«التەل» كومپانياسى 4G LTE GSM جەلىسىن ىسكە قوستى. ول سمارتفوندا LTE تەحنولوگياسى بويىنشا جوعارى جىلدامدىقتا دەرەكتەر بەرۋدى پايدالانۋعا مۇمكىندىك بەرەدى, سونداي-اق, داۋىستى قوڭىراۋلار اۆتوماتتى تۇردە GSM/UMTS جەلىسىنە كوشىرىلەتىن بولادى.
«ايشىلىق الىس جەرلەردەن كوزدى اشىپ-جۇمعانشا, جىلدام حابار العىزعان» قازىرگى زاماندا ەڭبەكتەگەن بالادان, ەڭكەيگەن قارياعا دەيىن ۇيالى تەلەفون ۇستايتىن بولعان. ال سول ۇيالى تەلەفون بۇگىندە سويلەسۋ عانا ەمەس, اقپارات الماسۋدىڭ بارلىق مۇمكىندىگىن جۇزەگە اسىراتىن ەرەكشە قۇرالعا اينالىپ وتىر. وعان تەلەفوندا ورنالاسقان سيمكارتا (چيپ) مۇمكىندىك بەرەدى. ياعني, سول كىشكەنتاي چيپ ارقىلى عالامتورعا قوسىلا الامىز. ءيا, قارىشتاپ كەتكەن اقپاراتتىق تەحنولوگيا عاسىرىنىڭ عاجايىبى كوپ-اق. ال ونىڭ ءبارى جوعارىدا اتالعان وسىنداي كومپانيالاردىڭ جەتىستىكتەرىنىڭ ناتيجەسىندە جۇزەگە اسۋدا. «التەل» كومپانياسى ۇسىنىپ وتىرعان 4G LTE GSM جەلىسى, مىنە, وسى ينتەرنەت الەمىنە ەركىن ەنىپ, ەلىمىزدىڭ كەز كەلگەن تۇكپىرىندە وتىرىپ-اق ساپالى ءارى ارزان بايلانىس ورناتۋعا مۇمكىندىك بەرمەك. اتاپ ايتار بولساق, قازاقستاندا تۇڭعىش رەت الماتى, استانا, قاراعاندى, اقتوبە, اتىراۋ, اقتاۋ, شىمكەنت, وسكەمەن قالالارىندا 4G/3G/2G تەحنولوگيالارىن ءبىر مەزگىلدە قولداي الاتىن كونۆەرگەنتتى جەلى تارماقتالىپ وتىر. التەل اعىمداعى جىلدىڭ قىركۇيەگىندە رەسپۋبليكانىڭ بارلىق وبلىس ورتالىقتارىن جەلىمەن قامتيدى. 2014 جىلدىڭ سوڭىنا قاراي LTE/UMTS/GSM تەحنولوگياسى نەگىزىندەگى بايلانىس قازاقستاننىڭ حالىق سانى 50 000 ادامنان اساتىن بارلىق قالالارىندا ىسكە قوسىلاتىن بولادى.
«التەل» كومپانياسى 4G LTE GSM جەلىسىن ىسكە قوسۋ وتكەن اپتادا استاناداعى «ءرىxos» قوناق ۇيىندە سالتانتتى تۇردە اتالىپ ءوتىلدى. وعان بايلانىس جانە اقپارات اگەنتتiگiنىڭ توراعاسى اسقار جۇماعاليەۆ قاتىسىپ, ءسوز سويلەدى. ول جەلىنىڭ ىسكە قوسىلۋى ەلىمىز ءۇشىن ۇلكەن جاڭالىق ەكەنىن ايتا وتىرىپ, بۇل كورسەتiلەتiن قىزمەت ساپاسىن ارتتىرىپ, تاريفتەردi تومەندەتۋگە ىقپال ەتەتىنىن اتاپ ءوتتى. «اتالمىش تەحنولوگيانىڭ ەرەكشەلiگi – كەڭ جولاقتى موبيلدi ينتەرنەت جىلدامدىعى 3G تەحنولوگياسىنا قاراعاندا ونداعان ەسە ارتىق. بۇل – بۇگiنگi كۇنi وتە ماڭىزدى. سەبەبi, قازاقستان حالقى جاقسى ينتەرنەت پايدالانۋعا ۇيرەنiپ العان. ولار جىلدامدىقتىڭ ودان دا جوعارى بولعانىن قالايدى», دەدi ا.جۇماعاليەۆ. سونداي-اق, ول سوڭعى جىلدارى ەلىمىزدە ۇيالى بايلانىس سالاسىندا ورىن العان وڭ وزگەرىستەرگە توقتالدى. «قىزمەت باعاسى بىرنەشە ەسە ارزاندادى, ءليميتسىز تاريفتەر ۇسىنىلا باستادى, ينتەركوننەكت مولشەرلەمەسى 40-45 پايىزعا تومەندەدى, سەكۋندتىق تاريفتەۋگە تولىق كوشتىك, 3G جانە 4G بايلانىس قىزمەتتەرى ەنگىزىلدى. نارىققا ءتورتىنشى GSM-وپەراتورىنىڭ كەلۋى بايلانىس سالاسىنداعى ماڭىزدى وقيعالاردىڭ ءبىرى. ال مىنا جاڭا جەلى اتالعان سالاداعى باسەكەلەستىكتىڭ ارتۋىنا, قىزمەت ساپاسىنىڭ جاقسارۋىنا, ءتاريفتىڭ تومەندەۋىنە ىقپال ەتەدى», دەدى اگەنتتىك باسشىسى. سونىمەن قاتار, كەلەسى جىلى بايلانىس وپەراتورىن اۋىستىرۋ كەزىندە تەلەفون ءنومىرىن وزگەرتپەۋگە مۇمكىندىك بەرەتىن جاڭا قىزمەت سىناقتان وتكىزىلەتىنى ايتىلدى. جاڭا قىزمەتتى ىسكە قوسۋ «اقپاراتتىق قازاقستان – 2020» باعدارلاماسىنا ەنگىزىلگەن. بۇل قىزمەت ءموبيلدى بايلانىس نارىعىنداعى باسەكەلەستىكتى دامىتۋعا كەزەكتى رەت ىقپال ەتپەك.
«ابونەنتتىڭ تەلەفون ءنومىرىن اۋىستىرماي كەلەسى ءبىر وپەراتورعا اۋىسا الاتىنىن ەسكەرسەك, كومپانيالار اراسىندا كليەنت ءۇشىن تالاستىڭ كۇشەيە تۇسەتىنى بەلگىلى. بۇل كەزدە تاريف مولشەرى مەن قىزمەت ساپاسىنا باسىمدىق بەرىلەتىن بولادى», دەيدى ا. جۇماعاليەۆ. اتاپ ايتقاندا, ۆەدومستۆو تاراپىنان 2014 جىلى استانا مەن الماتى قالالارىندا ۇيالى بايلانىس جەلىلەرىنىڭ قولجەتىمدىلىگىنە, داۋىس دىبىستارىنىڭ بەرىلۋ ساپاسىنا كەزەكتى رەت تالداۋ جۇمىستارى جۇرگىزىلۋدە. «تالداۋ ناتيجەسىنە سايكەس, بايلانىس وپەراتورلارىنا بازالىق ستانتسيالاردىڭ سانىن كوبەيتۋ, ۇسىنىلىپ وتىرعان قىزمەت ساپاسىن جاقسارتۋ, جەلىلەردى رەتكە كەلتىرۋ سەكىلدى ءوز ۇسىنىستارىمىزدى بەرەتىن بولامىز. بۇعان قوسا, «اكىمشىلىك قۇقىق بۇزۋشىلىق تۋرالى قازاقستان رەسپۋبليكاسى كودەكسىنىڭ جاڭا رەداكتسياسى جوباسىنا پايدالانۋشىلارعا بايلانىس قىزمەتىن ۇسىنىپ وتىرعان بايلانىس وپەراتورلارىن جاۋاپكەرشىلىككە تارتاتىن نورما ەنگىزدىك. جوعارىدا ايتىپ وتكەن شارالاردىڭ بارلىعى بايلانىس سالاسىنىڭ دامۋىنا وڭ اسەر ەتەدى دەگەن سەنىمدەمىن», دەپ ءتۇيدى اگەنتتىك توراعاسى.
ال «التەل» اق باسقارما توراعاسى ماقسۇت ساۋرانبەكوۆتىڭ ايتۋى بويىنشا, جاڭا وپەراتوردىڭ باستى ارتىقشىلىعىنىڭ ءبىرى جەتەكشى ۇتقىر وپەراتورلاردىڭ الەمدىك تاجىريبەسى نەگىزىندە ازىرلەنگەن بىرەگەي تاريفتىك جوسپارلار توپتاماسىن ۇسىنۋى بولماق. «التەل تاريفتەرى تۇبەگەيلى تىڭ ۇسىنىس بولىپ تابىلادى, ءبىز بونۋس رەتىندە جەلى ىشىندە داۋىس قىزمەتتەرىن تەگىن ۇسىنا وتىرىپ, ينتەرنەتكە قاتىناۋعا عانا تولەم جاساۋدى ۇسىنامىز», دەدى م.ساۋرانبەكوۆ.
وزىق تەحنولوگيالار مەن جابدىقتارعا نەگىزدەلگەن مۋلتيتەحنولوگيالىق جەلى بىرقاتار يننوۆاتسيالىق فۋنكتسيالار مەن ازىرلەمەلەردى پايدالانۋ مۇمكىندىگىن ۇسىنادى. وسىلايشا, التەل GSM/UMTS جەلىسى جۇمىس ىستەيتىن ايماقتاردا ابونەنتتەرگە «HD-voice» تەحنولوگياسى قولجەتىمدى بولىپ وتىر. تەحنيكالىق جاعىنان العاندا سالىنعان جەلى VoLTE تەحنولوگياسى بويىنشا LTE ۇستەمە داۋىس قىزمەتتەرىن ۇسىنۋ جانە LTE Advanced 4-ءشى بۋىن جەلىلەرى دامۋىنىڭ كەلەسى قادامىن ىسكە اسىرۋ ءۇشىن دايىندالعان.
وزدەرىڭىزگە بەلگىلى, التەل – «قازاقتەلەكوم» اق ەنشىلەس كومپانياسى. ول قازاقستان اۋماعىندا 1994 جىلى ءبىرىنشى بولىپ ۇتقىر بايلانىس قىزمەتىن كورسەتۋدى باستاعان. ءيا, بۇل – العاشقى ۇلتتىق ۇيالى بايلانىس وپەراتورى.
قازاقستانداعى تۇڭعىش ۇيالى تەلەفوندار وسى جەلى ارقىلى بايلانىسقا شىققان بولاتىن. التەل دەرەكتەر بەرۋ جەلىسى «قازاقتەلەكوم» اق وپتيكالىق جەلىسىنە نەگىزدەلگەن جانە IP تەحنولوگياسىمەن سالىنعان تىرەك جەلىنى پايدالانادى. بۇل جەلى سىيىمدىلىعى مەن دەرەكتەر بەرۋ جىلدامدىعى تۇرعىسىنان ايتارلىقتاي ارتىقشىلىقتار بەرەدى.
4G LTE GSM جەلىسىن ىسكە قوسۋ سالتاناتىندا «قازاقتەلەكوم» اق باسقارما توراعاسى قۋانىشبەك ەسەكەەۆ تە قاتىسىپ, كومپانيا جۇمىسىنا ساتتىلىك تىلەدى. ول ەكى وپەراتوردىڭ ىقپالداسقان قىزمەتى جايلى ايتا كەلە, «بۇل دەگەنىمىز ۇتقىر جانە تىركەلگەن بيزنەس مۇمكىندىكتەرىن بىرىكتىرۋ, ول كونۆەرگەنتتى ونىمدەردى, ونىڭ ىشىندە Quadroplay نارىققا شىعارۋعا مۇمكىندىك بەرەدى», دەپ اتاپ كورسەتتى.حالىققا جاڭا قىزمەت تۇرلەرiن كورسەتەتiن ۋاقىت كەلiپ جەتتى. بiزدiڭ كومپانيا بۇل نارىقتا كوشباسشىلار قاتارىنان كورiنەدi دەپ ۇمiتتەنەمiز. بۇل – بiز ءۇشiن ۇلكەن قادام», دەدi «قازاقتەلەكوم» اق باسقارما توراعاسى ق.ەسەكەەۆ.
«التەل» اق وتكەن جىلى ەلىمىزدىڭ اقتاۋ, اقتوبە, اتىراۋ, قاراعاندى, وسكەمەن جانە شىمكەنت قالالارىندا قامتۋ اۋماعىن كەڭەيتۋ جانە جاڭا بۋىننىڭ دەرەكتەردى جىبەرۋدىڭ LTE 4G جەلىسىن كوممەرتسيالىق پايدالانۋعا ىسكە قوسقان بولاتىن. ال استانا جانە الماتى قالالارىندا LTE 4G ءموبيلدى جەلىسى 2012 جىلعى جەلتوقساندا كوممەرتسيالىق پايدالانۋعا بەرىلدى, ال 2013 جىلعى IV توقسانىندا الماتىنىڭ ەسىك, قاسكەلەڭ, قاپشاعاي, تالعار, شامالعان سەكىلدى كورشىلەس قالالارىندا جانە قوسىمشا الماتى وبلىسىنىڭ 30 ەلدى مەكەنىندە قولجەتىمدى بولدى. مۇنىڭ ءبارى قازاقستان پرەزيدەنتىنىڭ تاپسىرماسىن ورىنداۋ ماقساتىندا جانە كەڭجولاقتى دەرەكتەر بەرۋدى ستراتەگيالىق دامىتۋ باعدارلاماسىن ىسكە اسىرۋ اياسىندا ىسكە قوسىلدى.
LTE 4G دەگەنىمىز دەرەكتەر بەرۋ جىلدامدىعىن 100 مبيت/س دەيىنگى جانە ودان دا جوعارى دياپازوندا (LTE Advance) قولداي الاتىن ۇتقىر بايلانىس تەحنولوگياسى. بۇل الدىڭعى بۋىن جەلىلەرىندە قولجەتىمدى بولماعان مۇلدەم جاڭا سەرۆيستەردىڭ جۇمىس ىستەۋىنە مۇمكىندىك بەرەدى. LTE جەلىسىن الەمنىڭ 100-دەن اسا ەلىندە 288 ۇتقىر وپەراتور ىسكە قوسقان جانە ونى پايدالانۋشىلاردىڭ جالپى سانى الەمدە 200 ملن. ابونەنتتەن اسىپ جىعىلادى.
LTE 4G جاعدايىندا جەكە پايدالانۋشىلار ءۇشىن كوپ پايدالانىلاتىن ونلاين ويىندارعا قاتىسۋ, سانالى سەكۋندتاردا ۇلكەن كولەمدى فوتو, اۋديو جانە بەينە كونتەنتتى جۇكتەۋ, HD فورماتىندا سۇراتۋ بويىنشا فيلمدەردى كورۋ جانە تاعى باسقالارى قولجەتىمدى بولادى. مەملەكەتتىك جوبالار اياسىندا LTE تەحنولوگياسى جوعارى جانە ورتا وقۋ ورىندارىندا ەلەكتروندى ءبىلىمدى, دەنساۋلىق ساقتاۋ, كولىك جانە لوگيستيكا سالاسىندا جوبالاردى كەڭ ەنگىزۋگە مۇمكىندىك بەرەدى.
«ەل تۇرعىندارى LTE جەلىسىن كوممەرتسيالىق پايدالانا باستاعانمەن بىرگە, ەڭ زاماناۋي LTE جابدىعى 4G USB-مودەمدەرى جانە 4G Wi-Fi روۋتەرلەرى, سونىمەن قاتار, ALTEL 4G تاريفتىك جوسپارلارى قولجەتىمدى بولدى. ەندى مىنە 4G LTE GSMجەلىسىن يگەرىپ وتىرمىز. بۇل – ۇلكەن جەتىستىك», دەيدى «التەل» اق كوممەرتسيالىق ديرەكتورى يرينا ساۆينا.
وتكەنگە ءسال شەگىنىس جاساساق, «التەل» كومپانياسى 2003 جىلدىڭ جەلتوقسان ايىنان باستاپ ساۋدا كوممەرتسيالىق پايدالانۋعا ۇيالى بايلانىس قىزمەتى مەن سىمسىز ينتەرنەتكە قول جەتكىزۋ مۇمكىندىگىن ۇسىنۋشى ءۇشىنشى بۋىن تەحنولوگياسى – CDMA 2000-1ح-ءتى ىسكە قوسقان ەدى. ال CDMA ستاندارتى سولتۇستىك امەريكا, وڭتۇستىك-شىعىس ازياداعى سىمسىز بايلانىس نارىعىندا باسىم.
«التەل» قازاقستاندا 3G ۇتقىر جىلدامدىقتى ينتەرنەتىنىڭ قىزمەتىن دە ءبىرىنشى بولىپ ىسكە قوستى. 2010 جىلعى 29 ناۋرىزدان باستاپ ينتەرنەت جەلىسىنە جوعارى جىلدامدىقتى سىمسىز قاتىناۋدى ۇسىناتىن ءۇشىنشى بۋىننىڭ تەحنولوگياسى كوممەرتسيالىق پايدالانۋىنا ىسكە قوسىلدى. بۇل ابونەنتتەرگە كەز كەلگەن ۋاقىتتا جانە كەز كەلگەن جەردە ينتەرنەتتى جەڭىل جانە ىڭعايلى پايدالانۋعا مۇمكىندىك بەردى.
قازىرگى تاڭدا «التەل» كومپانياسى نارىقتا ءتورت برەندتى ۇسىنادى.
ولاردىڭ ءبىرى – Dalacom. بۇل قولدانىسقا 2003 جىلى 10 جەلتوقساندا ەندى. Dalacom قىزمەتى «postpaid» قاعيداتى بويىنشا ۇسىنىلادى. مۇنداي ەسەپتەۋ تارتىبىمەن ابونەنت بايلانىس قىزمەتىن نەسيەگە الىپ قولدانىپ, ولاردى ەسەپ مەرزىمىندە تولەۋى مۇمكىن. ۇيالى بايلانىس وپەراتورى ابونەنتكە اي سايىن قولدانىستاعى تاريفتەرگە سايكەس شوت شىعارادى. ال ەكىنشىسى – PAThWORD. ول قولدانىسقا 2004 جىلى 13 اقپاندا ەندى. مۇنى سەرپىندى جانە تولىققاندى ءومىر سۇرەتىن, ىسكەر ادامدارعا ارنالعان بايلانىس دەسەك بولاتىنداي. قىزمەت «prepaid» قاعيداتى بويىنشا ۇسىنىلادى. وسى ەسەپتەۋ ءتارتىبى بويىنشا ابونەنت ۇيالى بايلانىس قىزمەتىن وپەراتوردىڭ شوتىنا ۇيالى بايلانىس قىزمەتىنە جەتكىلىكتى اقشا قاراجاتى تۇسكەننەن كەيىن عانا قولدانا الادى. ءۇشىنشىسى – City. ءوز ابونەنتتەرىنە قالالىق ءنومىردى قولدانا وتىرىپ ۇيالى بايلانىس قىزمەتىن ۇسىناتىن, قازاقستان نارىعىنا 2006 جىلدىڭ جەلتوقسان ايىندا شىعارىلعان جاڭا جوبا. City ابونەنتتەرى Dalacom/PAThWORD نومىرلەرىنە, باسقا ۇيالى بايلانىس وپەراتورلارىنىڭ نومىرلەرىنە, سونىمەن قاتار, قالالىق ءنومىرلەرگە قوڭىراۋ شالا الادى. وعان قوسا, City نومىرىنەن قالالىق تەلەفوندارعا جانە قالالىق تەلەفونداردان City نومىرىنە جاسالعان قوڭىراۋلار تەگىن بولىپ تابىلادى. قىزمەتتىڭ ارتىقشىلىعى بولىپ تابىلاتىنى ونىڭ جەلى ايماعىندا بولعان جاعدايدا قالالىق قوڭىراۋلاردى ۇنەمدەۋ مۇمكىندىگى. مۇندا دا قىزمەت «prepaid» قاعيداتى بويىنشا ۇسىنىلادى. وسى ەسەپتەۋ ءتارتىبى بويىنشا ابونەنت ۇيالى بايلانىس قىزمەتىن وپەراتوردىڭ شوتىنا ۇيالى بايلانىس قىزمەتىنە جەتكىلىكتى اقشا قاراجاتى تۇسكەننەن كەيىن عانا قولدانا الادى. ءتورتىنشىسى – JET. وپەراتوردىڭ قامتۋ جەلىسىندە كەز كەلگەن جەردە كەز كەلگەن ۋاقىتتا قوسىلۋدى قامتاماسىز ەتەتىن, ينتەرنەتكە جوعارى جىلدامدىقپەن ۇتقىر قاتىناۋدى بىرىكتىرەتىن قىزمەتتەر جيىنتىعى.
بۇگىندە بۇل ءتورت بايلانىستىڭ قولدانىس كوكجيەگى كەڭەيىپ كەلەدى. وعان بايلانىس قۇنىنىڭ ارزاندىعى مەن قىزمەت ساپاسىنىڭ ارتۋى سەبەپ بولسا كەرەك. ال بايلانىس وپەراتورلارى نەعۇرلىم كوپ ابونەنت جيناسا, سولعۇرلىم دامىپ, ولاردىڭ ودان ءارى ساپالى بولا تۇسۋىنە مۇمكىندىگى ارتا بەرەرى ءسوزسىز. الايدا, بۇگىندە ەل ازاماتتارىنىڭ كوپشىلىگى وزدەرىنىڭ ۇيرەنىسىپ قالعان بايلانىس تۇرلەرىنەن اجىراعىسى كەلمەيتىنىن بىلەمىز. بىراق, قازىر باسەكەلەس زامانى, تاڭداۋ قاشان دا بار. سوندىقتان كەز كەلگەن تۇتىنۋشى اركەز بارلىق مۇمكىندىكتەردى سالىستىرىپ كورىپ جاتسا, قۇبا-قۇپ بولار ەدى.
«التەل» اق باسقارما توراعاسى ماقسۇت ساۋرانبەكوۆ 4G LTE GSM جەلىسىن ىسكە قوسۋ سالتاناتىندا سويلەگەن ءسوزىنىڭ تۇيىنىندە: «التەل 20 جىل بۇرىنعىداي كەزەكتى تەحنولوگيالىق پروگرەستى بۇزىپ-جارىپ, العا شىقتى. ءبىزدىڭ جەلى ءبىر-بىرىنەن مىڭداعان شاقىرىم الىس جاتقان ادامداردىڭ دوستىق قارىم-قاتىناسىن شەكسىز جالعايدى. ءموبيلدى تەحنولوگيالاردىڭ ەڭ ماڭىزدى قىزمەتى – بىرىكتىرۋ, دەپ ويلايمىن. سوندىقتان ءبىز ودان ءارى وسى باعىتتا بار كۇش-جىگەرىمىزدى سالامىز», دەگەن بولاتىن. ءارينە, ءاردايىم سولاي بولعاي. ءبىز دە وتاندىق كومپانيانىڭ ۇنەمى الدا بولعانىنا تىلەكتەسپىز.
دينارا بىتىكوۆا,
«ەگەمەن قازاقستان».