«نۇر وتان» پارتياسىنان ساياسي مەنەدجمەنت مەكتەبى اقتاۋ قالاسىنداعى ش.ەسەنوۆ اتىنداعى كمتجيۋ-ءدىڭ سوڭعى كۋرستا وقىپ جۇرگەن ستۋدەنتتەرى اراسىندا سەمينار-ترەنينگ وتكىزدى. ەڭبەك نارىعىنداعى باسەكەگە قابىلەتتىلىگىن كوتەرۋ ماقساتىنداعى شارا, ياعني اتالمىش مەكتەپ وقۋلارى ءبىلىم جانە عىلىم مينيسترلىگى جاستار ءىسى جونىندەگى كوميتەتىنىڭ تاپسىرىسىمەن جۇزەگە اسۋدا.
اقتاۋداعى ش.ەسەنوۆ اتىنداعى كاسپي مەملەكەتتىك تەحنولوگيالار جانە ينجينيرينگ ۋنيۆەرسيتەتىنىڭ بازاسىندا وتكەن شاراعا وسى وقۋ ورنىنىڭ زاڭ, تەڭىز سالاسى, ەكونوميكا, پەداگوگيكا ماماندىقتارى بويىنشا سوڭعى كۋرستاردا وقيتىن 200-دەن استام ستۋدەنت قاتىستى. جاستارعا ساياسي مەنەدجمەنت مەكتەبىنىڭ وقىتۋشىلارى ساباق بەرسە, «دامۋ» كاسىپكەرلىكتى دامىتۋ قورى» اق ماڭعىستاۋ وبلىسى بويىنشا ايماقتىق فيليالىنىڭ ديرەكتورى ب. وتەپباەۆ قاتىسىپ, قور ارقىلى قالاي كاسىپ اشۋعا بولاتىنى تۋرالى مالىمەتتەر بەردى.
سەمينار-ترەنينگ بارىسىندا ستۋدەنتتەر ەلىمىزدەگى «نازارباەۆ ۋنيۆەرسيتەتى» سىندى جوو-دا عانا ەمەس, «بولاشاق» باعدارلاماسى شەڭبەرىندە شەتەلدەردە ءارى قاراي ءبىلىم الۋدىڭ مۇمكىندىكتەرى تۋرالى مالىمەتتەر الدى. سونداي-اق, جاستارعا بولاشاقتا جۇمىسقا ورنالاسۋدىڭ مەيلىنشە پەرسپەكتيۆالى قۇرىلىمى مەن سالالارى كورسەتىلە وتىرىپ, اعىمداعى ەڭبەك نارىعىنا ساراپتاما جاسالدى, «جۇمىسقا ءساتتى ورنالاسۋ تەحنولوگياسى», «كوشباسشىلىق ماشىقتار مەن مەنەدجمەنت نەگىزدەرى» تاقىرىپتارىندا تاجىريبەلىك ترەنينگتەر وتكىزىلدى.
– لايىقتى ەڭبەكپەن قامتۋ – حالىقتى الەۋمەتتىك قورعاۋدىڭ نەگىزى, ادامي رەسۋرستار الەۋەتىن جۇزەگە اسىرۋ مەن دامىتۋدىڭ ماڭىزدى شارتى, ءومىر ساپاسىن ارتتىرۋ جانە قوعامدىق بايلىقتى كوبەيتۋدىڭ باستى قۇرالى. قازىرگى تاڭدا ەلىمىزدە جۇمىسسىزدىق ماسەلەسى جاستار اراسىندا وزەكتى بولىپ تۇر. جوو تۇلەكتەرى جۇمىس تاجىريبەسىنىڭ ازدىعى مەن تاجىريبە ماشىقتارىنىڭ جوقتىعىنان حالىق اراسىندا الەۋمەتتىك قورعالماعان توپقا جاتادى. سوندىقتان, ءبىز ولاردىڭ جاڭادان باستالاتىن ومىرلەرىنە سەنىمدى سەرپىن بەرىپ, ءوز قابىلەتتەرىنە قاراي جول تاڭداي ءبىلۋى, تاڭداعان جولعا تۇسۋدە كەدەرگىلەردەن قالاي ءوتۋ كەرەكتىگىن ءوز تاجىريبەمىز بەن بىلىمىمىزگە قاراي تۇسىندىرۋگە تىرىستىق, – دەيدى اتالمىش مەكتەپ وقىتۋشىسى جانەل ساريەۆا.
ەندى جوبانى جۇزەگە اسىرۋ اياقتالعانشا اي سايىن وقىتىلعان ستۋدەنتتەردىڭ جۇمىسقا ورنالاسۋ مونيتورينگى جۇرگىزىلىپ وتىرماق. تىڭداۋشىلاردىڭ جۇمىسقا ورنالاسۋى جانە جۇمىسقا ءارى قاراي بەيىمدەلۋى جونىندە ساراپتاما جۇرگىزۋ ءۇشىن بارلىق مالىمەتتەر CRM بازاسىندا تىركەلەدى.
– بىزدە بۇعان دەيىن دە وسى باعىتتا وقۋلار بولعان. بىراق بۇل جولعى سەمينار ترەنينگ وتە جوعارى دەڭگەيدە وتۋدە. ءارى ءبىز سوڭعى كۋرستا وقىپ جۇرگەندىكتەن ولاردىڭ ايتقاندارىنىڭ ءبارى دە ەرتەڭ الدىمىزدان شىعاتىنىن ءبىلىپ, بارىنشا زەيىن قويىپ تىڭدادىق. ماسەلەن, بيزنەس-جوسپاردى قالاي جاساۋ كەرەك, تۇيىندەمەنى قالاي دۇرىس جازىپ, الەۋمەتتىك ينتەرنەت جەلىلەرى ارقىلى جۇمىستى قالاي وڭاي ءارى ءتيىمدى تابۋعا بولاتىنى تۋرالى تاقىرىپتار قىزىقتىردى, – دەيدى ش. ەسەنوۆ اتىنداعى كمتجي ۋنيۆەرسيتەتىندە رەال ماماندىعى بويىنشا ءبىلىم الىپ جاتقان ستۋدەنت جانار سارسەنوۆا.
جوو جاس تۇلەكتەرىنىڭ ەڭبەك ەتۋدى باستاۋىنا دايىندايتىن بۇل جوبا ولاردىڭ باسەكەگە قابىلەتتىلىگىن ارتتىرىپ, ساتىمەن جۇمىسقا تۇرۋىنا ىقپال ەتپەك. شاراعا قاتىسقان ستۋدەنتتەرگە «سوڭعى كۋرس ستۋدەنتتەرىن وقىتۋ» اتتى كىتاپشالار تاراتىلدى. وندا سەمينار-ترەنينگتە ەكى كۇن بويىنا ايتىلعان بارلىق كەڭەستەر جاريالانعان. سەميناردان سەنىممەن شىققان جاستاردىڭ ءۇمىتى ۇلكەن.
گۇلايىم شىنتەمىرقىزى,
«ەگەمەن قازاقستان».
اقتاۋ.