مەملەكەتتىك اپپاراتتىڭ قىزمەتىن بيۋروكراتيادان ارىلتۋ ماقساتىندا قورعانىس ۆەدومستۆوسى شاقىرۋ ۋچاسكەلەرىنە تىركەۋ تۋرالى كۋالىكتەردەن باس تارتۋدى, سونداي-اق اسكەري قىزمەت وتكەرمەگەن ازاماتتارعا اسكەري بيلەتتەر بەرۋدى الىپ تاستاۋدى ۇسىنىپ وتىر, دەپ حابارلايدى Egemen.kz قورعانىس مينيسترلىگىنىڭ ءباسپاسوز قىزمەتىنە سىلتەمە جاساپ.
ۆەدومستۆو مالىمەتىنشە, 2023 جىلدان باستاپ قورعانىس مينيسترلىگى اسكەري مىندەتتىلەر مەن اسكەرگە شاقىرىلۋشىلاردى ەسەپكە الۋدى ەلەكتروندىق فورماتقا كوشىرۋدى جوسپارلاۋدا. بۇل ىشكى كوشى-قون كەزىندە ازاماتتاردى اسكەري ەسەپكە قويۋ جانە ودان شىعارۋدىڭ قاجەتتىلىگىن الىپ تاستاۋعا مۇمكىندىك بەرەدى.
بۇدان وزگە, ەلدە تسيفرلاندىرۋ پروتسەستەرىنىڭ دامۋىنا وراي ازاماتتاردىڭ اسكەري قىزمەتكە قاتىناسى, ونى وتكەرۋ جانە اسكەري ەسەپكە الىنۋى تۋرالى مالىمەتتەر «e-gov» پورتالىنداعى جەكە كابينەتتە كورسەتىلەتىن بولادى. قاجەت بولعان جاعدايدا ونى مەملەكەتتىك ورگاندار پايدالانۋى نەمەسە سۇراتۋى مۇمكىن.
«وسىعان سۇيەنە وتىرىپ, اسكەري بيلەت پەن تىركەۋ كۋالىكتەرىن پايدالانۋدىڭ ورىندىلىعى بىرقاتار جاعدايدا وزەكتى بولا بەرمەيدى. سونىمەن قاتار اسكەرگە شاقىرۋ جانە اسكەري قىزمەتكە كىرۋ كەزىندە اسكەري بيلەتتەر بۇرىن بەلگىلەنگەن تارتىپپەن بەرىلەدى», دەدى ۇيىمداستىرۋ-جۇمىلدىرۋ جۇمىستارى دەپارتامەنتىنىڭ باستىعى – قارۋلى كۇشتەر باس شتابى باستىعىنىڭ ورىنباسارى گەنەرال-مايور ساكەن ءجۇسىپوۆ.
مامانداردىڭ پىكىرىنشە, ۇسىنىلعان جاڭالىقتار قارجىنى ۇنەمدەۋگە ىقپال ەتەدى. بلانكىلەردى ساقتاۋ, شىعارۋ جانە بەرۋ جەرگىلىكتى اسكەري باسقارۋ ورگاندارى قىزمەتكەرلەرىنىڭ شىعىندارىن دا ەداۋىر ازايتپاق. ودان وزگە اكىمشىلىك قۇقىق بۇزۋشىلىقتار قۇرامىنان جوعالتۋ نەمەسە ءبۇلدىرۋ فاكتىلەرىن الىپ تاستاۋعا مۇمكىندىك بەرەدى. بۇل قولدانىستاعى زاڭدى ىزگىلەندىرۋ جولىنداعى كەزەكتى قادام بولماق.