قوستاناي وبلىسىنداعى ءورتتىڭ سالدارىنان باسپاناسىنان ايىرىلعان تۇرعىندار ءۇشىن جاڭا تۇرعىن ۇيلەر سالىنادى. بۇل تۋرالى يندۋستريا جانە ينفراقۇرىلىمدىق دامۋ ۆيتسە-ءمينيسترى ەركەبۇلان داۋىلباەۆ ايتتى.
ءتىلسىز جالىننان ەڭ كوپ زارداپ شەككەن ەلدى مەكەننىڭ ءبىرى – امانقاراعاي اۋىلى. جالپى العاندا, قوستاناي وبلىسىنداعى ءورت 108 نىساندى شارپىدى. ونىڭ 91-ءى – تۇرعىن ءۇي. سونىڭ ىشىندە امانقاراعاي اۋىلىندا – 85, وزەرنوە اۋىلىندا 6 باسپانا زاقىمدالعان.
تەحنيكالىق زەردەلەۋ قورىتىندىسى بويىنشا تۇرعىن ۇيلەر تولىقتاي جانىپ كەتكەندىكتەن قايتا قالپىنا كەلتىرۋگە جاتپايدى. قازىر تۇرعىن ءۇي قۇرىلىسىن جۇرگىزۋ ءۇشىن اۋليەكول اۋىلىنان 2 گەكتار جەر تەلىمى ءبولىندى. ونداعى ءار 8 سوتىق جەرگە جالپى اۋماعى 100 شارشى مەتردى قۇرايتىن ءبىر قاباتتى باسپانالار سالىنباق. وسى ورايدا ايتا كەتەرلىگى, اۋليەكول اۋىلى اۋدان ورتالىعى بولعاندىقتان ەلدى مەكەندە ينفراقۇرىلىم تولىقتاي جۇرگىزىلگەن. اۋىلدا الەۋمەتتىك-تۇرمىستىق ماقساتتاعى نىسانداردىڭ بارلىعى بار.
«جەرگىلىكتى مەردىگەر ۇيىمداردى تارتۋ ارقىلى قۇرىلىس-مونتاجداۋ جۇمىستارى باستالادى. قۇرىلىس جۇمىستارىنا تەك قانا جەرگىلىكتى وندىرۋشىلەردىڭ ونىمدەرى قولدانىلادى. جەدەل تۇردە جۇمىستى باستاۋ تۋرالى تاپسىرما قويىلىپ وتىر. يندۋستريا جانە ينفراقۇرىلىمدىق دامۋ مينيسترلىگى ەكى اي ىشىندە قۇرىلىس جۇمىستارىن تولىقتاي اياقتاۋدى ماقسات ەتەدى. بۇل ءۇشىن بارلىق ءتيىستى شارالار قابىلدانۋدا. اتالعان ماسەلە مينيسترلىك باسشىسىنىڭ تىكەلەي باقىلاۋىندا», دەپ اتاپ ءوتتى ۆيتسە-مينيستر.
«قازاق قۇرىلىس جانە ساۋلەت عىلىمي-زەرتتەۋ جانە جوبالاۋ ينستيتۋتى» اق مەن يدم قۇرىلىس جانە تۇرعىن ءۇي-كوممۋنالدىق شارۋاشىلىق ىستەرى كوميتەتىنىڭ «مەمساراپتاما» رمك وزدەرىنىڭ جەكە قايتارىمسىز قاراجاتى ەسەبىنەن ينجەنەرلىك جۇيەلەردىڭ جوباسىن دايارلاۋ جۇمىستارىن باستادى. مەملەكەتتىك ساراپتاما دا ينستيتۋتتاردىڭ قارجىسى ەسەبىنەن جۇرگىزىلەدى دەپ كۇتىلۋدە.
ايتا كەتەيىك, مەملەكەت باسشىسىنىڭ تاپسىرماسى بويىنشا توتەنشە جاعدايدىن سالدارىن جويۋ ماقساتىندا قاجەتتى قاراجات ءبولىندى. پرەمەر-مينيستر وتكىزگەن وتىرىستا قوستاناي وبلىسىندا ورتتەن زارداپ شەككەن تۇرعىندار ءۇشىن جەدەل ارادا باسپانا سالۋ بويىنشا تاپسىرما بەرىلدى. قازىرگى كۇندە يدم كولىك قاتىناسىن قالپىنا كەلتىرۋ بويىنشا جۇمىستار جۇرگىزىپ, بارلىق ينفراقۇرىلىمدىق نىساننىڭ ۇزدىكسىز جۇمىس ىستەۋىن قامتاماسىز ەتۋ بويىنشا ءتيىستى شارالاردى ىسكە اسىرۋدا.