قازاقستانداعى اۋىل تۇرعىندارىنىڭ ءومىر ءسۇرۋ ۇزاقتىعى قالا تۇرعىندارىنا قاراعاندا تۇراقتى تۇردە جوعارى. بۇل تۋرالى دەنساۋلىق ساقتاۋ ءمينيسترى اجار عينيات ايتتى, دەپ حابارلايدى Egemen.kz.
مينيستر بۇگىندە اۋىلدا 7,8 ميلليون ادام تۇراتىنىن, بۇل ەل حالقىنىڭ 41 پايىزىن قۇرايتىنىن اتاپ ءوتتى. ستاتيستيكاعا سۇيەنسەك, اۋىل تۇرعىندارىنىڭ 38 پايىزى بالالار, 62 پايىزى ەرەسەكتەر.
«حالىقتىڭ دەنساۋلىق كورسەتكىشتەرىن تالداۋ اۋىل تۇرعىندارىنىڭ ءومىر ءسۇرۋ ۇزاقتىعى قالا تۇرعىندارىنا قاراعاندا تۇراقتى جوعارى ەكەنىن كورسەتەدى», دەدى دەنساۋلىق ساقتاۋ مينيسترلىگىنىڭ باسشىسى ماجىلىستەگى ۇكىمەت ساعاتىندا.
دەنساۋلىق ساقتاۋ مينيسترلىگىنىڭ مالىمەتىنشە, وتكەن جىلمەن سالىستىرعاندا بيىل جالپى ءولىم كورسەتكىشى 14 پايىزعا تومەندەگەن.
«ەلدە اۋىلدىق مەديتسينالىق ۇيىمداردىڭ ينفراقۇرىلىمى دامىعان. بەس مىڭنان استام مەديتسينالىق ۇيىم اۋىل تۇرعىندارىنا مەديتسينالىق كومەك كورسەتەدى. ونىڭ ىشىندە ەكى مىڭنان استام مەديتسينالىق پۋنكت, 800 فەلدشەرلىك-اكۋشەرلىك پۋنكت, 1 مىڭنان استام دارىگەرلىك امبۋلاتوريا, 200-دەن استام ەمحانا جانە 203 اۋرۋحانا بار», دەپ قوستى اجار عينيات.