شەكارانىڭ ارعى بەتىنەن اعىلىپ كەلىپ جاتقان جاستار ءنوپىرىنىڭ 80 پايىزى وڭىردە كوپ تۇراقتامايدى. رەسەيدەگى ءىشىنارا موبيليزاتسيادان باس ساۋعالاعانداردىڭ دەنى قوستاناي ارقىلى استانا مەن الماتىعا ءوتىپ, ودان ءارى مۇمكىندىگىنشە ازەربايجان, تۇركيا سياقتى شەت ەلدەرگە كەتكىسى كەلەدى. جەرگىلىكتى كوشى-قون پوليتسياسىنىڭ مالىمەتىنشە, 25 قىركۇيەكتەگى جاعداي بويىنشا, وبلىس اۋماعىنا 10 مىڭ 329 ادام كىرگەن. شەكاراداعى جولاۋشىلار اعىنى وتكەن جىلعى وسى كەزەڭمەن سالىستىرعاندا ەكى ەسە وسكەن.
وبلىستىق كوشى-قون قىزمەتى باسقارماسىنىڭ باسشىسى, پوليتسيا پولكوۆنيگى قايرات دۇتپاەۆتىڭ ايتۋىنشا, سىرتتان كەلگەندەردىڭ قايدا بارىپ, قايدا تۇراقتاپ جاتقانىن قۇزىرلى ورگاندار قاتاڭ باقىلاپ وتىر. وڭىرگە كەلىپ جاتقان رەسەي ازاماتتارىنىڭ قۇجاتتارى دا زاڭ تالاپتارىنا ساي. بۇگىنگە دەيىن ولاردىڭ ەشبىرى نە اكىمشىلىك, نە قىلمىستىق جاۋاپكەرشىلىككە تارتىلماعان.
– رەسەيدەن كەلىپ جاتقانداردىڭ 80-90 پايىزى – وكپەك جولاۋشىلار. كوبى قوستانايعا كوپ ايالداماي, ۇلكەن قالالارعا ءوتىپ كەتىپ جاتىر. سوندىقتان ءبىز بۇل جەردەن الاڭدايتىنداي ۇلكەن ءبىر ماسەلە كورىپ تۇرعان جوقپىز. قازىرشە سىرتتان كەلگەندەردىڭ ەشقايسى وڭىردە ۋاقىتشا تۇرۋعا رۇقسات بەرەتىن ىقتيارحات الامىن دەپ ارىز بەرگەن جوق. بۇل قۇجاتتى بىرنەشە كۇننىڭ ىشىندە الۋ مۇمكىن ەمەس. ىقتيارحات الۋ ءۇشىن سول ازاماتتىڭ بۇرىن-سوڭدى سوتتالماعانى تۋرالى انىقتاما قاجەت. بۇل انىقتامانىڭ ەلەكتروندى نۇسقاسى جارامايدى. بىزگە رەسەي فەدەراتسياسىنىڭ گەربتى ءمورى باسىلعان قاعاز تۇرىندەگى انىقتاما كەرەك. مۇنىڭ سىرتىندا, بەيرەزيدەنتتىڭ جسن-ءى, مەديتسينالىق كوميسسيانىڭ قورىتىندىسى, تاعى دا باسقا بىرقاتار قۇجات اكەپ تاپسىرۋعا ءتيىس, – دەدى كوشى-قون باسقارماسىنىڭ باسشىسى.
وبلىستىق پد كوشى-قون قىزمەتى ءبولىمىنىڭ باسشىسى گۇلجانات كۇدەباەۆانىڭ ايتۋىنشا, ەۋرازيالىق ەكونوميكالىق وداققا مۇشە ەلدەردىڭ ازاماتتارىن تىركەۋگە قويۋ مىندەتى قابىلداۋشى تاراپقا جۇكتەلگەن. ياعني قوناقۇي, حوستەلدەردىڭ يەلەرى, سونداي-اق پاتەرىن جالعا بەرىپ وتىرعان جەكە ازاماتتار ءۇش تاۋلىكتىڭ ىشىندە پوليتسياعا eQonaq قوسىمشاسى ارقىلى نەمەسە جازباشا تۇردە ءوز يەلىگىندەگى مەكەنجايعا شەتەلدىك ازامات كەلىپ ورنالاسقانى تۋرالى حابار جىبەرۋى مىندەت. بۇلاي بولماعان جاعدايدا, قابىلداۋشى تاراپ اكىمشىلىك جاۋاپقا تارتىلادى.
قوستانايداعى حالىققا قىزمەت كورسەتۋ ورتالىعى ديرەكتورىنىڭ ورىنباسارى شىڭعىس اشىربەكوۆتىڭ سوزىنشە, «ازاماتتارعا ارنالعان ۇكىمەتكە» جۇگىنگەن شەتەلدىكتەردىڭ 99 پايىزى جسن رەسىمدەتىپ جاتىر.
– ءبىر كۇندە شامامەن 300 ادامدى قابىلدايمىز. جەرگىلىكتى تۇرعىندار ۇزىن-سونار كەزەكتە تۇرىپ قالماۋ ءۇشىن رەسەيلىك ازاماتتاردى گاشەك كوشەسىندەگى «ازاماتتارعا ارنالعان ۇكىمەت» ورتالىعىندا جەكە قابىلداپ جاتىرمىز, – دەدى ش.اشىربەكوۆ.
قوستاناي وبلىسى