EcoStudentKZ چەللەندجىنە پاۆلودارلىق ستۋدەنتتەر دە ءۇن قوستى. دۇيسەنبى كۇنگى ەستافەتالىق ءىس-شاراعا 40-تان استام بەلسەندى ستۋدەنت اتسالىسىپ, جاستار وبلىس ورتالىعىنداعى ۋسولكا وزەنىنىڭ جاعالاۋىن قوقىستان تازارتۋعا جۇمىلدى.
ۋسولكا وزەنىنىڭ ماڭايى – شاھار تۇرعىندارى مەن قوناقتار ءجيى سەرۋەندەيتىن اۋماق. سۋ ايدىنىنىڭ اينالاسىندا تاماشا تابيعات قويناۋى ورنالاسقان, جاعالاۋى تولعان توعاي. وكىنىشكە قاراي, تابيعات اياسىنا شىققاندار سوڭىنان تاماق قالدىقتارى مەن پوليەتيلەن قاپشىقتارىن, ءتۇرلى قوقىستار قالدىرىپ كەتەدى. سوندىقتان ءوڭىر جاستارى بۇل جەردى ۇنەمى تازارتىپ تۇرۋعا ىنتالى.
س.تورايعىروۆ ۋنيۆەرسيتەتىنىڭ 4-كۋرس ستۋدەنتى, وقۋ ورنىنداعى جاستار ءىسى جونىندەگى كوميتەتىنىڭ توراعاسى داۋرەن ءشارىپوۆ ەكولوگيالىق تازالىق ءىس-شاراسىنا ءبىر توپ بەلسەندى جاستى باستاپ كەلدى. داۋرەن EcoStudentKZ چەللەندجىن شىمكەنتتىك قۇربى-قۇرداستارىنان قابىلداپ العاندارىن جەتكىزدى.
– ءبىزدىڭ ۋنيۆەرسيتەتتىڭ جاستارى ءاردايىم بەلسەندى. بۇگىن 20-دان استام جاس ۋسولكا وزەنىنىڭ جاعالاۋىن تازارتۋ ۇستىندەمىز. بۇل جەردە جاز بويى «جاسىل ەل» جاساقتارىمەن, وزگە دە بەلسەندى جاستاردىڭ كومەگىمەن ەكولوگيالىق شارالار تۇراقتى تۇردە ۇيىمداستىرىلىپ كەلگەنىن بىلەمىز. الايدا كەيبىر تۇرعىنداردىڭ مادەنيەتسىزدىك تانىتۋىنان جاعالاۋدى ءجيى تازارتۋعا ءماجبۇرمىز. توعاي اراسىنداعى الاڭقايلاردا, وزەن جاعاسىندا قوقىستار ۇنەمى شاشىلىپ جاتادى. جاستار قازىر جيناپ كەتسە, ەرتەڭگى كۇنى سۇرىقسىز كورىنىس تاعى قايتالانادى. سوندىقتان ءبىز بۇل چەللەندجىمىز ارقىلى شاھار تۇرعىندارىنىڭ نازارىن تازالىق مادەنيەتىنە اۋدارعىمىز كەلەدى. قورشاعان ورتانى كوزىمىزدىڭ قاراشىعىنداي ساقتاۋ ءۇشىن بىزگە مۇنداي ىستەرگە جۇيەلى جۇمىلۋىمىز قاجەت, –دەيدى ول.
بۇعان دەيىن س.تورايعىروۆ ۋنيۆەرسيتەتىنىڭ ستۋدەنتتەرى ەرتىس وزەنىنىڭ ورتالىق جاعاجايىندا ەكوجورىق جاساپ, جاز بويعى جينالىپ قالعان قوقىستى جيناپ, ارنايى ورىندارعا توككەن ەدى.
ال پاۆلودار پەداگوگيكالىق ۋنيۆەرسيتەتىنەن كەلگەن جاستار كوپشىلىككە «وزىڭنەن كەيىن قوقىس تاستاما!» دەپ ۇران تاستادى. ءبىلىم بەرۋ مەكەمەسىندەگى جاستار وكىلى باتىرحان بايتاناتتىڭ پىكىرىنە دەن قويساق, مۇنداي ءىس-شارالار ناتيجەسىندە زامانداستار بويىندا ەكولوگيالىق مادەنيەت قالىپتاسادى. ۋنيۆەرسيتەت ستۋدەنتتەرى تازالىق شارالارىنان قالىس قالمايتىنىن ايتتى. وتكەن سەنبىدە وبلىس ورتالىعىنىڭ سولتۇستىك بولىگىندە بوي كوتەرىپ جاتقان جاڭا شاعىن اۋدان – «سپورت-سيتيدە» اعاش وتىرعىزۋ سەنبىلىگىنە قاتىستى. وقۋ ورنىنىڭ ەكولوگيالىق باعىتتا ءوز ساياساتى بار. ونىڭ اياسىندا جىل سايىن جۇزدەگەن شارا ۇيىمداستىرىلادى.
پاۆلودارلىق بەلسەندى جاستار EcoStudentKZ چەللەندجىن ەكىباستۇز قالاسى مەن تۇركىستان ستۋدەنتتەرىنە جولدادى. ودان ءارى ەكولوگيالىق ەستافەتا تاراز, پەتروپاۆل, الماتى, سەمەي قالالارىندا جالعاسادى دەپ كۇتىلۋدە.
پاۆلودار