قان اينالىم جۇيەسى اۋرۋلارى تۋرالى نە بىلەسىز؟

بۇگىنگى تاڭدا قان اينالىمى جۇيەسىندەگى اۋرۋلار سىرقاتتانۋدىڭ جالپى قۇرىلىمىندا جانە ادام ءولىمى بويىنشا ءبىرىنشى ورىندا تۇر. دۇنيەجۇزىلىك دەنساۋلىق ساقتاۋ ۇيىمىنىڭ الدىن الا جاريالاعان دەرەكتەرىنە  سۇيەنسەك,  2030 جىلعا قاراي الەمدە شامامەن 23,6 ميلليون ادام جۇرەك-قان تامىرى جۇيەسى دەرتىنەن, ەڭ باستىسى, جۇرەك اۋرۋلارى مەن ينسۋلتتان قايتىس بولۋى مۇمكىن. ايتا كەتەيىك, اۋرۋدىڭ باستى سەبەبى جۇرەك جانە قان جۇرەتىن تامىر جۇمىسىنىڭ بۇزىلۋىنان تۋىندايدى. دەسە دە, سالاماتتى ءومىر ءسۇرۋ سالتىن قالىپتاستىرا وتىرىپ, ونىڭ الدىن الۋعا بولادى. قازاقستان رەسپۋبليكاسىنىڭ دەنساۋلىق ساقتاۋ مينيسترلىگى پاتولوگيادان بولاتىن ءولىم-ءجىتىم كورسەتكىشىن تومەندەتۋ ماقساتىندا ءبىرتالاي جۇمىستار اتقارۋدا. جاسى 40-تان اسقان تۇرعىنداردى سكرينينگتىك زەرتتەۋلەردەن وتكىزۋ, ازاماتتاردى دارىلىك زاتتارمەن تەگىن قامتاماسىز ەتۋ, دياگنوستيكا مەن ەمدەۋدىڭ جوعارى تەحنولوگيالىق ادىستەرىن قولدانۋ  وڭتايلى ناتيجەلەرىن بەرۋدە. اۋرۋدى ەرتە انىقتاۋ جانە جوعارى تەحنولوگيالاردى ەنگىزۋ ناتيجەسىندە 2013 جىلى قان اينالىم جۇيەسى اۋرۋلارىنان بولاتىن ءولىم-ءجىتىم 14 پايىزعا تومەندەدى. «سالاماتتى قازاقستان» مەملەكەتتىك باعدارلاماسى ىسكە اسىرىلا باستاعان 3 جىل ىشىندە اۋرۋدىڭ بۇل تۇرىنەن بولاتىن ءولىم-ءجىتىم 2 ەسە ازايدى. ەلىمىزدىڭ بارلىق وڭىرلەرىندە كارديولوگيالىق ورتالىقتار, ال مي ينسۋلتى بار ناۋقاستارعا كەشەندى ەمدەۋ شارالارىن ۇيىمداستىرۋ ماقساتىندا قازاقستاننىڭ تۇكپىر-تۇكپىرىندە 40 ينسۋلت ورتالىعى اشىلدى. جىل سايىن قازاقستاندا شامامەن 60 مىڭ ينتەر­ۆەنتسيالىق ارالاسۋ مەن كارديولوگيالىق وتا (ونىڭ ىشىندەگى 11 مىڭى اشىق جۇرەككە) جاسالادى. دارىگەر-تەراپەۆت, جالپى, تاجىريبەلىك دارىگەرلەر, كارديولوگتار مەن كارديوحيرۋرگتاردىڭ بىلىكتىلىكتەرىن ارتتىرۋ بويىنشا جۇمىستار جالعاستىرىلۋدا. مەديتسينالىق كومەكتىڭ ساپاسى مەن تيىمدىلىگىن ودان ءارى ارتتىرۋ ماسەلەلەرىندەگى باستى باعىتتىڭ ءبىرى – دەنساۋلىق ساقتاۋ ۇدەرىسىن ستاندارتتاۋ. «حالىق دەنساۋلىعى جانە دەنساۋلىق ساقتاۋ جۇيەسى تۋرالى» قازاقستان رەسپۋبليكاسىنىڭ كودەكسىندە دەنساۋلىق ساقتاۋ سالاسىنداعى ستاندارتتاۋ ۇعىمىنا – دەنساۋلىق ساقتاۋ سالاسىنداعى ستاندارتتاۋ – ستاندارتتار, تالاپتار, نۇسقاۋلىقتار, قاعيدالاردى ازىرلەۋ, ەنگىزۋ, ءارى ولاردىڭ ساقتالۋىن قامتاماسىز ەتۋ ارقىلى ۇردىستەردىڭ, مەديتسينالىق تەحنولوگيالار مەن كورسەتىلەتىن قىزمەتتەردىڭ سيپاتتامالارىن رەتكە كەلتىرۋدىڭ وڭتايلى دارەجەسىنە قول جەتكىزۋگە باعىتتالعان قىزمەت دەپ انىقتاما بەرىلگەن. سونداي-اق, دەنساۋلىق ساقتاۋدى دامىتۋ رەسپۋبليكالىق ورتالىعى كارديولوگيا جانە كارديوحيرۋرگيا سالاسىنداعى جەتەكشى ماماندارمەن بىرلەسىپ,  حالىققا كارديولوگيالىق جانە كارديوحيرۋرگيالىق كومەك كورسەتۋدى ۇيىمداستىرۋ ستاندارتىن ازىرلەدى. باستى ماقسات – دەنساۋلىق ساقتاۋ سالاسىنداعى قىزمەتتەردىڭ ساپاسى مەن قولجەتىمدىلىگىن ارتتىرۋ. ستاندارتتا كارديولوگيالىق جانە كارديوحيرۋرگيالىق اۋرۋلارى بار پاتسيەنتتەرگە, سونداي-اق, جۇكتى ايەلدەر مەن جاڭا تۋعان نارەستەلەرگە, ت.ب. مەديتسينالىق-سانيتاريالىق العاشقى كومەك, جوعارى مامانداندىرىلعان  مەديتسينالىق كومەك كورسەتۋدىڭ ءتارتىبى مەن شارتتارى جازىلعان. دەنساۋلىق ساقتاۋدى ستاندارتتاۋ ەلىمىزدەگى مەدي­تسينالىق كومەك كورسەتۋدىڭ حالىقارالىق ستاندارتتارىنا بارىنشا جاقىنداتىپ, دەنساۋلىق ساقتاۋ سالاسىن دامىتۋعا, ءولىم-ءجىتىم كورسەتكىشىن تومەندەتۋگە مۇمكىندىك بەرەدى. جازيرا  يمانوۆا, دەنساۋلىق ساقتاۋدى دامىتۋ رەسپۋبليكالىق ورتالىعى  دەنساۋلىق ساقتاۋ ستاندارتتارىن ازىرلەۋ ءبولىمىنىڭ باسشىسى.