ىشكى ىستەر ءمينيسترى مارات احمەتجانوۆ توبىل وڭىرىنە جۇمىس ساپارىمەن كەلىپ, وبلىس تۇرعىندارىمەن كەزدەسۋ وتكىزدى. ەلىمىزدىڭ باس پوليتسەيى قوستانايداعى «جاستار» سارايىنا جينالعان مىڭ جارىمعا جۋىق ادامنىڭ الدىندا ەسەپ بەرىپ, كوپشىلىك تاراپىنان قويىلعان سان ساۋالعا جاۋاپ بەردى. سونىمەن قاتار, كەزدەسۋدە قۇقىق قورعاۋ سالاسىن رەفورمالاۋدىڭ بارىسى تۋرالى ايتىلدى.
مينيستر قىلمىستىق اتقارۋ جۇيەسىن ىزگىلەندىرۋ ماسەلەسىنە دە تەرەڭىرەك توقتالىپ, بۇل سالانىڭ وتكەنى مەن بۇگىنىن جان-جاقتى تارقاتىپ ءوتتى.
– ەل تاۋەلسىزدىگىنىڭ العاشقى جىلدارى كۇردەلى كەزەڭدەردى باستان كەشىرگەنىمىز راس. قىلمىستىڭ ءورشىپ تۇرعان ۋاقىتىن دا ەڭسەردىك. سول كەزەڭدەگى ۇيىمداسقان قىلمىستىق توپتار مەن جەڭ ۇشىنان جالعاسقان سىبايلاس جەمقورلار ەڭ الدىمەن ءبىزدىڭ تاۋەلسىزدىگىمىزگە ۇلكەن قاۋىپ توندىرگەن ەدى. مۇنى تەك زاڭنىڭ كۇشىمەن عانا جويۋ كەرەك بولدى. وسىلايشا, قاتاڭ زاڭدار قابىلداندى. ناتيجەسىندە, قىلمىستىق پروتسەسسۋالدىق كودەكسكە قۋدالاۋشىلىق سيپاتتاعى باپتار ەنگىزىلدى. بۇدان باسقا امال جوق ەدى. ويتكەنى وتپەلى كەزەڭدە پوليتسيا قاتالدىق تانىتپاسا, قوعامدى ۇرەيلەندىرىپ, ىشتەي ءىرىتىپ جاتقان قىلمىستىق ەلەمەنتتەرگە قارسى قۋدالاۋشىلىق سيپاتتاعى شارالاردى قولدانباسا, ەلىمىزدىڭ اياقتان نىق تۇرىپ كەتۋى دە نەعايبىل ەدى. كەيىن زامان وزگەرىپ, زاڭ ۇستەمدىگى ورناي باستاعان تۇستا, قىلمىستى تەرگەپ-تەكسەرۋ جانە وعان جازا تاعايىنداۋ سالاسى ەكى باعىتتا دامي باستادى. قوعامعا اۋىر زاردابىن تيگىزەتىن قىلمىستار اۋىر قىلمىستار ساناتىنا جاتقىزىلىپ, وعان جاۋاپتىلىقتى قاتايتتىق. ال قوعامعا ايتارلىقتاي قاۋىپ توندىرە قويمايتىن ورتا دارەجەدەگى قىلمىستاردى قۋدالاۋشىلىقتان ارىلتتىق. مۇنداي قىلمىستارعا بۇرىن قاماۋ تۇرىندەگى ءبىر-اق سانكتسيا قولدانىلاتىن. قازىر وعان شەكتەۋ, ايىپپۇل, ءۇي قاماعى قوسىلىپ, ازاماتتى باس بوستاندىعىنان ايىرمايتىن باسقا دا شارالاردى قولدانا باستادىق. تاۋەلسىزدىكتىڭ العاشقى جىلدارى قازاقستان تۇرمەگە قامالعانداردىڭ سانى جاعىنان الەم ەلدەرى بويىنشا اقش پەن رەسەيدەن كەيىنگى ءۇشىنشى ورىندا تۇردى. كەيىن بىرتە-بىرتە جۇيەلى تۇردە جۇزەگە اسىرىلا باستاعان قۇقىقتىق رەفورمالار ءوز ناتيجەسىن بەرىپ وتىر. بۇگىندە قازاقستان بۇل كورسەتكىش بويىنشا 77-ورىندا تۇر, – دەدى مارات احمەتجانوۆ.
كەزدەسۋ بارىسىندا مينيستر قازىرگى قوعامدا بەلەڭ الىپ تۇرعان زاڭسىز ەسىرتكى ساۋداسى, ينتەرنەت-الاياقتىق جانە جول قاۋىپسىزدىگى سياقتى وزەكتى ماسەلەلەردى قوزعادى.
ماسەلەن, مارات مۇرات ۇلىنىڭ ايتۋىنشا, ەلىمىزدە جاسالاتىن بارلىق قىلمىستىڭ تورتتەن ءبىرىن ازاماتتاردىڭ اڭعالدىعىن پايدالانىپ ينتەرنەت ارقىلى تاقىرعا وتىرعىزىپ كەتەتىن الاياقتار جاسايدى ەكەن.
– كەيدە ءبىر قىلمىستىق ءىستىڭ اياسىندا 100-دەن استام جابىرلەنۋشىنىڭ شاعىمى تەكسەرىلەتىن جاعدايلار بولادى. جالپى, رەسپۋبليكا بويىنشا ينتەرنەت الاياقتارى ازاماتتارعا 10 ملرد تەڭگە كولەمىندە شىعىن كەلتىرگەن. قازىر ءبىز شەتەلدىك ارىپتەستەرىمىزبەن ءوزارا ىنتىماقتاستىق ورناتتىق. ناتيجەسىندە, بىرنەشە قىلمىستىق توپ ۇستالدى. بىراق ءبىز تەك قىلمىس فاكتىسى بويىنشا جۇمىس ىستەمەيمىز. ەكىنشى دەڭگەيلى بانكتەرمەن جانە ۇيالى بايلانىس وپەراتورلارىمەن مەموراندۋمدارعا قول قويىلدى. ادەتتە بانك قىزمەتكەرىمىن نەمەسە پوليتسيادانمىن دەپ قوڭىراۋ شالاتىن الاياقتاردىڭ جولى كەسىلدى. قازىر اۋىسپالى نومىرلەردى بۇعاتتاۋعا كومەكتەسەتىن قۇرىلعى بار. وسى قۇرىلعى ارقىلى ۇيالى بايلانىس وپەراتورلارى الاياقتىڭ قوڭىراۋىن بىردەن قابىلداماي تاستايدى, – دەدى مينيستر.
ىشكى ىستەر ءمينيسترى مارات احمەتجانوۆ وڭىردەگى قىلمىستىق احۋالعا دا توقتالدى. ايتۋىنشا, رەسپۋبليكا بويىنشا تىركەلگەن قىلمىستىڭ 4,5 پايىزى قوستاناي وبلىسىنىڭ ۇلەسىندە. جىل باستالعالى ايماقتا قىلمىس دەڭگەيى 15 پايىزعا تومەندەگەن. الايدا وڭىردە بيىلعى توعىز ايدىڭ ىشىندە 27 قاساقانا ادام ءولتىرۋ وقيعاسى تىركەلىپ وتىر. ەسىرتكى قىلمىسى دا ازايار ەمەس. وعان قارسى اياۋسىز كۇرەس جۇرگىزىلىپ جاتىر. ماسەلەن, قوستاناي-سۇرعان تاس جولىندا 108 كيلو ماريحۋانا, رۋدنىي قالاسىندا 176 كيلو ەسىرتكى زاتى, ال اۋليەكول اۋدانىندا 3 كيلودان استام گاشيش تاركىلەنگەن.
مينيستر وڭىردە جول اپاتىنىڭ جيىلەپ كەتكەنىنە الاڭداۋشىلىق ءبىلدىردى. ماسەلەن, بيىل جول-كولىك وقيعاسى سالدارىنان قازا تاپقانداردىڭ سانى 37 پايىزعا ارتقان. بىلتىرعى وسى كەزەڭ ىشىندە جول اپاتىنان 51 ادام قازا تاپسا, بيىل بۇل كورسەتكىش 70-كە جەتكەن.
وسى ماسەلەلەردى العا تارتقان ىشكى ىستەر ءمينيسترى وبلىستىق پوليتسيا دەپارتامەنتىنىڭ باستىعىنا جۇمىستى قاتاڭداتۋدى تاپسىردى. مۇرات احمەتجانوۆ كەزدەسۋدەن كەيىن قوستاناي قالاسىنىڭ ۋچاسكەلىك ينسپەكتورلارىنا 20 قىزمەتتىك كولىكتىڭ كىلتتەرىن تابىس ەتتى.
قوستاناي وبلىسى