تاۋەلسىز قازاقستان قالامگەرلەرىنىڭ ءار جاڭا تۋىندىسى قالىڭ وقىرمان قاۋىم ءۇشىن قاشاندا ولجا. جۋىردا الماتىداعى «توعاناي-ت» باسپاسىنان «كوكىرەك-كوزبەن كورگەندەرىم» اتتى كىتاپ جارىق كوردى. نەگىزىنەن ەسسە, ماقالا, وي-تولعانىستاردان تۇراتىن كىتاپتىڭ اۆتورى قوستانايلىق بەلگىلى اقىن, فيلولوگيا عىلىمدارىنىڭ كانديداتى ناعاشىباي مۇقاتوۆ.
زەر سالا, زەيىن قويا پايىمداساق تىلسىم تىرشىلىك تۇتاسىمەن سان الۋان تاقىرىپ قوي. اسقاق ادامگەرشىلىك, كىسىلىك كەلبەت, اقيقات پەن شىندىق, تۋعان ءتىل تامىرى تەرەڭگە جايىلاتىن تاعىلىمدى تاربيەسى اۆتوردى ءجيى مازالايدى ەكەن. اسىرەسە «نەگە», «قول شاپالاقتاۋ», «قالاداعى قارتتار ويىنى», «مەن قازاق قىزدارىنا قايران قالام», «ءتىل ارقىلى ءتىرى جۇرەيىك» دەپ اتالاتىن وي-تولعامدار كىتاپ مازمۇنىن بايىتا تۇسكەن.
ۇلى ۇستاز ىبىراي التىنساريننەن باستاپ اعارتۋشى اقىن, جازۋشى رەتىندە رۋحاني كەڭىستىكتە كەرەمەت ءىز قالدىرعان قارىمدى قالامگەرلەر حاقىنداعى زەرتتەۋ ەڭبەكتەر ماعىنالى مازمۇنى, دايەكتى دەرەكتەرىمەن سىر شەرتەدى. جانە ءبىر اعىنان اقتارىلا ايتار قۋانىشتى جاي, وسى ءومىردىڭ ءوز كورىنىسىنەن تۋىنداعان شىنايى شىعارمالاردىڭ كەيبىرى كەزىندە «ەگەمەن قازاقستان» گازەتى بەتىنە جاريالانىپ, ويلى وقىرمان تاراپىنان لايىقتى باعاسىن يەلەنىپ تە ۇلگەرگەن.
قولىمىزداعى كىتاپتىڭ كوتەرگەن ءوز جۇگى بار. ەرىنبەي وقىدىق, تامسانىپ, تۇشىندىق. سوندىقتان دا ءبىز بۇل كىتاپتى پۋبليتسيست رەتىندە دە جازۋ ونەرىندە ءوز ورنىن ورنىقتىرىپ ۇلگەرگەن قالامگەر ناعاشىباي مۇقاتوۆتىڭ تولىمدى تابىسى دەر ەدىك.
قايسار ءالىم,
«ەگەمەن قازاقستان».