قازاقستاننىڭ ۋكرايناداعى ەلشىلەرى جاقىن كۇندەرى ەۆاكۋاتسيالانادى. بۇل تۋرالى قر سىرتقى ىستەر مينيسترلىگىنىڭ رەسمي وكىلى ايبەك سمادياروۆ ايتتى, دەپ حابارلايدى Egemen.kz.
بۇعان دەيىن قازاقستاننىڭ ۋكرايناداعى ەلشىلىگى اقپاراتتىق حابارلامادا قازاقستان ازاماتتارىن ەلدەن كەتۋگە شاقىرعان بولاتىن.
ايبەك سمادياروۆتىڭ ايتۋىنشا, قازىر سىرتقى ىستەر مينيسترلىگى ۋكراينادا قانشا قازاقستان ازاماتى بار ەكەنى تۋرالى اقپاراتتى تەكسەرىپ جاتىر.
«سوڭعى وقيعالارعا بايلانىستى بۇل كورسەتكىش ءارتۇرلى. وزدەرىڭىز كورىپ وتىرعانداي, كەشە ۋكرايناداعى ەلشىلىگىمىزدەن ولارعا وسىنداي جاعدايدا قانداي دا ءبىر كومەك كورسەتۋ تۋرالى حابارلاما جاريالاندى. ءبىرىنشى ەۆاكۋاتسيا كەزىندە كوبى كەتىپ قالدى, كەيبىرى قالىپ قويدى, سوندىقتان ناقتى ساندى ايتا المايمىن», دەپ جاۋاپ بەردى ايبەك سمادياروۆ ۇكىمەت وتىرىسىنان كەيىن جۋرناليستەر قويعان ساۋالعا.
ول شەكارالاردىڭ اشىق ەكەنىن, بىراق ۋكراينادان ەۆاكۋاتسيانىڭ ءبىرىنشى تولقىنىنان كەيىن كوپشىلىگى ۇيلەرىنە ورالعانىن ناقتىلادى.
«قازىر ەلشىلىك تە جۇمىس ىستەپ جاتىر. ەندى ماسەلە ەلشىلىكتى جابۋدا ەمەس, ءبىزدىڭ ەلشىلىك قىزمەتكەرلەرىن ەۆاكۋاتسيالاۋدا. بۇل ماسەلە الداعى كۇندەرى شەشىمىن تابادى. ەۆاكۋاتسيا تولىعىمەن اياقتالۋى ابدەن مۇمكىن», دەدى ايبەك سمادياروۆ.