ورتا سالماقتاعى WBO تۇجىرىمى بويىنشا الەم چەمپيونى قازاقستاندىق جانىبەك ءالىمحان ۇلى (12-0, 8 كو) جەكپە-جەكسىز جەڭىپ العان چەمپيوندىق بەلدىگىن العاش رەت قورعايدى.
كۇنى كەشە وتانداسىمىزدىڭ ءىسىن جۇرگىزەتىن Top Rank پروموۋتەرلىك كومپانياسى رەسمي تۇردە جانىبەك ءالىمحان ۇلىنىڭ WBO بەلدىگىن قورعايتىنىن مالىمدەدى. چەمپيوندىق اتاققا ۇمىتكەر بوكسشى – بريتانيالىق دەنزەل بەنتلي (17-1-1, 14 كو). 1995 جىلى ۇلىبريتانيادا دۇنيەگە كەلگەن بەنتلي 2017 جىلدان بەرى كاسىپقوي بوكستا ونەر كورسەتىپ ءجۇر. وسى ۋاقىتقا دەيىن 19 كەزدەسۋ وتكىزگەن بريتانيالىق بوكسشى 17 جەكپە-جەگىندە جەڭىسكە جەتىپ, بىرەۋىندە جەڭىلىپ قالعان. تاعى ءبىر ايقاسى تەڭ ناتيجەمەن اياقتالعان. ال جانىبەك ازىرگە جەڭىلىستىڭ نە ەكەنىن بىلمەي كەلە جاتقان قازاقستانداعى جانە ورتا سالماقتاعى ساناۋلى بوكسشىنىڭ ءبىرى.
ەكى بىلعارى قولعاپ شەبەرى اراسىنداعى بوكس كەشى 12 قاراشا كۇنى اقش-تىڭ لاس-ۆەگاس قالاسىنداعى Palms Casino Resort ارەنادا وتەدى. ءالىمحان ۇلى مەن بەنتلي كەشتىڭ باستى جەكپە-جەگىندە جۇدىرىقتاسادى.