مەملەكەت باسشىسى قاسىم-جومارت توقاەۆ پارلامەنت سەناتىنىڭ توراعاسى ماۋلەن اشىمباەۆتى قابىلدادى, دەپ حابارلايدى Egemen.kz اقوردانىڭ رەسمي سايتىنا سىلتەمە جاساپ.
كەزدەسۋ بارىسىندا پرەزيدەنتكە 14-15 قىركۇيەكتە ەلوردادا وتەتىن الەمدىك جانە ءداستۇرلى دىندەر كوشباسشىلارىنىڭ VII سەزىنە دايىندىق بارىسى باياندالدى.
پارلامەنت سەناتىنىڭ توراعاسى, سەزد حاتشىلىعىنىڭ مەڭگەرۋشىسى ماۋلەن اشىمباەۆ فورۋمعا 50-دەن اسا ەلدەن 100-دەن استام دەلەگاتسيا كەلەتىنىن ايتتى.
بۇرىن حابارلانعانداي, ايتۋلى جيىنعا ريم پاپاسى فرانتسيسك, ءال-ازھاردىڭ جوعارعى يمامى شەيح احماد ات-تايەب جانە باسقا دا دىندەر كوشباسشىلارى قاتىسادى دەپ كۇتىلۋدە.
ماۋلەن اشىمباەۆتىڭ ايتۋىنشا, الدا وتكەلى تۇرعان دىنارالىق فورۋم الەمدىك باق وكىلدەرىنىڭ قىزىعۋشىلىعىن تۋدىرىپ وتىر. سەبەبى جيىنعا 200-دەن استام شەتەلدىك جانە 300-دەن استام قازاقستاندىق باق قاتىسۋ ءۇشىن ءوتىنىم بەرىپ, اككرەديتاتسيادان وتكەن.
سەزد اياسىندا دەكلاراتسيا قابىلداناتىنىن ايتا كەتۋ كەرەك. بۇل قورىتىندى قۇجات فورۋمعا قاتىسۋشىلاردىڭ وركەنيەتارالىق جانە كونفەسسياارالىق, سونداي-اق جاھاندىق دامۋدىڭ وزەكتى ماسەلەلەرىنە دەگەن ۇستانىمىن بىلدىرەدى.
مەملەكەت باسشىسى ءوز سوزىندە قازىرگى ۋاقىتتا سەزد وتكىزۋدىڭ ماڭىزى جوعارى ەكەنىنە توقتالا كەتىپ, جاھاندىق ديالوگ مادەنيەتىن ىلگەرىلەتۋ قاجەتتىگىن جانە قازاقستاننىڭ وسى ۇدەرىسكە قاتىسۋى ماڭىزدى ەكەنىن قاداپ ايتتى.
كەزدەسۋ سوڭىندا ماۋلەن اشىمباەۆ سەناتتىڭ الداعى ۋاقىتقا ارنالعان جۇمىس جوسپارىمەن ءبولىستى.