باتىس قازاقستان وبلىسىندا كوروناۆيرۋس بويىنشا ەپيدەميالىق جاعداي تۇراقتالىپ كەلەدى. ماماندار سوڭعى ءبىر اي ىشىندە سىرقاتتانۋشىلىق دەڭگەيى 62,7 پايىزعا تومەندەگەنىن حابارلادى.
«قىركۇيەك ايىنىڭ 8 كۇنىندە وبلىس بويىنشا 217 سىرقات تىركەلدى, ال تامىز ايىنىڭ العاشقى 8 كۇنىندە ناۋقاستىڭ سانى 582 بولعان ەدى», دەيدى وبلىستىق دەنساۋلىق ساقتاۋ باسقارماسى مەديتسينالىق كومەكتى ۇيىمداستىرۋ ءبولىمىنىڭ باسشىسى ايگۇل قۇلباراقوۆا. بۇل, ارينە, جەدەل ءارى ساۋاتتى قيمىلداپ, سىرقاتتاردى ءساتتى ەمدەگەن دارىگەرلەردىڭ دە ارقاسى.
جىل باسىنان بەرى وڭىردە 12 654 ادام كوروناۆيرۋس جۇقتىرىپ, ەسەپكە الىنعان ەكەن. ال جالپى پاندەميا باستالعالى بەرى مۇنداي سىرقاتتاردىڭ سانى 52 713-كە جەتكەن. بۇگىندە وبلىس بويىنشا 269 ينفەكتسيالىق توسەك دايىندالعان بولسا, ول جەردە قازىر 23 ناۋقاس ەم الۋدا. ناۋقاستاردىڭ باسىم كوپشىلىگى (19-ى) ۆاكتسينا الماعان. جانساقتاۋ بولىمىندە جاتقان 2 ناۋقاستىڭ ىلەسپە اۋرۋلارى اسقىنىپ تۇر, ولار دا الدىن الا ەكپە الماعان بولىپ شىقتى.
كوروناۆيرۋستىڭ بەتى قايتقانداي بولعانىمەن, بوساڭسۋعا بولمايدى. قازىر وبلىس اۋماعىندا جالپى سانى 96 موبيلدىك بريگادا كەزەكشىلىكتە تۇر. ولاردىڭ 32-ءسى ورال قالاسىندا بولسا, اۋدانداردا 64 بريگادا بار. جىل باسىنان بەرى بۇل توپتار 43 958 مارتە شاقىرتۋ الىپ, جولعا شىعىپتى. سونىڭ ىشىندە 18 889 ادامنىڭ سىرقاتى كوروناۆيرۋس بولىپ شىققان.
– كوروناۆيرۋسقا قارسى ەڭ سەنىمدى قورعان ۆاكتسينا ەكەنى ابدەن دالەلدەندى. سوندىقتان ەكپە الۋعا اسىعىڭىزدار, – دەدى ا.قۇلباراقوۆا.
بۇگىندە وبلىستا Comirnaty ۆاكتسيناسى مەن قىتايلىق Vero Cell ۆاكتسيناسى بار. ال جاقىن كۇندەرى وڭىرگە 3 مىڭ دوزا QazVac, قاراشا ايىندا 4 680 دوزا Comirnaty ۆاكتسيناسى جەتكىزىلمەك.
سوڭعى مالىمەتكە قاراعاندا, وبلىستا 288 345 ادام كوروناۆيرۋس ينفەكتسياسىنا قارسى ۆاكتسينانىڭ ءى كومپونەنتىن, 277 468 ادام ءىى كومپونەنتىن تولىق العان.
باتىس قازاقستان وبلىسى