قىرعىز رەسپۋبليكاسىنا جۇمىس ساپارى بارىسىندا قازاقستان پرەمەر-ءمينيسترىنىڭ ورىنباسارى – ساۋدا جانە ينتەگراتسيا ءمينيسترى سەرىك جۇمانعارين قىرعىز رەسپۋبليكاسىنىڭ مينيسترلەر كابينەتى توراعاسىنىڭ ءبىرىنشى ورىنباسارى ادىلبەك قاسىماليەۆپەن كەزدەستى.
ەكى ەلدىڭ ۆيتسە-پرەمەرلەرى «قاراسۋ» جانە «اق-تىلەك» اۆتوجول وتكىزۋ پۋنكتتەرى اۋدانىنداعى يندۋستريالىق ساۋدا-لوگيستيكالىق كەشەننىڭ ىسكە اسىرىلۋ بارىسىمەن تانىستى.
تاراپتار يسلك قىزمەتىن رەتتەۋ تۋرالى ۇكىمەتارالىق كەلىسىمگە قول قويۋدى 2022 جىلعى قازانعا دەيىن پىسىقتاۋعا ۋاعدالاستى.
ايتا كەتەيىك, بىرلەسكەن يسلك قۇرۋ جانە ونىڭ جۇمىس ىستەۋ تۇجىرىمداماسى قازاقستان پرەزيدەنتى ق.توقاەۆتىڭ 2019 جىلعى 27 قاراشاداعى قىرعىز رەسپۋبليكاسىنا مەملەكەتتىك ساپارىنىڭ جانە قازاقستان رەسپۋبليكاسى مەن قىرعىز رەسپۋبليكاسىنىڭ جوعارى مەملەكەتارالىق كەڭەسىنىڭ بەسىنشى وتىرىسىنىڭ قورىتىندىلارى بويىنشا ەكى ەل باسشىلارىنىڭ تاپسىرماسىنا سايكەس ازىرلەندى.
سونداي-اق ساپار اياسىندا ۆيتسە-پرەمەر قازاقستان-قىرعىز ساۋدا-ەكونوميكالىق ىنتىماقتاستىعى جونىندەگى جۇمىس توبىنىڭ ەكىنشى وتىرىسىنا قاتىستى.
س.جۇمانعارين قىرعىز رەسپۋبليكاسى قازاقستاننىڭ ورتالىق ازيا وڭىرىندەگى نەگىزگى ساۋدا-ەكونوميكالىق ارىپتەستەرىنىڭ ءبىرى ەكەنىن اتاپ ءوتتى.
«قازاقستاندىق ستاتيستيكا دەرەكتەرى بويىنشا قىرعىز رەسپۋبليكاسى مەن قازاقستان رەسپۋبليكاسى اراسىنداعى تاۋار اينالىمى 2022 جىلعى قاڭتار-ماۋسىمدا 495,7 ملن دوللاردى قۇرادى, بۇل وتكەن جىلدىڭ ۇقساس كەزەڭىمەن سالىستىرعاندا 5,7%-عا ارتىق, ونىڭ ىشىندە ەكسپورت – 303,3 ملن, يمپورت – 192,3 ملن دوللار», دەدى س.جۇمانعارين.
تاراپتار ءوزارا ساۋدانى ۇلعايتۋ ماقساتىندا وتىرىس بارىسىندا قول قويىلعان «قازاقستان رەسپۋبليكاسىنىڭ ساۋدا جانە ينتەگراتسيا مينيسترلىگى مەن قىرعىز رەسپۋبليكاسىنىڭ اۋىل شارۋاشىلىعى مينيسترلىگى اراسىنداعى جەمىس-كوكونىس ونىمدەرىن جەتكىزۋدى ۇيىمداستىرۋ نيەتى تۋرالى ءوزارا تۇسىنىستىك تۋرالى» مەموراندۋم شەڭبەرىندە قىرعىز رەسپۋبليكاسىنان قازاقستانعا ەرتە جەمىس-كوكونىس ونىمدەرىن جەتكىزۋدى جۇزەگە اسىرۋ جونىندە ۋاعدالاستى.
سونداي-اق قول قويىلعان «قازاقستان رەسپۋبليكاسىنىڭ ساۋدا جانە ينتەگراتسيا مينيسترلىگى مەن قىرعىز رەسپۋبليكاسىنىڭ ەكونوميكا جانە كوممەرتسيا مينيسترلىگى اراسىنداعى ىنتىماقتاستىق جونىندەگى مەموراندۋم اياسىندا تاراپتار ساۋدا راسىمدەرىن جەڭىلدەتۋگە, بيزنەس جۇرگىزۋ شىعىندارىن ازايتۋعا كەلىستى جانە ەلدەر اراسىنداعى ەلەكتروندىق قۇجاتتارمەن ءوزارا الماسۋداعى ىنتىماقتاستىقتى دامىتۋعا نيەتتى.