ايتۋلى كۇننىڭ اۋقىمدى شاراسى

ەلوردادا «تۇركى جازۋى كۇنى» اتتى حالىقارالىق فورۋم وتكىزىلۋدە. تۇركى اكادەمياسى ۇيىمداستىرىپ وتىرعان ۇلكەن عىلىمي جيىنعا تۇركيا, ازەربايجان, قىرعىزستان, رەسەي جانە وزگە دە تۇركىتەكتەس ەلدەردەن كورنەكتى عالىمدار مەن قوعام قايراتكەرلەرى, دەپۋتاتتار مەن ديپلوماتتار قاتىسۋدا.

بىلتىر ءماجىلىستىڭ الەۋمەتتىك-مادەني دامۋ كوميتەتىنىڭ ءتورايىمى داريعا نازارباەۆانىڭ توراعالىعىمەن كوميتەتتىڭ كوشپەلى وتىرىسى ءوتىپ, وندا 18-ءشى مامىردى تۇركى جازۋى كۇنى رەتىندە بەلگىلەۋ تۋرالى ۇسىنىس جان-جاقتى قارالعان بولاتىن. ناتيجەسىندە ءماجىلىس ماقۇلداعان ۇسىنىستى, ۇكىمەت قوشتاپ, 18-ءشى مامىر «تۇركى جازۋىنىڭ كۇنى» رەتىندە بەلگىلەندى. ەندىگى جەردە بۇل كۇن ەلىمىزدىڭ اتاۋلى مەرەكەلەرىنىڭ قاتارىنان ورىن الماق. سوعان وراي بيىل تۇڭعىش رەت حالىقارالىق اۋقىمدا جيىن وتكىزىلۋدە. پرەمەر-ءمينيستردىڭ ورىنباسارى گ.ءابدى­حالىقوۆا قاتىسىپ, ءسوز سويلەگەن جيىننىڭ پلەنارلىق ماجىلىسىنەن سوڭ عالىمدار «تۇركى جازۋى: وتكەنى, بۇگىنى جانە بولاشاعى», سونىمەن قاتار, «ورتاق تاريح: تەوريالىق-مەتودولوگيالىق ماسەلەلەرى» اتتى سەكتسيالار بويىنشا باياندامالار جاساپ, پىكىر الىستى. فورۋم جۇمىسى بۇگىن دە جالعاسادى. بۇگىن تۇركى اكادەمياسى, رەسەي عىلىم اكادەمياسى ۋفا عىلىمي ورتالىعىمەن مەموراندۋمعا قول قويماق. سونداي-اق, جيىن شەڭبەرىندە تۇركى اكادەمياسىنىڭ شىعارعان ەڭبەكتەرىنىڭ تانىستىرىلىمىن وتكىزۋ دە جوسپارلانىپ وتىر. ايگۇل سەيىلوۆا, «ەگەمەن قازاقستان».