اقتاۋداعى Halyk Arena سپورت كەشەنىندە فۋتزالدان قازاقستان سۋپەركۋبوگىنىڭ يەگەرى انىقتالدى. 1 600 كورەرمەن تاماشالاعان فينالدىق سايىستا الماتىنىڭ «قايراتى» مەن رۋدنىيدىڭ «ايات» كلۋبتارى كۇش سىناستى.
وسىمەن 10 مارتە جالاۋى جەلبىرگەن جارىسقا قوس كوماندا دا وتە جاقسى دايارلىقپەن كەلگەن ەكەن. العاشقى ون مينۋتتا ولار اڭداسىپ قانا ءجۇردى. تەك «اياتتىڭ» ساپىنداعى برازيليالىق لەگيونەر لەاندرينو گول سوققاننان كەيىن عانا ويىن قاتتى قىزدى. ارادا التى مينۋت وتكەننەن سوڭ ءدال سول ويىنشى ەكىنشى رەت نىسانانى ءدال كوزدەدى. ءبىرىنشى كەزەڭ رۋدنىيلىقتاردىڭ باسىمدىعىمەن اياقتالدى. ۇزىلىستەن كەيىن «قايرات» «قاھارىنا» ءمىندى. ەكىنشى تايم باستالعان بەتتە ولار قاتارىنان ءۇش رەت مەرگەندىك تانىتتى. بۇل گولداردىڭ اۆتورلارى – داۋرەن تۇرساعۇلوۆ, البەرت اقبالىقوۆ جانە شىعىس ەسەنامانوۆ.
اينالدىرعان ەكى مينۋت ارالىعىندا ءۇش رەت دوپتى توردا تۋلاتقان الماتىلىقتار ودان كەيىن دە قارقىندارىن ەش باسەڭدەتكەن جوق. 33-مينۋتتا اقبالىقوۆ نىسانانى ءدال كوزدەدى. كەزدەسۋ اياقتالۋعا تاياعاندا انتون رىندين ەسەپ ايىرماشىلىعىن قىسقارتتى. الايدا ودان ارىگە «اياتتىڭ» ءالى جەتپەدى. ءسويتىپ, الماتىنىڭ «قايراتى» جەتىنشى مارتە قازاقستان سۋپەركۋبوگىن يەلەندى.
سونداي-اق كەشە اقتاۋدا قازاقستان كۋبوگى باستالدى. بۇل جارىس جاڭا فورماتتا وتۋدە. «ا» توبىندا «كاسپي» (اقتاۋ), «قايرات» (الماتى), «استانا» (نۇر-سۇلتان) جانە «راحمەت» (اقتوبە) ونەر كورسەتسە, «ۆ» توبىندا «اتىراۋ», «اقتوبە», «ايات» (رۋدنىي) جانە «بايتەرەك» (ورال) شەبەرلىك بايقاسۋدا. توپتىق تۋرنير 10 قىركۇيەكتە ءوز مارەسىنە جەتەدى. ال جارتىلاي فينالدىق جانە فينالدىق باسەكەلەردى جەلتوقساندا تاماشالايمىز.