تۇركىمەنستان پرەزيدەنتى سەردار بەردىمۇحامەدوۆ 15 قازاندا قازاقستانعا مەملەكەتتىك ساپارمەن كەلەدى. بۇل تۋرالى قر سىرتقى ىستەر مينيسترلىگىنىڭ رەسمي وكىلى ايبەك سمادياروۆ ايتتى, دەپ حابارلايدى Egemen.kz.
«مەملەكەت باسشىسىنىڭ شاقىرۋىمەن 15 قازاندا تۇرىكمەنستان پرەزيدەنتى سەردار بەردىمۇحامەدوۆتىڭ قازاقستانداعى العاشقى مەملەكەتتىك ساپارى وتەدى. ساپار ەكى ەل اراسىنداعى ديپلوماتيالىق قارىم-قاتىناستىڭ ورناعانىنا 30 جىل تولاتىن جىلى وتۋدە. بۇل ساپار ساياسي, ساۋدا-ەكونوميكالىق, كولىك-ترانزيتتىك, مادەني-گۋمانيتارلىق ىنتىماقتاستىقتى, سونداي-اق قازاقستان-تۇركىمەنستان ستراتەگيالىق ارىپتەستىگىن نىعايتۋعا باعىتتالعان», دەدى ايبەك سمادياروۆ جۋرناليستەرگە ارنالعان بريفينگتە.
رەسمي وكىلدىڭ ايتۋىنشا, ساپار بارىسىندا تاراپتار كەڭ اۋقىمدى ماسەلەلەردى, سونداي-اق وڭىرلىك جانە حالىقارالىق كۇن تارتىبىندەگى وزەكتى ماسەلەلەردى تالقىلاۋدى جوسپارلاپ وتىر. شارا ناتيجەسىندە بىرقاتار ەكىجاقتى قۇجاتقا قول قويۋ جوسپارلانۋدا.