مەملەكەت باسشىسى قاسىم-جومارت توقاەۆ ەلوردادا ءوتىاپ جاتقان الەمدىك جانە ءداستۇرلى دىندەر ليدەرلەرىنىڭ VII سەزىندە جاڭا رۋحتى جاڭعىرتۋ ءۇشىن ءومىردىڭ بارلىق سالاسىن رەفورمالاۋ قاجەت ەكەنىن ايتتى, دەپ حابارلايدى Egemen.kz.
«بۇگىندە ءبىز بەتپە-بەت كەلىپ وتىرعان سىن-تەگەۋرىندەر جاھاندىق پروتسەستەردەگى ءدىن كوشباسشىلارىنىڭ ءرولىن وي ەلەگىنەن قايتا وتكىزىپ, ءتۇسىنۋىمىزدى تالاپ ەتەدى. وسىعان وراي بىرنەشە تاقىرىپتى ايقىنداعىم كەلەدى. بىرىنشىدەن, بارلىق ءداستۇرلى دىندەر ادام ومىرىنە قۇرمەتپەن قاراۋ, ءوزارا قۇرمەت, زورلىق-زومبىلىققا قارسى تۇرۋ سىندى بازالىق ۇستانىمداردىڭ بەلگىلى ءبىر جيىنتىعىن بىرىكتىرەدى», دەدى قازاقستان پرەزيدەنتى.
مەملەكەت باسشىسى بۇل ۇستانىمدار جاڭا الەمدىك جۇيەنىڭ ىرگەتاسىن قالايدى دەگەن ويىن جەتكىزدى.
«بىزگە مادەنيەتتە, ەكونوميكادا جانە قوعامدا تەوريالىق تۇجىرىمدار مەن تاجىريبەلىك ادىستەردى ىرگەلى جاڭعىرتۋ ءارى ۇيلەستىرۋ قاجەت. وسىناۋ جاڭا رۋحتى جاڭعىرتۋ جانە وركەنيەتتى ءتۇسىنۋ ءۇشىن بىزگە ءومىردىڭ بارلىق سالاسىن رەفورمالاۋ قاجەت», دەدى قاسىم-جومارت توقاەۆ.