ەرىكتىلەر ەل ەرتەڭىنە سەنىمدى

«جاستار رۋحى» جاستار قاناتىنىڭ توراعاسى اكەجان كەڭەسوۆ كونفەرەنتسيا بارىسىندا Amanat  پارتياسى جاستار قاناتىنىڭ كەزەكتەن تىس VI سەزىندە جاڭا باعدارلاما قابىلدانىپ, ورتالىق كەڭەستىڭ قۇرامى مەن Jas Otan اتاۋىنىڭ وزگەرگەنى تۋرالى ەسكە سالىپ ءوتتى. «رۋح – حالقىمىز ءۇشىن قاسيەتتى ۇعىم. بۇل اتاۋدىڭ ماعىناسى وتە تەرەڭ, ءار ازاماتقا ۇلكەن جاۋاپكەرشىلىك جۇكتەيدى. Amanat پارتياسىنىڭ جاستار قاناتىنىڭ ترانسفورماتسياسى جاي عانا اتاۋدى وزگەرتۋ ەمەس. جاڭعىرۋ ۇدەرىسىندەگى جاستاردىڭ ەرەكشە ءرولىن كورسەتەتىن, قۇندىلىقتار مەن ۇستانىمداردى ايقىندايتىن جاڭا جاستار باعدارلاماسىنىڭ جۇزەگە اسۋىمەن تىعىز بايلانىستى», دەدى اكەجان كەڭەسوۆ.

اكەجان كەڭەسوۆتىڭ ايتۋىنشا, مەگاپوليس اۋداندارىندا جاستار ۇيىمدارى بەلسەندى جۇمىس ىستەيدى, ولار قالاداعى 20 شاقتى جوعارى وقۋ ورنى مەن 30-عا جۋىق ورتا جانە ارنايى ءبىلىم بەرۋ مەكەمەسىندە ورنالاسقان. بۇگىندە «جاستار رۋحىنىڭ» قۇرامىندا 4 مىڭنان استام بەلسەندى بار.  «جاستار رۋحىنىڭ» بەلسەندىلەرى «ارداگەرلەردى ارداقتايىق» اكتسياسىن تۇراقتى ۇيىمداستىرىپ كەلەدى. بيىل العاش رەت Qaisar اسكەري-پاتريوتتىق جوباسىن باستادى. ونىڭ اياسىندا ەكى جۇزدەن استام جوعارى سىنىپ وقۋشىسى دەنە شىنىقتىرۋ دايىندىعىنان ءوتتى. ال TazaLike جوباسى شەڭبەرىندە 15 سەنبىلىك وتكىزىلدى. تاريحتى, ادەبيەتتى زەرتتەۋگە باعىتتالعان زياتكەرلىك ويىندار, بالالار مەن جاستار اراسىندا ينتەرنەتكە تاۋەلدىلىك پەن قۇمار ويىنداردىڭ الدىن الۋ – بەلسەندى جاستار تاراپىنان تۇراقتى وتكىزىلىپ تۇراتىن ءىس-شارالار.

قالا جانە وبلىستارداعى جاس دەپۋتاتتار كورپۋسىمەن بىرلەسىپ بىرنەشە كوشپەلى وتىرىس­تار وتكىزگەن بەلسەندىلەر ستۋدەنتتەر جاتاق­حانا­لارىنىڭ قۇرىلىس بارىسىن باقىلاۋعا العان. رەفەرەندۋم كەزىندە دە ەرىكتىلەر تاراپىنان اقپارات­تىق قولداۋ كورسەتىلدى.

Qamqor charity قوعامدىق قورىنىڭ توراعاسى, الماتى قالاسى اكىمى جانىنداعى جاستار كەڭەسىنىڭ مۇشەسى باعدات انارباەۆا: «جولداۋدا جاستار قولداعان كوپتەگەن جاقسى تەزيستەر جاريالاندى. الەۋمەتتىك سالادا جانە ءبىلىم بەرۋدە بەلگىلەنگەن وزگەرىستەر, جاڭا مەكتەپتەر سالىنىپ, مەديتسينالىق مەكەمەلەر مودەرنيزاتسيالاناتىندىعى ەلىمىزدىڭ دامۋىنا وڭ ىقپالىن تيگىزەدى», دەدى. سونداي-اق ول Qamqor charity كومپانياسىنىڭ جۇمىسىنا توقتالىپ, اتا-انا قامقورلىعىنسىز قالعان بالالارمەن جانە جالعىزباستى زەينەتكەرلەرمەن بەلسەندى جۇمىس جۇرگىزىلىپ جاتقانىن اتاپ ءوتتى. ونىڭ ايتۋىنشا, «الەۋمەتتىك شەبەرحانا» جوباسى اياسىندا بالالار ۇيىندە ماماندىقتار تەگىن وقىتىلادى. بۇگىندە 20 بالا موبيليوگرافيا, اسپازدىق, SMM كۋرستارىندا ءبىلىم الۋدا. سونىمەن قاتار ەرىكتىلەر قارتتار تۇراتىن الەۋمەتتىك ۇيلەرگە, جالعىزباستى زەينەتكەرلەرگە قامقورلىق جاساۋدان جالىقپايدى.

الماتى