اقتوبە وبلىسىنىڭ پوليتسەيلەرى جەرگىلىكتى تۇرعىننان 900-دەن استام كيىك ءمۇيىزىن تاركىلەدى, دەپ حابارلايدى Egemen.kz Polisia.kz سايتىنا سىلتەمە جاساپ.
اقتوبە وبلىسى پوليتسيا دەپارتامەنتى ۇيىمداسقان قىلمىسقا قارسى كۇرەس باسقارماسىنىڭ قىزمەتكەرلەرى ۇقك دەپارتامەنتىنىڭ قىزمەتكەرلەرىمەن بىرلەسىپ سامارا-شىمكەنت تاس جولىندا جەدەل ءىس-شارالار وتكىزۋ بارىسىندا ۆاز-2110 اۆتوكولىگىن توقتاتتى. كولىكتى 41 جاستاعى ەر ادام جۇرگىزگەن, ال جولاۋشىلار وتىراتىن ورىندا 61 جاستاعى ەر ادام بولعان.
پوليتسەيلەر كولىكتىڭ جۇكسالعىشىنان كيىك ءمۇيىزى بار جەتى قوراپتى تاپتى. جولاۋشى قوراپتاردىڭ وزىنە تيەسىلى ەكەنىن جانە ولاردى ساتپاقشى بولعانىن ءتۇسىندىردى. قوراپتاردا 765 اقبوكەن ءمۇيىزى بولدى.
سونىمەن قاتار ەر ادامنىڭ تۇرعىلىقتى جەرى بويىنشا تاعى 184 اقبوكەن ءمۇيىزى تاركىلەندى. بارلىعى 949 ءمۇيىز انىقتالدى.
اتالعان فاكتى بويىنشا قر قك 339-1-بابى ءبىرىنشى بولىگى «سيرەك كەزدەسەتىن جانە قۇرىپ كەتۋ قاۋپى تونگەن, سونداي-اق پايدالانۋعا تىيىم سالىنعان وسىمدىكتەر مەن جانۋارلار تۇرلەرىن, ولاردىڭ بولىكتەرى مەن دەريۆاتتارىن زاڭسىز پايدالانۋ» بويىنشا سوتقا دەيىنگى تەرگەۋ باستالدى.
اتالعان باپتىڭ سانكتسياسى ءۇش جىلدان بەس جىلعا دەيىنگى مەرزىمگە باس بوستاندىعىن شەكتەۋ تۇرىندەگى جازانى نە مۇلكى تاركىلەنىپ, سول مەرزىمگە باس بوستاندىعىنان ايىرۋدى كوزدەيدى.