17 جانە 18 قىركۇيەك كۇندەرى ەلوردادا ءداستۇرلى اۋىلشارۋاشىلىق جارمەڭكەسى وتەدى. بۇل جولى الماتى جانە جەتىسۋ وبلىستارىنىڭ تاۋار وندىرۋشىلەرى ءوز ونىمدەرىن ۇسىنادى, دەپ حابارلايدى Egemen.kz قالا اكىمدىگىنىڭ رەسمي سايتىنا سىلتەمە جاساپ.
ەكى ءوڭىردىڭ تاۋار وندىرۋشىلەرى ەلورداعا 459 توننا ءونىم اكەلەدى, ونىڭ ىشىندە: 84 توننا - كوكونىس, 62 توننا - جەمىس-جيدەك, 48,7 توننا - كارتوپ, 41,5 توننا - ەت, 9 توننادان استام - ءسۇت ونىمدەرى, 8 توننا - بالىق, 500 كگ - بال, سونداي-اق 189 توننانى قۇرايتىن باسقا دا ونىمدەر بار.
جالپى, جەتىسۋ وبلىسى 54 تاۋار ءتۇرىن, الماتى وبلىسى 42 ءتۇرىن ۇسىنادى. ولاردىڭ اراسىندا وسىمدىك مايى, قانت, ۇن, جارما, ۇلتتىق سۋسىندار جانە باسقالار دا بار.
جارمەڭكە اياسىندا ەلوردا تۇرعىندارى مەن قوناقتارى ءۇشىن كونتسەرتتىك باعدارلاما دايىندالدى.
ەسكە سالا كەتسەك, اتالعان جارمەڭكە اۋىل شارۋاشىلىعى وندىرۋشىلەرىنە ءوز ونىمدەرىن تىكەلەي تۇتىنۋشىلارعا دەلدالسىز ساتۋعا مۇمكىندىك بەرەدى, بۇل تاۋارلارىنىڭ باعاسى نارىقتان 10-20%-عا تومەن بولاتىنىن بىلدىرەدى.
ايتا كەتسەك, ەلورداداعى جارمەڭكەلەر 13 قاراشاعا دەيىن ءار سەنبى جانە جەكسەنبى كۇندەرى وتەدى. قالا تۇرعىندارى مەن قوناقتارى تۇران 48 مەكەنجايىندا ورنالاسقان «استانا-ارەنا» ستاديونىنىڭ جانىنداعى الاڭعا بارىپ, قوس ءوڭىردىڭ تاۋارلارىن ساتىپ الا الادى.
كەلەسى دەمالىس كۇندەرى, ياعني 24-25 قىركۇيەك كۇندەرى باتىس قازاقستان جانە اتىراۋ وبلىستارىنىڭ كاسىپكەرلەرى ءوز ونىمدەرىن ۇسىنادى.