نۇر-سۇلتان قالاسىندا جەدەل جاردەم ستانتسياسىنا جاڭا كولىكتەر بەرىلدى. سوڭعى ءۇش جىل ىشىندە مەديتسينالىق مەكەمەلەر 3 مىڭعا جۋىق ارنايى جابدىقپەن تولىق جابدىقتالدى. بۇل تۋرالى ەلوردا اكىمى التاي كولگىنوۆ وزىنىڭ Instagram پاراقشاسىندا جازدى, دەپ حابارلايدى Egemen.kz.
«مەديتسينالىق ورتالىقتار مەن جەدەل مەديتسينالىق جاردەم ستانتسياسىن جۇيەلى تۇردە جابدىقتاۋ جۇمىسى ءجۇرىپ جاتىر. جەدەل مەديتسينالىق جاردەم ستانتسياسىنىڭ اۆتوپاركىنە تاعى 55 اۆتوكولىك قوسىلدى. ولاردىڭ باسىم بولىگى – رەانيموبيلدەر», دەپ جازدى ا.كولگىنوۆ.
سونداي-اق وسىعان دەيىن 100-دەن اسا اۆتوكولىك تاپسىرىلعان. وسىلايشا, اۆتوپارك ايتارلىقتاي مودەرنيزاتسيالانىپ, ماشينالار سانى ارتتى. ارنايى اۆتوكولىكتەر العاشقى مەديتسينالىق كومەك كورسەتۋ ءۇشىن قاجەتتى جابدىقتارمەن جابدىقتالعان: وكپەنى جاساندى جەلدەتۋ اپپاراتى, دەفيبريللياتور-مونيتورلار, ەلەكترلى سورعىشتار, جەدەل مەديتسينالىق كومەك كورسەتۋ ءۇشىن رەانيماتسيالىق قۇرىلعىلارى بار جيىنتىقتار (ەلەكتروكارديوگراف) جانە ت.ب.
مەملەكەت باسشىسى مەديتسينا سالاسىن دامىتۋعا, مەديتسينالىق قىزمەتتەردىڭ قولجەتىمدىلىگىن قامتاماسىز ەتۋگە جانە ساپاسىن جاقسارتۋعا, جەدەل مەديتسينالىق كومەك قىزمەتىن جاڭعىرتۋعا ەرەكشە كوڭىل بولەدى.
اكىمنىڭ جازۋى بويىنشا, سوڭعى ءۇش جىل ىشىندە مەديتسينالىق مەكەمەلەر 3 مىڭعا جۋىق ارنايى جابدىقپەن تولىق جابدىقتالدى, 40 ء«ۇي جانىنداعى دارىگەر» نىسانى (ولاردىڭ 7-ەۋى ەلدى مەكەندەردە ورنالاسقان) اشىلدى, بىرقاتار مەديتسينالىق مەكەمەگە جوندەۋ جۇرگىزىلدى, 4 مەديتسينالىق مەكەمەنىڭ قۇرىلىسى بويىنشا ءتيىستى جوبالار ىسكە اسىپ جاتىر.
«سول سياقتى «جاعالاۋ-3» جانە «نۇرلى جول» ۆوكزالى اۋماعىندا امبۋلاتورلى-ەمحانالىق كەشەن, كوكتال-1, پريگورودنىي, تەلمان جانە ت.ب. ەلدى مەكەندەردە العاشقى مەديتسينالىق-سانيتارلىق كومەك كورسەتۋ ورتالىقتارىنىڭ قۇرىلىسى جوسپارلانعان. سونداي-اق مەديتسينا قىزمەتكەرلەرىنىڭ جالاقىسى جۇيەلى دەڭگەيدە وسەدى, جوعارى ءبىلىم الۋعا جىل سايىن گرانتتار بولەمىز جانە ت.ب.», دەپ جازدى قالا اكىمى.