توتەنشە جاعداي مينيسترلىگىنىڭ شۇعىل ارەكەت ەتۋ شتابى اۋليەكول اۋدانىنداعى ەلدى مەكەندەرگە الاپات ورتتەن تونگەن قاۋىپتىڭ جويىلعانىن مالىمدەدى. ءورت ءسوندىرۋ جاساقتارى ورمان ىشىندەگى شالا بىقسىعان قولامتالاردى ءسوندىرىپ جاتىر. امانقاراعاي, لەسنوە, وزەرنوە, باعانالى اۋىلدارىنا ءورت قاراۋىلداۋ قىزمەتى قويىلعان.
سينوپتيك ماماندار 6 قىركۇيەككە قاراعان ءتۇنى جەڭىل سەبەلەپ وتكەن سوقىر جاۋىننىڭ اسەرىنەن ءورت شالعان اۋماقتاعى اۋا ىلعالى ءبىرشاما ارتا تۇسكەنىن ايتادى. دەگەنمەن قاۋىپتىڭ بەتى تولىق قايتتى دەۋگە ءالى دە ەرتە. اۋەدەن بارلاۋ قىزمەتىنىڭ مالىمەتىنشە, وزەرنوە, لەسنوە جانە امانقاراعاي اۋىلدارىنىڭ ماڭايىنداعى جاعداي تىنىش. بىراق باعانالى اۋىلى مەن قازانباسى ەلدى مەكەنىنىڭ ورتاسىنداعى ۇزىندىعى شامامەن 2 شاقىرىمداي اۋماق ءالى دە ورتەنىپ جاتىر. سوندىقتان ورتكە قارسى نەگىزگى كۇش-قۇرال وسى ماڭايعا توپتاستىرىلعان. قورعانىس مينيسترلىگى مەن جەرگىلىكتى اتقارۋشى ورگانداردىڭ ينجەنەرلىك تەحنيكالارى ورمانعا جاقىن ەلدى مەكەندەردىڭ اينالاسىن جىرتىپ جاتىر.
5 قىركۇيەكتە باعانالى اۋىلىنا جاقىن ورنالاسقان ورماندا ءورت شىعىپ ەدى, ابىروي بولعاندا ءتىلسىز جاۋ دەر كەزىندە اۋىزدىقتالدى. ءورت كەزىندە اۋىل تۇرعىندارى تۇگەلدەي قازانباسىعا كوشىرىلگەن. بىراق قىزىل جالىن كۇشتى جەلدىڭ ەكپىنىمەن قازانباسىعا دا جاقىنداپ بارعاندا جۇرت كادىمگىدەي ۇرەيلەنىپ قالعان.
– ءبىز جاقتاعى ءورت ءسوندى. باعانالى امان. كەشە ءبىزدىڭ اۋىلعا دا جاقىن كەلىپ ەدى. تۇنىمەن اسكەريلەر مەن اۋىل ادامدارى جابىلىپ ءجۇرىپ ءسوندىردى. تاڭەرتەڭ ءبارىمىز قۋانىپ جاتىرمىز. ءبىزدىڭ اۋىلعا ەۆاكۋاتسيالانعان باعانالى تۇرعىندارى بىرتىندەپ ۇيلەرىنە قايتىپ جاتىر. ول كىسىلەرگە جەتكىلىكتى تۇردە ازىق-ت ۇلىك بەرىلدى, – دەدى قازانباسى اۋىلىنىڭ تۇرعىنى دينارا سىزدىقوۆا.
ال امانقاراعاي تۇرعىندارىنىڭ ايتۋىنشا, اۋىلدا 106 ءۇي جانىپ كەتكەن. «باعانالى, نوۆونەجەن, وزەرنىي, لەسنوە, قازانباسىنىڭ ماڭايىن تۇگەل ءورت شارپىپ كەتتى. قازىر قاۋىپتىڭ بەتى قايتقانداي بولدى. كەشە مەملەكەت باسشىسى قاسىم-جومارت توقاەۆ كەلىپ, حالىقپەن كەزدەسىپ, ەلدىڭ ەڭسەسىن كوتەرىپ كەتتى. پرەزيدەنت باسپاناسىز قالعاندارعا ەكى-ەكى جارىم ايدىڭ ىشىندە ءۇي سالىپ بەرەمىز دەپ ۋادە ەتتى. بۇل ۇيلەر مەملەكەت پەن دەمەۋشىلەر ەسەبىنەن سالىناتىن بولادى. ارقايسىسىنىڭ اۋدانى – 100 شارشى مەتردى قۇرايدى. ەڭ باستىسى, بۇل ۇيلەر اس ءۇي, ىدىس-اياق, تەلەديدار, جيھازدارمەن جابدىقتالاتىن بولدى. بىراق حالىق ءبىر نارسەگە ريزا ەمەس. جەرگىلىكتى بيلىك ول ۇيلەردى اۋليەكولدەگى ۋچيليششەنىڭ ارتىنداعى سازداۋىت جەرگە سالۋ تۋرالى شەشىم قابىلداپتى. قازىر ول جەرگە ءارتۇرلى تەحنيكالار كەلىپ, جەر تەگىستەۋ جۇمىستارىن باستاپ جاتىر. بۇگىن حالىق اكىمدىككە بارىپ, ول جاققا تۇرعىسى كەلمەيتىنىن جەتكىزدى», دەيدى اۋىل تۇرعىندارى.
وبلىس اكىمىنىڭ ءبىرىنشى ورىنباسارى عاۋەز نۇرمۇحامبەتوۆتىڭ ايتۋىنشا, پرەزيدەنت تاپسىرماسىمەن سالىناتىن تۇرعىن ۇيلەردى بەلگىلەنگەن قىسقا مەرزىم ىشىندە ساپالى تۇرعىزىپ, حالىققا تاپسىرىپ ۇلگەرۋ ءۇشىن قۇرىلىسقا ءىرى كومپانيالار تارتىلاتىنىن ايتتى.
– قازىرگى ەڭ باستى مىندەت – كۇن سۋىماي تۇرىپ ءۇيسىز-كۇيسىز قالعان وتباسىلاردى تەزدەتىپ باسپانامەن قامتىپ, جىلى جەرگە ورنالاستىرۋ. ال جاڭا سالىنعان ۇيلەردە تۇرعىسى كەلمەيتىن تۇرعىنداردىڭ تالابى رەت-رەتىمەن شەشىلەتىن بولادى, – دەدى وبلىس اكىمىنىڭ ورىنباسارى.
شۇعىل ارەكەت ەتۋ شتابىنىڭ سوڭعى مالىمەتىنشە, امانقاراعاي اۋىلىندا – 85, وزەرنىيدا 6 ءۇي ورتەنىپ كەتكەن. ءورت باستالعالى 2091 ادام ەۆاكۋاتسيالانعان: 3 قىركۇيەكتە امانقاراعاي, وزەرنىي جانە لەسنوە اۋىلدارىنان 1841 ادام شىعارىلسا, 5 قىركۇيەكتە باعانالى اۋىلىنىڭ 250 تۇرعىنى قازانباسىعا كوشىرىلگەن. قازىر اۋليەكول ورتا مەكتەبى مەن اۋليەكول مەكتەپ-ينتەرناتىندا 66 ادام جاتىر. ەۆاكۋاتسيالانعان تۇرعىنداردىڭ دەنى ءوز ۇيلەرىنە ورالعان, ءبىرازى جاقىن تۋىستارىنىڭ ءۇيىن پانالاپ وتىر.
ء«ورت كەزىندە ءار ءتۇرلى دارەجەدە كۇيىك شالىپ, ىس تيگەن 11 ادام – 6 تۇرعىن, 1 اكىمدىك قىزمەتكەرى, 1 ورمان شارۋاشىلىعىنىڭ جۇمىسشىسى, 3 توتەنشە جاعداي قىزمەتكەرى انىقتالعان ەدى, بۇگىندە ولاردىڭ ءبارى اۋرۋحانادان شىعىپ, ۇيلەرىنە ورالعان. وكىنىشكە قاراي, امانقاراعايدا ءۇيىندىنىڭ استىنان م.ي. بابەنكو ەسىمدى 87 جاستاعى قاريانىڭ مۇردەسى تابىلدى. ءورت ءسوندىرۋ جۇمىستارى جالعاسۋدا», دەپ مالىمدەدى شۇعىل ارەكەت ەتۋ شتابىنىڭ وكىلدەرى.
وبلىستىق پوليتسيا دەپارتامەنتى ءوڭىردى وراسان شىعىنعا ۇشىراتقان ورمان ورتىنە قاتىستى قىلمىستىق كودەكستىڭ ەكى بابى بويىنشا ءىس قوزعاپ, ءورتتىڭ شىعۋ سەبەپتەرىن انىقتاۋ جۇمىستارىن باستاپ كەتتى. سونداي-اق وبلىس اكىمى اۋليەكول جانە قاراسۋ اۋداندارىندا تابيعي سيپاتتاعى توتەنشە جاعداي جاريالادى.
ەلىمىزدىڭ ءار وڭىرىنەن ورتتەن زارداپ شەككەندەرگە ارنالعان گۋمانيتارلىق كومەك تولاسسىز اعىلىپ كەلىپ جاتقانىن ايتا كەتكەن ءجون. ەلدەن جيىلىپ جاتقان جىلۋدىڭ كەرەك جەرىنە جەتۋىن باقىلاپ, ۇيىمداستىرۋ شارالارىن اتقارۋ ءۇشىن وبلىستىق ءماسليحاتتىڭ جانىنان ارنايى جۇمىس توبى قۇرىلدى.
سونداي-اق Amanat پارتياسىنىڭ بارلىق وڭىرلىك فيليالدارىندا ورتتەن زارداپ شەككەندەرگە گۋمانيتارلىق كومەك قابىلداۋ پۋنكتتەرى اشىلىپ, پارتيالىقتار مەن «جاستار رۋحى» جاستار قاناتىنىڭ مۇشەلەرىنەن ۆولونتەرلەر توبى قۇرىلدى.
قوستاناي وبلىسى