3-5 قىركۇيەك كۇندەرى فرانتسيانىڭ استاناسى – پاريج قالاسىندا پارا تاەكۆوندودان الەمدىك گران-پري سەرياسى اياسىندا جەكپە-جەكتەر ءوتتى. بۇل پاريج-2024 پاراليمپيا ويىندارىنىڭ الدىنداعى ءىرى رەيتينگتىك جارىستاردىڭ ءبىرى بولدى. اتالعان سپورتتىق ءىس-شاراعا 25 ەلدەن ۇزدىك دەگەن 85 تاەكۆوندوشى قاتىستى.
بايراقتى باسەكەلەردە قازاقستان تاراپىنان ءتورت سپورتشى باق سىناپ, ولار ءۇش جۇلدەگە قول جەتكىزدى. مۇنى ايتارلىقتاي جاقسى ناتيجە دەۋىمىز كەرەك. ماسەلەن, نۇرلان دومباەۆ 80 كيلو سالماقتا جەكپە-جەككە شىعىپ, ك-44 دارەجەسىندە كۇمىس مەدال جەڭىپ السا, ءومىرالى نىشان دا وسى سالماق پەن دارەجەدە كۇرەسىپ, قولا جۇلدەگە قول جەتكىزدى. سونداي-اق 57 كيلودا (ك-44) بوزكىلەمگە تۇسكەن كاميلا دوسمالوۆا دا قولا مەدالدى موينىندا جارقىراتتى.
«فرانتسيادا گران-پري سەريالارىنىڭ ەكىنشى جارىسى تابىستى ءوتتى. العاشقى جەكپە-جەكتەر بولگاريادا ۇيىمداستىرىلعان بولاتىن. ال ءۇشىنشىسى الداعى قازان ايىندا انگليانىڭ مانچەستەر قالاسىندا شىمىلدىق تۇرەدى. ناقتىلاي تۇسسەم, بۇل G6-رەيتينگتىك جارىسى بولىپ تابىلادى جانە وعان الەمنىڭ تەك ۇزدىك سپورتشىلارى قاتىسادى. وسىنداي دەڭگەيدەگى جەكپە-جەكتەردە جۇلدە الۋ – ۇلكەن جەتىستىك», دەيدى دەنە مۇمكىندىگى شەكتەۋلى ادامدارعا ارنالعان سپورتتىق دايارلاۋ ورتالىعىنىڭ كوماندا باسشىسى مەرەي بيعارين.
«دەنە مۇمكىندىگى شەكتەۋلى ادامدارعا ارنالعان سپورتتىق دايارلاۋ ورتالىعى» رمقك مادەنيەت جانە سپورت مينيسترلىگى سپورت جانە دەنە شىنىقتىرۋ ىستەرى كوميتەتىنىڭ ۆەدومستۆولىق باعىنىستى ۇيىمى بولىپ تابىلادى. ورتالىقتىڭ باستى قىزمەتى سۋردليمپيادالىق, پاراليمپيادالىق جانە پاراليمپيادالىق ەمەس سپورت تۇرلەرىن دامىتۋعا باعىتتالعان.