بيىلعى جىلدىڭ سەگىز ايىندا ەكونوميكانىڭ ءوسىمى وتكەن جىلدىڭ سايكەس كەزەڭىمەن سالىستىرعاندا 3,1%-دى قۇرادى, دەپ حابارلايدى Egemen.kz.
وڭدەۋ ونەركاسىبى 4,8%-عا, ماشينا جاساۋ 8%-عا دەرلىك, ونىڭ ىشىندە لوكوموتيۆتەر مەن ۆاگونداردى ءوندىرۋ 11,5%-عا ءوستى. وڭدەۋشى سەكتوردا حيميا ونەركاسىبى 12%-عا, جەڭىل ونەركاسىپ 7,5%-عا, مەتاللۋرگيا – 5%-دان استام جانە مۇناي وڭدەۋ 4%-عا ءوسىپ, جوعارى ديناميكانى كورسەتتى.
تاۋ-كەن ونەركاسىبىندە كومىر ءوندىرۋ 2,2%-عا, تابيعي گاز ءوندىرۋ 3%-عا جانە كەن ءوندىرۋ 5%-دان استام ۇلعايىپ, تۇراقتى ءوسىم تىركەلىپ وتىر. قۇرىلىس سەكتورىندا 7,5% ءوسىم بار جانە 8,8 ملن شارشى مەتر تۇرعىن ءۇي پايدالانۋعا بەرىلدى. اۋىل شارۋاشىلىعىندا 4,3% تۇراقتى ءوسىم قالىپتاستى. قىزمەت كورسەتۋ سالاسىندا ساۋدا 5,2%-عا, كولىك 5,5%-عا جانە بايلانىس 6,6%-عا ءوستى.
«سەگىز ايدىڭ قورىتىندىسى بويىنشا بارلىق نەگىزگى كورسەتكىش اقمولا, قاراعاندى, قوستاناي وبلىستارى مەن شىمكەنت قالاسىندا ءوسىپ وتىر. اكىمدىكتەر ءوڭىر ەكونوميكاسىنىڭ ءوسۋ قارقىنىن تومەندەتپەۋى كەرەك. سونىمەن قاتار تامىز ايىنىڭ قورىتىندىسى بويىنشا ەلىمىزدە جىلدىق ينفلياتسيا 16%-دان اسىپ كەتتى», دەدى ءاليحان سمايىلوۆ.
ۇكىمەت باسشىسى الەۋمەتتىك ماڭىزى بار ازىق-ت ۇلىك تاۋارلارىنىڭ باعاسىن تۇراقتاندىرۋ, ازىق-ت ۇلىك ونىمدەرىنىڭ ءوندىرىسىن ىنتالاندىرۋ جانە ىشكى نارىقتى تولىقتىرۋ بويىنشا جۇمىستاردى كۇشەيتۋدى تاپسىردى.