كوروناۆيرۋستىڭ تارالۋى بارشا الەمگە, ساياساتقا, ەكونوميكا مەن الەۋمەتتىك قاتىناستارعا ىقپالىن تيگىزدى. بۇل تۋرالى مەملەكەت باسشىسى قاسىم-جومارت توقاەۆ الەمدىك جانە ءداستۇرلى دىندەر ليدەرلەرىنىڭ سەزىندە ايتتى, دەپ حابارلايدى Egemen.kz.
وسى ورايدا ول كارانتين شارالارى كوپ سالاعا جاعىمسىز اسەرىن تيگىزگەنىن اتاپ ءوتتى.
«كارانتين شارالارى جەتكىزۋ تىزبەكتەرىن بۇزىپ, تۋريزم, قىزمەت كورسەتۋ, كولىك جانە باسقا دا سالالارعا جاعىمسىز اسەرىن تيگىزدى. الەمنىڭ از دامىعان ايماقتارىندا ازىق-ت ۇلىك تاپشىلىعى ورىن الدى. سول ارالىقتا الەمدىك دەرجاۆالار اراسىنداعى گەوساياسي كونفرونتاتسيا كۇشەيىپ, ءتۇرلى ايماقتاردا شيەلەنىستىڭ كوبەيۋىنە اكەپ سوقتى. الدىڭعى حالىقارالىق قاۋىپسىزدىك جۇيەسى كوز الدىمىزدا قيراۋدا. ەكسترەميزم مەن تەرروريزم ەڭ كۇردەلى سىن-قاتەر بولىپ قالدى. ەنەرگەتيكالىق كريزيس كومىرسۋتەگى نەيترالدىعىنا قول جەتكىزۋگە كەدەرگى كەلتىرۋدە. بۇل سىناقتارعا بەي-جاي قاراي المايمىز», دەدى قاسىم-جومارت توقاەۆ.