جاقىندا «استانا بالەت» تەاترىندا ۇلكەن ونەر وقيعاسى وتەدى. 14-15 قازان كۇندەرى تەاتر ساحناسىندا البەرتو الونسونىڭ جورج بيزەنىڭ «كارمەن» وپەراسىنىڭ نەگىزىندە قويىلىپ, كومپوزيتور روديون ششەدرين وركەسترگە ارنايى لايىقتاعان «كارمەن-سيۋيتا» ءبىر اكتىلى بالەتىنىڭ پرەمەراسى كورەرمەنىن قۋانتۋعا اسىق.
ايگىلى حورەوگرافيانى استانالىق تەاتر ساحناسىنا كوشىرگەن – رەسەي ۇلكەن تەاترىنىڭ ءسوليسى تيموفەي لاۆرەنيۋك. ح مەرەيتويلىق ماۋسىمداعى العاشقى پرەمەرا باس ديريجەر ارمان ورازعاليەۆتىڭ جەتەكشىلىگىندەگى سيمفونيالىق وركەستردىڭ سۇيەمەلدەۋىمەن وتەدى.
ايتۋلى تۋىندى حح عاسىرداعى بالەت ونەرىنىڭ قايتالانباس ۇلگىسى سانالادى. جارقىن, قاراما-قايشىلىققا تولى مۋزىكا, مايا پليسەتسكاياعا ارناپ قويىلعان حورەوگرافيالىق كونتسەپتسيا – مۇنىڭ بارلىعى قويىلىمنىڭ قۇندىلىعىن ارتتىرارى ءسوزسىز. ايگىلى بالەرينا كارمەن ءرولىن سومداۋدى ساحناعا العاش اياق باسقان كەزدەن ارمانداعان ەكەن.
– بۇل بالەتتىڭ ساحنالىق عۇمىرى وتە اۋىر ەدى. كەڭەستىك ونەر ءۇشىن ول ناعىز سىن بولدى. ەركىندىكتى تۋ ەتكەن, سەزىمى البىرت كارمەننىڭ حيكاياسى تالاي بالەتمەيستەردىڭ شابىتىنا قانات ءبىتىرىپ, ال ەڭ مىقتى بالەرينالار وسى پارتيانى ورىنداۋعا قۇشتار بولدى. وسى كۇنى بۇل بالەتتى دۇنيە جۇزىندە قويادى. ءار قويىلىم سايىن ونىڭ جاڭا تىنىسى اشىلىپ, جاڭا قىرىنان كورىنەدى. بۇل – ناعىز شەدەۆر. كارمەننىڭ بەينەسى – ىنتىق سەزىم, ايەل زاتىنىڭ كوز تارتار سۇلۋلىعى مەن اسىل بولمىسىن سۋرەتتەيدى. سونىسىمەن دە قويىلىم كورەرمەنىن بەيجاي قالدىرمايدى, – دەدى تەاتردىڭ كوركەمدىك جەتەكشىسى نۇرلان كانەتوۆ.
وپەرا تاقىرىبىنا مۋزىكالىق ترانسكريپتسيا جاساعان كومپوزيتور – روديون ششەدرين. ول ەرەكشە ىنتىزارلىقپەن جۇمىس ىستەپ, ايگىلى وپەرا مەن پروسپەر مەريمەنىڭ نوۆەللاسىنداعى پسيحولوگيالىق استارلى ويدى مۋزىكا تىلىمەن ورنەكتەي ءبىلدى. ال كۋبالىق بالەتمەيستەر البەرتو الونسونىڭ جارقىن ءارى بىرەگەي حورەوگرافياسىنىڭ ارقاسىندا كەيىپكەرلەردىڭ سەزىمى مەن ارمان مۇراتى بارىنشا نانىمدى سۋرەتتەلگەنى سونشالىق, «كارمەن-سيۋيتا» بي ونەرىنە قۇشتار جانداردىڭ سۇيىكتى بالەتىنە اينالىپ, تانىمال تەاتر ساحنالارىنان ءتيىستى ورنىن الدى.
جورج بيزەنىڭ كوپشىلىككە تانىمال وپەرا جاۋھارى «كارمەن» 1875 جىلى جارىققا شىقتى. سول كەزدەن بەرى يسپان سىعانىنىڭ بەينەسى فرانتسۋز كومپوزيتورىنىڭ مۋزىكاسىمەن بايلانىستىرىلادى. «كارمەن-سيۋيتا» بالەتىنىڭ الەمدىك پرەمەراسى 1967 جىلدىڭ 20 ساۋىرىندە ۇلكەن تەاتر ساحناسىندا ءوتتى. بالەتتەگى باستى تاقىرىپ رەتىندە – سىعان قىزى كارمەن جانە وعان عاشىق بولعان سارباز حوزەنىڭ قايعىلى تاعدىرى الىنعان.
ايتۋلى تۋىندىنىڭ مۋزىكاسىن بالەت ونەرىنەن الىس جاندار دا جاقسى بىلەدى. يسپان فولكلورىنىڭ اۋەنىمەن ورىلگەن مۋزىكا سيمفونيالىق كونتسەرتتەردە دە ءجيى ورىندالادى. دەمەك سىعان قىزىنىڭ تاعدىرى ارقاۋ بولعان بۇل قويىلىمىنىڭ دا كورەرمەنىن قۋانتارى ءسوزسىز.