الماتىدا بۋتافورلىق پوليتسيا كولىگى جۇرگەنى انىقتالدى, دەپ حابارلايدى Egemen.kz ىشكى ىستەر مينيسترلىگىنىڭ ءباسپاسوز قىزمەتىنە سىلتەمە جاساپ.
جەرگىلىكتى پوليتسيا قىزمەتىنىڭ مامانداندىرىلعان باتالونىنىڭ ەكيپاجى كورنەكى اتريبۋتى بار Hyundai اۆتوكولىگىن انىقتادى.
«بەلگىلى بولعانداي, فيلمدەردىڭ ءبىرىنىڭ اكىمشىلىگى كولىكتى رەكۆيزيت رەتىندە پايدالانعان. ياعني, ستسەناري بويىنشا فيلمدە پاترۋلدىك پوليتسيامەن ەپيزود بار. ول بۇل ارەكەتتەردىڭ زاڭعا قايشى جانە جاۋاپكەرشىلىككە اكەپ سوعاتىنى تۋرالى ويلانباستان, پوليتسيانىڭ قىزمەتتىك كولىكتەرىنىڭ ءدال كوشىرمەسىن جاساۋدى ۇيعاردى. ەلەستەتىپ كورىڭىزشى, ەگەر ءاربىر كينورەجيسسەر قاجەت بولعان جاعدايدا جالعان رەكۆيزيتتەر جاسايتىن بولسا, حاوس بولادى. ول كەزدە جالعان پوليتسەيلەرگە وزدەرىنىڭ قىلمىستىق ىستەرىن جۇزەگە اسىرۋعا مۇمكىندىك بەرەدى. جالعان كولىك مامانداندىرىلعان ايىپپۇل تۇراعىنا قويىلدى. ونىڭ اۆتورلارىنا زاڭ اياسىندا شارا قولدانىلدى», دەدى الماتى قالالىق پوليتسيا دەپارتامەنتى باستىعىنىڭ ءبىرىنشى ورىنباسارى نۇرلان الماسبەكوۆ.
پوليتسيا دەپارتامەنتى وسىعان ۇقساس دەرەكتەرگە جول بەرىلمەيتىنىن ەسكەرتەدى.