شوتلانديانىڭ گلازگو قالاسىندا وتكەن دەۆيس كۋبوگى جولىنداعى جارىستا قازاقستان قۇراماسى ءساتسىز ونەر كورسەتتى. D توبىنداعى تۇساۋكەسەر كەزدەسۋىندە نيدەرلاند قۇراماسىنان ۇتىلعان جەرلەستەرىمىز ودان كەيىن اقش-قا ەسە جىبەردى.
دۇنيەجۇزىلىك رەيتينگتە 214-ورىندا تۇرعان ميحايل كۋكۋشكين توممي پولمەن كۇش سىناستى. الەمنىڭ 29-راكەتكاسى جەرلەسىمىزدى ەش قينالماي جەڭدى – 6:1, 6:4. كەلەسى ويىندا الەكساندر بۋبليك تارازى باسىن تەڭەستىرەتىن شىعار دەپ ۇمىتتەندىك. ول بيىلعى ۋيمبلدون تۋرنيرىندە شيرەك فينالعا دەيىن جەتكەن تەيلور فريتسپەن شەبەرلىك بايقاستى. وتانداسىمىز اتر رەيتينگىندە 12-ورىنعا تۇراقتاعان اقش-تىڭ ەڭ ۇزدىك ويىنشىسىنىڭ وسال تۇسىن تابا المادى – 6:7, 6:1, 3:6. جۇپتىق سايىستا بۋبليك پەن الەكساندر نەدوۆەسوۆ رادجيۆ رام مەن دجەك سوكتى سان سوقتىرعانىمەن, جەڭىس امەريكالىقتاردىڭ ۋىسىندا كەتتى. قورىتىندى ەسەپ – 1:2.
قاتارىنان ەكى كەزدەسۋدە ۇتىلعان قازاقستان قۇراماسى سوڭعى ماتچتا ۇلىبريتانيامەن كۇش سىناستى. بۇل باسەكەدە دە جەرلەستەرىمىز جەڭىلىستىڭ كەرمەك ءدامىن تاتتى. اتاپ ايتساق, دميتري پوپكو ەندي ماررەيدەن ۇتىلدى – 4:6, 3:6. الەكساندر بۋبليك كەمەرون نورريدەن باسىم ءتۇستى – 6:4, 6:3. ال جۇپتىق باسەكەدە بۋبليك پەن ونىڭ اتتاسى الەكساندر نەدوۆەسوۆ دجو سولسبەري مەن نيل سكۋپسكيگە ەسە جىبەردى – 6:7, 7:6, 6:7.