باعا بەردىم, – دەدى پرەزيدەنت.
قاسىم-جومارت توقاەۆ سەردار بەردىمۇحامەدوۆتىڭ استاناعا العاشقى مەملەكەتتىك ساپارى قازاقستان مەن تۇرىكمەنستان اراسىنداعى ديپلوماتيالىق قاتىناستىڭ ورناعانىنا 30 جىل تولۋىمەن تۇسپا-تۇس كەلۋىنىڭ سيمۆولدىق ءمانى بار ەكەنىن اتاپ ءوتتى. مەملەكەت باسشىسىنىڭ ايتۋىنشا, ەكى ەل عاسىرلار بويى جالعاسىپ كەلە جاتقان دوستىققا, تاتۋ كورشىلىك بايلانىسقا, ورتاق مادەني جانە تاريحي قۇندلىلىقتارعا سۇيەنە وتىرىپ, قازىرگى تاڭدا مەملەكەتارالىق سەرىكتەستىكتىڭ ۇلگىسىنە اينالعان ىرگەسى بەرىك ءارى ۇيلەسىمدى قارىم-قاتىناس ورناتتى.
– ەلدەرىمىزدىڭ اراسىندا بەلسەندى ءارى جوعارى دەڭگەيدەگى ءوزارا سەنىمدى ساياسي ديالوگ جولعا قويىلعان. بىلتىر قازان ايىندا بولعان ساپارىمدى زور ىقىلاسپەن ەسكە الامىن. اشحابادتا بولعانىمدا بارىنشا قولايلى جاعداي جاساپ, قوناقجايلىلىق كورسەتكەنىڭىزگە ريزاشىلىعىمدى بىلدىرەمىن. ارينە, مۇنىڭ بارلىعى ساپاردىڭ تابىستى وتۋىنە ىقپال ەتتى, – دەدى قاسىم-جومارت توقاەۆ.
قازاقستان پرەزيدەنتى تۇرىكمەنستاننىڭ ەكس-پرەزيدەنتى گۋربانگۋلى بەردىمۇحامەدوۆكە جىلى لەبىزى مەن ىزگى تىلەكتەرىن جولدادى. كەلىسسوز بارىسىندا ساۋدا-ەكونوميكالىق بايلانىستار ماسەلەسى تالقىلاندى. تاراپتار بىرلەسكەن كۇش-جىگەردى ارتتىرا وتىرىپ, ءوزارا ساۋدا-ساتتىق كولەمىن 1 ميلليارد دوللارعا دەيىن جەتكىزۋگە ۋاعدالاستى.
– مادەني-گۋمانيتارلىق بايلانىستارعا كەلەتىن بولساق, بۇل باعىتتا ءبارى جوسپارعا سايكەس دامىپ كەلەدى. سونداي-اق مەن كاسپي پروتسەسى دەپ اتالاتىن ىنتىماقتاستىعىمىز بەن ءوزارا ءىس-ارەكەتىمىزدى اتاپ وتكىم كەلەدى. جاقىندا اشحابادتا كاسپي ءسامميتى ءوتتى. جيىن وڭ ناتيجەگە قول جەتكىزۋ جانە تۇركىمەن تاراپىنىڭ قوناقجايلىق كورسەتۋ تۇرعىسىنان دا تابىستى ءوتتى, – دەدى مەملەكەت باسشىسى.
سەردار بەردىمۇحامەدوۆ قاسىم-جومارت توقاەۆقا جىلى قابىلداپ, قوناقجايلىق كورسەتكەنى جانە ورتاق جۇمىسقا قولايلى جاعداي جاساعانى ءۇشىن العىس ايتتى.
– مەنىڭ قازاقستان رەسپۋبليكاسىنا العاشقى مەملەكەتتىك ساپارىمدى ەلدەرىمىز اراسىنداعى قارىم-قاتىناستارداعى ەڭ ماڭىزدى وقيعا دەپ سانايمىز. ونىڭ نەگىزگى ماقساتى – ەكىجاقتى ستراتەگيالىق ارىپتەستىكتى بارلىق سالادا نىعايتۋ. سونىمەن قاتار قازىرگى جاعداي مەن دامۋ ۇردىستەرىن ەسكەرە وتىرىپ, ورتالىق ازيا ايماعىندا جانە حالىقارالىق ارەنادا مەملەكەتارالىق ىنتىماقتاستىقتىڭ ناقتى باعدارلارىن ايقىنداۋ. تۇرىكمەن-قازاقستان ساياسي ديالوگى, ساۋدا-ەكونوميكالىق سەرىكتەستىكتىڭ مازمۇنى مەن باعىتى كەشەندى سيپاتقا يە بولىپ, كەلىسىلگەن ستراتەگياعا جانە ءبىزدىڭ ءىس-ارەكەتتەرىمىزدىڭ ۇيلەستىرىلۋىنە جانە ەڭ الدىمەن, ەكى حالىق پەن مەملەكەتتىڭ ۇزاق مەرزىمدى مۇددەلەرىنە نەگىزدەلۋى ءتيىس ەكەنىنە سەنىمدىمىن. بۇگىندە ەلدەرىمىز اراسىنداعى قارىم-قاتىناس قارقىندى دامىپ كەلەدى, – دەدى سەردار بەردىمۇحامەدوۆ.
كەڭەيتىلگەن فورماتتا وتكەن كەلىسسوز بارىسىندا تاراپتار ەكىجاقتى كۇن تارتىبىندەگى بىرقاتار وزەكتى ماسەلەنى جان-جاقتى تالقىلاپ, قازاقستان مەن تۇرىكمەنستان اراسىندا اتقارىلاتىن كەلەشەك ءىس-ارەكەتتەردىڭ نەگىزگى باعىتتارىن ايقىندادى.