قازان ايىنان باستاپ سەمەيدە «سەرگەك» بەينەباقىلاۋ جۇيەسى ىسكە قوسىلادى. وسىلايشا, اباي وبلىسىنىڭ ورتالىعىنداعى جول قوزعالىسىنىڭ قاۋىپسىزدىگى مەن قوعامدىق ءتارتىپتى قاداعالاۋ جەڭىلدەي تۇسپەكشى.
بۇل جوبانىڭ اياسىندا احۋال ورتالىعى مەن مالىمەتتەردى وڭدەۋ ورتالىعى قۇرىلعانىن ايتا كەتكەن ورىندى. تۇتاستاي العاندا, قالا بويىنشا 1,5 مىڭداي بەينەباقىلاۋ كامەراسى ورناتىلعان. قازىر بارلىق باقىلاۋ جۇيەسى سىناق رەجىمىندە جۇمىس ىستەپ جاتىر.
«وبلىستىق پوليتسيا دەپارتامەنتىمەن كەڭەسىپ, «سەرگەك» بەينەباقىلاۋ جۇيەسىن 1 قازاننان باستاپ ىسكە قوسۋدى ۇيعاردىق. قوعامدىق ءتارتىپ پەن جول قاۋىپسىزدىگىن قاداعالاۋعا ارنالعان 1551 كامەرا ورناتىلدى. 775 كامەرا قوعامدىق قاۋىپسىزدىكتى جانە 776 بەينەباقىلاۋ اپپاراتى جول قاۋىپسىزدىگىن باقىلايدى.
بەينە ماتەريالدار بويىنشا دەرەكتەردى ساقتاۋ 30 كۇنگە, فوتو-ايىپپۇل بار سۋرەتتى 3 ايعا دەيىن ساقتاۋ كوزدەلگەن جانە مەتەودەرەكتەر شامامەن ءبىر جىلداي ساقتالادى», دەدى «كوركەم تەلەكوم» كومپانياسىنىڭ سەمەيدەگى فيليالىنىڭ ديرەكتورى رۇستەم ەلۋباەۆ.
وسى جوبانىڭ اياسىندا پوليتسيا قىزمەتكەرلەرىنە «سەرگەك قورعاۋ» موبيلدىك قوسىمشاسىمەن جۇمىس ىستەۋ ءۇشىن 100 پلانشەت الىنىپتى. اتالعان ءموبيلدى قوسىمشا جولداعى «سەرگەك» جۇيەسىنە بىرىكتىرىلىپ, جالعان ءنومىر تاققان, جۇرگىزۋشى كۋالىگىنسىز كولىك باسقارعانداردى, سونداي-اق ىزدەۋدەگى كولىكتەردى انىقتاۋدى وڭتايلاندىرا تۇسەدى دەيدى قۇزىرلى ورگان وكىلدەرى.
«مۇنداي كولىكتەر جونىندەگى اقپارات وپەراتورعا جىبەرىلىپ وتىرادى. جەدەل الدىن الۋ شارالارى كەزىندە پوليتسيا قىزمەتكەرلەرى كولىكتى توقتاتىپ, قاجەتتى شارا قولداناتىن بولادى. جول ەرەجەسىنىڭ بۇزىلۋىن تىركەۋ اۆتوماتتى رەجىمدە جۇزەگە اسادى.
قازاقستاندىق ماماندار دايىنداعان باعدارلاما ارنايى الگوريتمگە سايكەس زاڭ بۇزۋشىلىقتى انىقتايدى. بۇدان كەيىن پوليتسيا قىزمەتكەرى تەكسەرۋ جۇرگىزىپ, ەلەكتروندى تسيفرلى قولتاڭبا ارقىلى ۇيعارىمعا قول قويادى. بارلىق فاكتى باس پروكۋراتۋرانىڭ قۇقىقتىق ستاتيستيكا جانە ارنايى تىركەۋ كوميتەتىنىڭ اكىمشىلىك ىستەر بويىنشا بىرىڭعاي رەەسترىنە بىردەن تىركەلەدى», دەدى قۇزىرلى ورگان ماماندارى.
الداعى ۋاقىتتا دەرەكتەردى وڭدەۋ ورتالىعىنىڭ قىزمەتى كەڭەيەدى دەپ كوزدەلىپ وتىر. قالا اكىمىنىڭ مىندەتىن اتقارۋشى ديميتري گاريكوۆ ايتقانداي, قازىر بەينەباقىلاۋ كامەرالارى 88 وقۋ ورنى مەن شاھاردىڭ بىرقاتار شاعىن اۋدانىندا جۇمىس ىستەپ تۇر.
«بۇدان باسقا, مۇندا تاعى ءبىر قىزمەت – Komek 109, ياعني بارلىق قالالىق كوممۋنالدىق كاسىپورىننىڭ بىرىڭعاي اپاتتى قىزمەتى ورنالاساتىن بولادى. قالا كوشەلەرىنەن تۇسەتىن اقپارات ورتالىق پۋلتكە كەلىپ, كەرى بايلانىس ورنايدى. الداعى ۋاقىتتا وسى جۇيە سەمەي جانە بۇكىل ءوڭىر بويىنشا جۇمىس ىستەيتىن 112 قىزمەتىمەن بىرىكتىرىلمەك. ونىڭ قۇرىلىمىنا 101, 102, 103 قىزمەتتەرى قوسىلادى», دەدى د.گاريكوۆ.
«سەرگەك» جۇيەسى وقيعا ورنىنا جاقىن ورنالاسقان پاترۋلدىك جانە قىزمەتتىك اۆتوكولىكتەردى انىقتاپ, ولاردى حابارلاندىرىپ وتىرادى دەپ ناقتىلادى اكىمدىك وكىلدەرى.
اباي وبلىسى