ازاماتتىق اۆياتسيا كوميتەتى يندۋستريا جانە ينفراقۇرىلىمدىق دامۋ ءمينيسترى ق.ا. وسكەنباەۆتىڭ تاپسىرماسى بويىنشا رەيستەردى كەشىكتىرۋ كەزىندە جولاۋشىلاردىڭ قۇقىقتارىن بۇزعانى ءۇشىن اۆياتاسىمالداۋشىلاردى جاۋاپكەرشىلىككە تارتۋ جۇمىستارى جالعاسۋدا, دەپ حابارلايدى Egemen.kz يدم ءباسپاسوز قىزمەتىنە سىلتەمە جاساپ.
«وسى جىلعى تامىزدىڭ ءۇشىنشى ونكۇندىگىندە «ەير استانا» اۋەكومپانياسىنا (قۇرىلىمدىق بولىمشەسى «Fly Arystan» اۋەكومپانياسى بولىپ تابىلادى) قاتىستى رەيستەردى كەشىكتىرۋ كەزىندە جولاۋشىلار قۇقىعىن بۇزعانى ءۇشىن 2 000 اەك (6 126 000 تەڭگە) كولەمىندە قوسىمشا ەكى ايىپپۇل سالىندى. وسى جىلدىڭ شىلدە ايىنان باستاپ «ەير استانا» اۋەكومپانياسىنا قاتىستى جالپى سوماسى 6 000 اەك (18 378 000 تگ) التى ايىپپۇل سالىندى. «SCAT» اۋەكومپانياسى رەيس كىدىرگەن كەزدە جولاۋشىلاردىڭ قۇقىقتارىن بۇزعانى ءۇشىن 1 000 اەك (3 063 000 تگ) كولەمىندە ايىپپۇل تۇرىندە اكىمشىلىك جاۋاپكەرشىلىككە تارتىلدى», دەلىنگەن حابارلامادا.
ءباسپاسوز مالىمەتىنشە, قازاقستاندىق اۋەكومپانيالار جەتى رەت 7 000 اەك (21 441 000 تگ) سوماسىنا اكىمشىلىك جاۋاپكەرشىلىككە تارتىلدى. ازاماتتىق اۆياتسيا كوميتەتى جۇرگىزىلىپ جاتقان جۇمىس شەڭبەرىندە قازاقستان رەسپۋبليكاسىنىڭ قولدانىستاعى زاڭناماسىنىڭ جولاۋشىلار قۇقىقتارىن ساقتاۋ بولىگىندەگى تالاپتارىن ۇستانادى.
سونداي-اق تاسىمالداۋشىلار تاراپىنان بۇزۋشىلىق فاكتىلەرى قايتا انىقتالعان جاعدايدا شارالار قابىلدانادى.