ارالاس جەكپە-جەكتەن UFC-دە ونەر كورسەتىپ جۇرگەن قازاقتىڭ ۇلى دامير يسماعۇلوۆ ءوزىنىڭ كەلەسى جەكپە-جەگىندە رەسەيدىڭ نامىسىن قورعايتىن ارميان سپورتشىسى ارمان تسارۋكيانمەن كۇش سىناسادى. بۇل باسەكە 18 جەلتوقساندا اقش-تىڭ لاس-ۆەگاس قالاسىندا وتەدى دەپ بەلگىلەنىپ وتىر.
ارمان تسارۋكيان 1996 جىلدىڭ 11 قازانىندا گرۋزيانىڭ احالكالاكي قالاسىندا دۇنيەگە كەلگەن. كەيىننەن اتا-اناسىمەن بىرگە رەسەيدىڭ كراسنودار ولكەسىنە قونىس اۋداردى. سول جاقتا ءجۇرىپ ەركىن كۇرەسپەن اينالىستى. كەيىننەن پانكراتيون مەن گرەپپلينگتەن رەسەي چەمپيونى اتانىپ, ءتۇرلى حالىقارالىق تۋرنيردە توپ جاردى. ازيا چەمپيونى دەگەن اتاعى دا بار. ارمان 2015 جىلدان بەرى ارالاس جەكپە-جەكتەن جارىستارعا شىعىپ, ەلەۋلى تابىستارعا قول جەتكىزدى. سول ارالىقتا 21 كەزدەسۋ وتكىزىپ, 18 رەت جەڭىس تويىن تويلادى. 12 باسەكەدە ايقىن باسىمدىق تانىتتى. تسارۋكيان ءۇش رەت جەڭىلىستىڭ كەرمەك ءدامىن تاتتى. ءوزىنىڭ سپورتتىق كارەراسىن باستاعاندا الەكساندر بەلىحتان ۇتىلسا, 2019 جىلى UFC-دەگى تۇساۋكەسەر كەزدەسۋىندە يسلام ماحاچەۆكە ۇپاي سانىمەن ەسە جىبەردى. بيىلعى جازدا پولشالىق ماتەۋش گامبروتقا جول بەردى.
دامير يسماعۇلوۆ 1991 جىلدىڭ 3 اقپانىندا رەسەيدىڭ ورىنبور وبلىسىندا تۋعان. 2014 جىلدان بەرى ارالاس جەكپە-جەكتى سەرىك ەتكەن ول 25 كەزدەسۋدىڭ تەك بىرەۋىندە عانا ۇتىلدى. 2015 جىلدىڭ كۇزىندە قانداسىمىز نازراندا جەرگىلىكتى سپورتشى رامازان ەسەباەۆقا ەسە جىبەردى. ودان كەيىن قاتارىنان 19 باسەكەدە باسىم ءتۇستى. 13 كەزدەسۋدە ايقىن باسىمدىق تانىتتى. رەسەيدىڭ م-1 نۇسقاسى بويىنشا چەمپيوندىق بەلبەۋدى يەلەندى. ال UFC-دە يسماعۇلوۆ بەس رەت وكتاگونعا شىعىپ, بارلىعىندا جەڭىسكە جەتتى.
ءبىر قىزىعى, بۇل سپورتشىنىڭ ەكەۋىنىڭ دە مەنەدجەرى ءبىر. ول – قازاق جىگىتى سايات ابدراحمانوۆ. باق وكىلدەرىنە بەرگەن سۇحباتىندا: «مەنىڭ فايتەرلەرىم ءبىر-بىرىمەن ايقاسقانىن ءاۋ باستان قالاماعان ەدىم. وسى ورايدا ەكەۋىن بەتتەستىرمەۋ ءۇشىن بار كۇشىمدى سالدىم. بىراق UFC باسشىلىعى وزدەرىنىڭ كەسىمدى سوزدەرىن ايتىپ, بۇل اڭگىمەگە نۇكتە قويدى. ونىڭ ۇستىنە, قازىر داميرگە دە, ارمانعا دا شەگىنەر جول جوق. ەكەۋى دە الەمدىك رەيتينگتە العا جىلجىعىسى كەلەدى. سوندىقتان دا ولار ءوز كەلىسىمدەرىن بەردى», دەپ سايات جوعارىداعى جەكپە-جەككە بايلانىستى ءوز پىكىرىن ءبىلدىردى.
قازىرگى كەزدە دامير يسماعۇلوۆ جەڭىل سالماقتىلاردىڭ رەيتينگىندە 12-ورىندا تۇرسا, ارمان تسارۋكيان ۇزدىك وندىقتى تۇيىندەۋدە. ال توپ-10 فايتەردىڭ قاتارىنا چارلز وليۆەيرا (برازيليا), داستين پورە (اقش), دجاستين گەتجي (اقش), يسلام ماحاچەۆ (رەسەي), مايكل چەندلەر (اقش), بەنەيل داريۋش (اقش), رافاەل فيزيەۆ (ازەربايجان), رافاەل دوس انوس (برازيليا) جانە ماتەۋش گامروت (پولشا) سىندى ساڭلاقتار ەنىپ وتىر. ال كەزىندە اتاعى جەر جارعان يرلانديانىڭ اتىشۋلى سپورتشىسى كونور ماكگرەگور 11-ورىندى ەنشىلەۋدە.