تۇرىكمەنستان پرەزيدەنتى سەردار بەردىمۇحامەدوۆ قازان ايىندا قازاقستانعا مەملەكەتتىك ساپارمەن كەلەدى. بۇل تۋرالى ساياسي كونسۋلتاتسيالار بارىسىندا بەلگىلى بولدى, دەپ حابارلايدى Egemen.kz.
بەينەكونفەرەنتسيا فورماتىندا قازاقستان سىرتقى ىستەر ءمينيسترىنىڭ ورىنباسارى ەرمۇحامبەت قونىسباەۆ پەن تۇرىكمەنستان سىرتقى ىستەر ءمينيسترىنىڭ ورىنباسارى ۆەپا حادجيەۆتىڭ توراعالىعىمەن قازاقستاندىق-تۇرىكمەن ساياسي كونسۋلتاتسيالار ءوتتى.
«قازاقستان رەسپۋبليكاسىنىڭ پرەزيدەنتى قاسىم-جومارت توقاەۆتىڭ 2021 جىلعى قازانداعى اشعاباتقا مەملەكەتتىك ساپارىنىڭ قورىتىندىلارى بويىنشا قول جەتكىزىلگەن ۋاعدالاستىقتاردى ىسكە اسىرۋ مەن تۇرىكمەنستان پرەزيدەنتى سەردار بەردىمۇحامەدوۆتىڭ 2022 جىلعى قازانداعى قازاقستانعا مەملەكەتتىك ساپارىنا دايىندىققا, سونداي-اق تۇرىكمەن تاراپىنىڭ 6-شى اوسشك سامميتىنە, تمد مەملەكەتتەرى باسشىلارىنىڭ كەڭەسىنە جانە «ورتالىق ازيا - رەسەي» سامميتىنە قاتىسۋىنا ەرەكشە نازار اۋدارىلدى», دەلىنگەن قر ءسىم ءباسپاسوز قىزمەتى تاراتقان حابارلامادا.