ەس بىلگەلى ەل ىشىندە ءجۇرىپ, بىردە قورداي, بىردە تارازدا تۇرىپ, قازاق ادەبيەتىندە وشپەس وبرازدار قالدىرعان جازۋشى نەسىپبەك ءداۋتاي ۇلىنىڭ ورتامىزدان كەتكەنىنە, باقيعا كوشكەنىنە دە جىل تولدى. شەرحان مۇرتازانىڭ ءوزى «قوردايدىڭ قوڭىر قۇلجاسى» دەپ اتاعان قالامگەر رۋحىنا ارنالعان دوڭگەلەك ۇستەل وتىرىسى نەسكەڭنىڭ تۋعان جەرىندە ءوتتى.
كەزدەسۋگە قازاقستان جازۋشىلار وداعى باسقارما توراعاسى, مەملەكەتتىك سىيلىقتىڭ لاۋرەاتى ۇلىقبەك ەسداۋلەت, وبلىس اكىمىنىڭ ورىنباسارى ەركىن ۇيسىمباەۆ, قالامگەرلەر جۇماباي شاشتاي ۇلى, جۇسىپبەك قورعاسبەك, قاسىمحان بەگمانوۆ, مارالتاي رايىمبەك ۇلى باستاعان وزگە دە ازاماتتار قاتىستى. دوڭگەلەك ۇستەل وتىرىسىن رەسپۋبليكالىق جالپىۇلتتىق «Egemen Qazaqstan» گازەتىنىڭ ادەبيەت جانە ونەر ءبولىمىنىڭ مەڭگەرۋشىسى, اقىن ەرلان ءجۇنىس جۇرگىزىپ وتىردى.
باسقوسۋعا قاتىسقان قالامگەرلەر قاۋىمى «قوردايدىڭ قوڭىر قۇلجاسى» تاقىرىبىمەن وتكەن جيىندا جازۋشى تۋرالى ەستەلىكتەرىمەن ءبولىسىپ, ۇسىنىستارىن ايتتى. ولار نەسىپبەك ءداۋتاي ۇلى ءومىرىنىڭ سوڭىنا دەيىن «جامبىل» رەسپۋبليكالىق ادەبي جۋرنالىن شىعارىپ وتىرعان, «ايعىركىسى», «قۇدىرەت پەن قاسىرەت», «باتىر», «كىسى يەسى», «شال» سەكىلدى وزگە دە عاجاپ تۋىندىلارىن جازعان كابينەتتى قالامگەردىڭ مۋزەي-ءۇيى رەتىندە ساقتاۋدى سۇرادى. سونداي-اق «جامبىل» رەسپۋبليكالىق ادەبي جۋرنالىن ارمەن قاراي شىعارۋ قاجەتتىگىن اتاپ ءوتتى. سونىمەن قاتار قالامگەرلەر تاراز تورىندە جازۋشىنىڭ ورىندىقتا وتىرعان بەينەسى ورناتىلسا دەگەن تىلەكتەرىن دە جەتكىزدى. جوعارىدا قالامگەرگە شەراعانىڭ «قوردايدىڭ قوڭىر قۇلجاسى» دەپ ات قويعانىن ايتتىق. بيىل شەراعانىڭ 90 جىلدىعىنا وراي تارازداعى «جامبىل» داڭعىلىنىڭ بويىندا شەرحان مۇرتازانىڭ ەسكەرتكىشى بوي كوتەرەدى. ال جىل سوڭىندا قالامگەردىڭ 75 جىلدىعى ءوتۋى كەرەك. شىعارماشىل تۇلعانىڭ بەينەسى شەراعا ەسكەرتكىشىنىڭ قاسىندا تۇرسا ەش ارتىق بولماس ەدى. بىرىنشىدەن, شەرحان مۇرتازا نەسكەڭدى قالامگەر ءىنىسى رەتىندە قۇرمەتتەدى. ەكىنشىدەن, «جامبىل» جۋرنالىن شىعارعان قالامگەردىڭ اقىن اتىنداعى كوشەدە, شەراعانىڭ قاسىندا تۇرعانى ناعىز ارحيتەكتۋرالىق انسامبل ءارى ۇتىمدى شەشىم بولار ەدى.
دوڭگەلەك ۇستەل وتىرىسى بارىسىندا قالامگەرلەر قازاقتىڭ قابىرعالى جازۋشىسىنىڭ ەسىمىن قۇرمەتتەۋ ءۇشىن كوپتەگەن ۇسىنىس ايتتى. اسىرەسە جۇسىپبەك قورعاسبەكتىڭ ۇسىنىسى كوڭىلگە قوندى دەۋگە ابدەن بولادى. ول نەسىپبەك ءداۋتاي ۇلى تۋدىرعان «ايعىركىسى» وبرازىن اسپەتتەۋ ءۇشىن سول بەينە تۇعىرعا قونىپ, بوي كوتەرسە دەگەن نيەتىن جەتكىزدى. قورداي اۋدانىنىڭ اكىمى مادەن مۇساەۆ اتالعان ۇسىنىستى قابىل الىپ, قالامگەر تۋعان ولكەدە جۇزەگە اسىرسا ەشكىم ۇتىلماس ەدى.
قازاقستاننىڭ ەڭبەك سىڭىرگەن قايراتكەرى, حالىقارالىق «الاش» ادەبي سىيلىعىنىڭ لاۋرەاتى نەسىپبەك ءداۋتاي ۇلىنىڭ جىلدىق اسىنا ورايلاستىرىلىپ وتكىزىلگەن ءىس-شارا بارىسىندا قالامگەردىڭ ىزدەۋشىسى, ءىنىسى, ەلىمىزدىڭ اقپارات جانە قوعامدىق دامۋ ءمينيسترى دارحان قىدىرالىنىڭ قولداۋىمەن جارىق كورگەن «قوردايدىڭ قوڭىر قۇلجاسى» اتتى ەستەلىكتەر توپتاستىرىلعان جيناقتىڭ تۇساۋى كەسىلىپ, جيىنعا كەلگەن جۇرتشىلىققا تۇگەلدەي تاراتىلدى.
كەزدەسۋلەر وتەدى, ۇسىنىستار ايتىلادى. الايدا كوپ جاعدايدا ايتىلعان اڭگىمە ءسوز كۇيىندە قالىپ جاتادى. جەرگىلىكتى اتقارۋشى بيلىكتىڭ وكىلدەرى بۇل جولى باسقوسۋدا كوتەرىلگەن ۇتىمدى ۇسىنىستاردى قاپەرگە الىپ, قورىتىندى شىعارار ما ەكەن؟ كىم ءبىلسىن... بارىنە ۋاقىت تورەشى. ءبىر انىعى, جەلتوقسان ايىندا قالامگەردىڭ 75 جىلدىق مەرەيتويىنا وراي بىرقاتار ءىس-شارا وتكىزىلەتىن سەكىلدى.
جامبىل وبلىسى,
قورداي اۋدانى