تابيعات بەرگەن دارا دارىن يەلەرىنە دەگەن حالىق قۇرمەتى قاشان دا قالتقىسىز. وسىنداي تۇلعالار لەگىندە ءانشى-سازگەر دانەش راقىشەۆتىڭ ەسىمى دە ەرەكشە اتالادى. اۋەزدى انىمەن تۋعان ەلىن تەربەگەن جاننىڭ تۋعان كۇنى قارساڭىندا ءانشى اتىنداعى №3 ءبىلىم شاڭىراعىندا ءبىر اي بويى ونىڭ ونەرىن دارىپتەۋگە ارنالعان “اۋەلەپ ۇشقان ارۋ ءان” اتتى سازدى باعدارلاما قورىتىندىلاندى. “ساعىندىق, اتا, داۋسىڭدى” بەينەفيلمىن تاماشالاعان قاۋىم د.راقىشەۆتىڭ ورىنداۋىنداعى ءان سازىمەن تەربەلدى.
ءبىر قىزىعارلىعى, وقۋشىلاردىڭ تالانت يەسىنە ارنالعان ء“بىر ۇزىك سىر” اتتى تانىمدىق كونفەرەنتسياسىندا ونىڭ كىسىلىك كەلبەتىنە, دارىنى مەن شىعارماشىلىعىنا بايلانىستى جۇمىستاردى تىڭدارمان قاۋىم جوعارى باعالادى. ەندى ءبىر ساتتە شاكىرتتەر دارىن يەسىنە ارناعان جىرلارىن وقىسا, دراما ۇيىرمەسىنىڭ ءمۇشەلەرى ءانشىنىڭ ومىرىنەن كورىنىس قويدى.
مەرەكەلىك شارادا ءانشى-سازگەردىڭ زايىبى راحيلا اپاي, قىزى دانەگۇل ءدانەشكە دەگەن حالقىنىڭ قامقورلىعىنا ريزاشىلىق ءبىلدىرىپ, اندەرىن ناسيحاتتاۋداعى الداعى ماقساتتارىن ورتاعا سالدى.
كۇمىسجان بايجان.
فيلارمونيا ۇجىمىنىڭ جاڭا جەڭىسى
جەتىسۋ جەرى – دارىنعا باي. سوندىقتان دا بولار, وبلىستىق ءسۇيىنباي اتىنداعى فيلارمونيانىڭ م.تولەباەۆ اتىنداعى ۇلت اسپاپتار وركەسترى اقتوبە قالاسىندا وتكەن “جۇبانوۆ كوكتەمى” حالىقارالىق حالىق اسپاپتار وركەسترى مەن انسامبلدەر فەستيۆالىنە قاتىسىپ, ءبىرىنشى ورىندى يەلەنىپ قايتتى.
حالىقارالىق ونەر سايىسىنا ماسكەۋ, ورىنبور, سامارا, تاشكەنت پەن استانا, تاعى باسقا دا التى وبلىستىڭ ونەر ۇجىمدارى قاتىسىپ, ەل مەن جەردى جالعاعان رۋحاني كەڭىستىكتىڭ بۇگىنگى تابىسىن, حالىقتار اراسىنداعى ۇلى دوستىقتى پاش ەتىپ, ەلىمىزدىڭ ماڭدايىنداعى جارىق جۇلدىزداردىڭ ءبىرى, سىرلى سازگەر, مۋزىكا ونەرىنىڭ مايتالمانى احمەت جۇبانوۆتىڭ باي مۇراسىن ناسيحاتتاۋ مەن ۇرپاققا ۇلاعات رەتىندە ۇسىنۋدى مۇرات ەتسە, ماقسات ورىندالعانى.
جەتىسۋلىقتاردىڭ باي باعدارلاماسى كورەرمەن كوڭىلىنەن شىعىپ, فيلارمونيا ۇجىمى جاڭا جەڭىسىمەن جىگەرلەندى.
الماتى وبلىسى.
حالىق اندەرى الۋان ەتنوس تىلدەرىندە
تاعدىر تالايىمەن قازاق جەرىنەن پانا تاپقان ەتنوس وكىلدەرى قازاقستاندى ءوز وتانى سانايدى. جاقىندا شىمكەنتتەگى وپەرا جانە بالەت تەاترىندا ەتنوس وكىلدەرى اراسىندا “كۇمىس كومەي” دەگەن اتپەن حالىق اندەرىن ورىنداۋدان وبلىستىق بايقاۋ ءوتتى. بايقاۋ شارتى بويىنشا الدىمەن قازاق تىلىندە, سوسىن ءوز تىلىندە, حالىق اندەرىن ورىنداعاندار اراسىندا ماقتارالدىق ماكحامباي قۇربانوۆ باس جۇلدەگە يە بولدى. شىمكەنتتىك شاحيستا وسمانوۆا ءبىرىنشى, ارىستىق سانسىزباي حاسانوۆ پەن تولەبيلىك ميلانا كينزيابۋلاتوۆا ەكىنشى ورىندى جەڭىپ السا, شىمكەنتتىك نەليا دانيلەنكو, ماحمەد اليەۆ پەن ءتۇركىستاندىق شاريف يسمايلوۆ ءۇشىنشى ورىندى ەنشىلەدى.
باقتيار تايجان, شىمكەنت.