بۇۇ مىنبەرىندە ءسوز سويلەگەن پرەزيدەن قاسىم-جومارت توقاەۆ ورتاق ماقساتقا قول جەتكىزۋ ءۇشىن قانداي باعىتتاردا ارەكەت ەتۋ كەرەگىن ايتتى, دەپ حابارلايدى Egemen.kz.
«وتكەن جىلدارداعى كوپتەگەن جانە كوبىنە ءوزارا بايلانىستى داعدارىستار جاھاندىق باسقارۋدا ايتارلىقتاي كەمشىلىكتەر بار ەكەنىن كورسەتتى. ولار بۇۇ-نى جاڭعىرتۋ جانە رەفورمالاۋ قاجەت ەكەنىن ايقىنداپ بەردى.
بۇۇ الداعى سىن-قاتەرلەرگە جانە تۋىندايتىن مۇمكىندىكتەرگە دايىن بولۋعا ءتيىس. وسىعان بايلانىستى قازاقستان باس حاتشىنىڭ ء«بىزدىڭ ورتاق ماسەلەمىز» اتتى بايانداماسىندا ايتىلعان ۇسىنىستاردى قولدايدى.
بىزگە بۇۇ جارعىسىنىڭ ەرەجەلەرىن بەكىتۋگە, كوپجاقتىلىققا تىڭ سەرپىن بەرۋگە, قولدانىستاعى مىندەتتەمەلەردىڭ جۇزەگە اسىرىلۋىن كۇشەيتۋگە, جاڭا سىن-قاتەرلەرگە قاتىستى ناقتى شەشىمدەردى كەلىسۋگە جانە ۇيىمعا مۇشە مەملەكەتتەردىڭ ءوزارا سەنىمىن قالپىنا كەلتىرۋگە زور مۇمكىندىك تۋىپ تۇر», دەدى مەملەكەت باسشىسى
بۇل رەتتە كەلەسى جىلى ۇيىمعا مۇشە مەملەكەتتەر مينيسترلەرىنىڭ كەزدەسۋى اياسىندا وتەتىن كونسۋلتاتسيالارعا قازاقستاننىڭ قاتىساتىنىن, سونداي-اق 2024 جىلى وتەتىن بولاشاق ءسامميتىن اسىعا كۇتەتىنىن ايتتى.
ء«بىز جاھاندىق سىن-قاتەرلەر مەن داعدارىستارعا قارسى قابىلداناتىن قاراپايىم ءىس-شارالاردان ولاردى بولدىرماۋعا جانە ساپالى بولجاۋعا, سونداي-اق ساياسي باعىتتاردى ستراتەگيالىق جوسپارلاۋ جانە ازىرلەۋ اياسىنداعى باعالاۋ ادىستەرىمىزدى جۇمىلدىرۋعا كوشۋىمىز كەرەك», دەدى پرەزيدەنت.
سونىمەن قاتار قازاقستان 30 جىل بۇرىن ءدال وسى ماقساتپەن ازياداعى ءوزارا ءىس-قيمىل جانە سەنىم شارالارى جونىندە كەڭەس (اوسشك) قۇرۋدى ۇسىنعانىن ەسكە سالدى.
«جاڭا سىن-تەگەۋرىندەر مەن قاۋىپ-قاتەرلەرگە بايلانىستى الداعى قازان ايىندا ارااعايىندىق پەن بىتىمگەرلىككە اتسالىسۋ ماقساتىندا وتەتىن سامميتتە اوسشك تولىققاندى حالىقارالىق ۇيىمعا اينالادى دەپ ۇمىتتەنەمىز.
2030 جىلعا دەيىن سەگىز-اق جىل قالدى. وسىعان دەيىن ورنىقتى دامۋ ماقساتتارىنا قول جەتكىزۋگە COVID-19 پاندەمياسى, ء«ۇش الەمدىك داعدارىس» (كليماتتىڭ وزگەرۋى, بيوالۋانتۇرلىلىكتىڭ جوعالۋى جانە قورشاعان ورتانىڭ لاستانۋى), سونداي-اق دۇنيەنىڭ ءار بۇرىشىنداعى قاقتىعىس وشاقتارى كەدەرگى كەلتىردى. كەش بولماي تۇرعاندا بۇرىنعى دامۋ سوقپاعىنا ءتۇسۋىمىز كەرەك.
ءبىزدىڭ نەگىزگى باسىمدىعىمىز - ىقتيمال تۇراقسىزدىققا قارسى تۇرۋعا قابىلەتتىلىك, سونداي-اق ورنىقتى, تەڭگەرىمدى جانە ينكليۋزيۆتى تۇردە قايتا قالىپقا كەلۋدى قامتاماسىز ەتۋ», دەدى قاسىم-جومارت كەمەل ۇلى.
وسىلايشا, پرەزيدەنت شىعىس پەن باتىس اراسىندا اشىق ديالوگ جۇرگىزۋ قاجەت دەپ ەسەپتەيدى. سونداي-اق ءوزارا سەنىم مەن كوپجاقتى ىنتىماقتاستىق قاعيداتتارىنا نەگىزدەلگەن قاۋىپسىزدىكتىڭ جاڭا جاھاندىق پاراديگماسىن ورناتۋ كەرەك دەگەن پىكىردە.
قازىرگى داعدارىس جاعدايى مەن گەوساياسي تەكەتىرەستەردىڭ كۇشەيۋىن ەسكەرە وتىرىپ, بۇۇ اياسىندا حالىقارالىق شيەلەنىستى باسەڭدەتۋ جانە قاقتىعىستاردى بولدىرماۋ جۇمىستارىن جۇرگىزۋ قاجەت.