ادەتتە جاستاردىڭ ۇلگى تۇتار ادامىنا اينالىپ, كوپشىلىگىن ءانى مەن ءسانى, سويلەگەن ءسوزى ارقىلى «تاربيەلەيتىن» انشىلەردىڭ كوزگە قوراش كورىنەتىن قىلىقتارى, دۇنيەتانىمىنا كەيدە قارنىمىزدىڭ اشاتىنى بار. سودان بولسا كەرەك, حالىق اراسىندا «انشىلەر ساۋاتسىز, ولار كىتاپ تۇگىلى, گازەت-جۋرنال وقىمايدى» دەگەن پىكىر قالىپتاسقان. بارىنە توپىراق شاشۋعا بولماس, بىراق...
الەۋمەتتىك جەلىلەر جاقسى بولدى, كەيبىرەۋلەرگە قول جەتپەس جۇلدىزداي بولعاندارمەن «دوستاسىپ», ءوزارا پىكىر الىسۋعا مۇمكىندىك بار. نەگىزىنەن, «ينستاگرام», «تۆيتتەردە» بەلسەندىلىك تانىتاتىن ولار, ونەر يەلەرى وزدەرىنە جازىلعان ماقتاۋلارعا, وڭدى پىكىرلەرگە جاۋاپ جازبايدى.
ال سىنىن ءبىلدىرىپ, توسىننان تەرىس پىكىر ايتقاندارعا سول بويدا-اق قارىمتاسىن قايتارادى.
ايتالىق, ورفوگرافيا مەن ورفوەپيانىڭ اراجىگىن ايىرا المايتىن انشىلەرىمىز از ەمەس. ءبىر قىنجىلتاتىنى, ولار سول ءان ونەرىندە قولدانىلاتىن سوزدەردى دە دۇرىس جازا المايدى. باسقا-باسقا, پروديۋسەر ءسوزىنىڭ ءوزىن ەكى «س» ءارپىمەن جازاتىندارعا نە دەيسىڭ؟ قانشاما جىلدان بەرى اسىراپ, ولاردى تانىمال ەتكەن فونوگرامما اتاۋىن دا قاتە جازىپ, وعان ەكى «م»-دى قيمايتىندار كەزدەسەدى. ول ول ما, ءوزىمىزدىڭ ءتول ءسوزىمىز بولماسا دا, قازاق ءتىلىنىڭ قولدانىسىنا الدەقاشان ەنگەن ساحنا ءسوزىن «ساحىنا» دەپ تاعى ءبىر ءسوزدى «ويلاپ تاۋىپ جاتقانداردىڭ» بارىن جوققا شىعارمايىق. مۇنداي مىسالداردى كوپتەپ كەلتىرۋگە بولادى. بەلگىلى انشىلەردىڭ دە «جاڭا سوزدەرى» جەتەرلىك.
كوگىلدىر ەكراندا اڭداماي سويلەپ, بىراق ەشتەڭە بولماعانداي جۇرە بەرەتىندەر ۇشىراسادى. ءتىپتى, ولاردىڭ قاتارى ءبىرشاما دەسەك, قاتەلەسە قويماسپىز. جۋىردا ۇلتتىق ارنادان بەرىلەتىن «بىلگىرلەر وتاۋى» زياتكەرلىك باعدارلاماسىن كورگەنبىز. سوعان قاتىسقان ەلدىڭ اۋزىندا جۇرگەن انشىلەر «قازاقتىڭ مىڭ ءانىن» زەرتتەۋشى كىم ەكەنىن بىلمەي, ماسقارا بولعانى بار. ونى ساحنا ساڭلاقتارى بىلمەسە, باسقالارعا نە جورىق؟! ءبىر قىزىعى, وسىعان ۇيات, اعات بولدى-اۋ دەپ تۇرعان ولار جوق. ءانشىلەر ءۇشىن بۇل قالىپتى قۇبىلىسقا اينالعانعا ۇقسايدى.
راسىندا, كوركەم ادەبيەتتى بىلاي قويعاندا, كۇندەلىكتى گازەت-جۋرنالداردى وقىپ تۇراتىن ونەرپازدار دا سيرەك. جاسىراتىن نەسى بار, ەل جاڭالىقتارىنان دا بەيحابار. ول ءسوز ساپتاۋىنان بايقالىپ قالادى.
ەل الدىندا جۇرگەن تانىمال تۇلعالاردى مىنەپ-سىناۋ ويىمىزدا جوق. ولاردى ساۋاتسىزداردىڭ قاتارىنا قوسۋدان دا اۋلاقپىز. ويتكەنى, بۇل اقىلدى ادامنىڭ ءىسى ەمەس. ايتسە دە, ولارعا قاراپ مىڭداعان جاس ۇرپاقتىڭ ءوسىپ كەلە جاتقانىن ۇمىتپاسا ەكەن دەيمىز.
ايبەك تاسقالي.
اقتوبە.