ەلىمىزدە كومىر قورى جەتكىلىكتى

يدم باسشىسى الداعى جىلۋ بەرۋ ماۋسىمىنا ساپالى جانە ۋاقىتىلى دايىندالۋ ءۇشىن مينيسترلىك الدىن الا جۇمىس جوسپارىن بەكىتكەنىن, سونىمەن بىرگە جوسپارعا سايكەس اكىمدىكتەر 1 قىركۇيەككە دەيىن ءبىلىم بەرۋ وبەكتىلەرىنىڭ 100% دايىندىعىن قامتاماسىز ەتۋى, ال 15 قازانعا دەيىن كوممۋنالدىق شارۋاشىلىق پەن الەۋمەتتىك سالا وبەكتىلەرىن, تۇرعىن ۇيلەر بويىنشا دايىندىق جۇمىستارىن اياقتاۋى قاجەت بولاتىنىن اتاپ ءوتتى.

ناتيجەسىندە, 1 قىركۇيەككە دەيىن ءبىلىم بەرۋ نىساندارىنىڭ 99%-ى جىلىتۋ ماۋسىمىنا دايىن. نۇر-سۇلتان قالاسىندا, جامبىل جانە سولتۇستىك قازاقستان وبلىستارىندا 25 نىسان ازىرگە قىسقا دايىن ەمەس.

سونىمەن قاتار دەنساۋلىق ساقتاۋ نىساندارىنىڭ 98 پايىزى, تۇرعىن ۇيلەردىڭ 88%-ى, اۆتونومدى قازاندىقتاردىڭ 97%-ى, جىلۋ جەلىلەرىنىڭ 94%-ى, سۋمەن جابدىقتاۋ جانە سۋ بۇرۋ جەلىلەرىنىڭ 86%-ىنىڭ دايىندىق دەڭگەيى ويداعىداي ءجۇرىپ جاتىر.

ق.وسكەنباەۆتىڭ ايتۋىنشا, بىرقاتار ءوڭىردىڭ, اسىرەسە جاڭادان قۇرىلعان وبلىستاردىڭ اكىمدىكتەرى ينجەنەرلىك ينفراقۇرىلىمدى, الەۋمەتتىك سالا وبەكتىلەرىن جانە تۇرعىن ۇيلەردى جىلىتۋ ماۋسىمىنا ۋاقىتىلى دايىنداۋ بويىنشا شارالاردى كۇشەيتۋلەرى قاجەت.

مينيستر سونداي-اق وتىن دايىنداۋ بويىنشا جۇمىس ناتيجەلەرى تۋرالى ايتتى. اتاپ ايتقاندا, اۆتونومدى قازاندىقتار ءۇشىن 1 ملن توننا كومىر جانە 14 مىڭ توننا مازۋت نەمەسە قاجەتتىلىكتىڭ 81 جانە 88% دايىندالعان. الماتى, اقمولا, قاراعاندى جانە پاۆلودار وبلىستارىندا وتىندى باياۋ ساتىپ الۋ ءۇردىسى بايقالادى. سوندىقتان اتالعان وڭىرلەردىڭ جەرگىلىكتى اتقارۋشى ورگاندارى شۇعىل شارالار قابىلداۋى قاجەت.

«يدم تۇرعىندار مەن كوممۋنالدىق-تۇرمىستىق سەكتوردىڭ كومىرمەن قامتاماسىز ەتىلۋىن ۇنەمى ءوز باقىلاۋىندا ۇستاپ وتىرادى. جەدەل دەرەكتەر بويىنشا, قاڭتار-شىلدە ايلارىندا 66,4 ملن توننا كومىر وندىرىلگەن. بۇل وتكەن جىلدىڭ سايكەس كەزەڭىنىڭ كورسەتكىشىنە 106 پايىزدى قۇراپ وتىر. سونىمەن قاتار كوممۋنالدىق-تۇرمىستىق قاجەتتىلىكتەرگە جانە حالىق يگىلىگىنە شامامەن 4,5 ملن توننا, ەنەرگيا ءوندىرۋشى كاسىپورىندارعا 35 ملن توننا, ونەركاسىپتىك كاسىپورىندارعا 4,2 ملن توننا تيەلدى. ال, ەكسپورتقا 19 ملن توننا جونەلتىلدى. جالپى, بارلىق وڭىردە كومىردىڭ جەتكىلىكتى قورى جيناقتالعان, تەمىر جولدار كومىردى تولىق كولەمدە تاسىمالداۋدى قامتاماسىز ەتۋدە», دەدى مينيستر.

حالىق اراسىندا كومىر ساتىپ الۋ قارقىنىنىڭ تومەن دەڭگەيدە بولۋى وزەكتى ماسەلە بولىپ وتىر. رازرەزدەر مەن قويمالاردا كومىر جەتكىلىكتى مولشەردە بولۋىنا, سونداي-اق مەملەكەتتىك ورگاننىڭ وتكەن جىلعى وتىن قۇنىن ساقتاپ قالۋ شارالارىن قولدانعانىنا قاراماستان, قازىرگى تاڭدا حالىق تۇتىناتىن كولەمنىڭ تەك 31 پايىزى عانا ساتىپ الىندى.

ق.وسكەنباەۆ اتاپ وتكەندەي, جىلىتۋ ماۋسىمىنىڭ ويداعىداي ءوتۋى ءۇشىن مينيسترلىك قوسىمشا شارالار قابىلداۋدا. اتاپ ايتقاندا:

– كومىردى تاسىمالداۋ ءۇشىن «قازاقتەمىرترانس» اق ۆاگوندار پاركىن ۇلعايتۋ;

– بيرجا ارقىلى كومىردى ساتۋ ۇلەسىن 50%-عا دەيىن ارتتىرۋ, بۇل ءونىمدى دەلدالدارسىز ساتىپ الۋعا مۇمكىندىك بەرەدى;

– كورشى مەملەكەتتەرگە الەۋمەتتىك كومىر شىعارۋدى شەكتەۋ.

«اكىمدىكتەر نىسانداردى بەلگىلەنگەن مەرزىمدە دايىنداۋ بويىنشا بارلىق جوندەۋ جۇمىستارىنىڭ ورىندالۋىن باقىلاۋدى قامتاماسىز ەتۋى ءتيىس. سونداي-اق ءونىم تاپشىلىعىن بولدىرماۋ ماقساتىندا كومىر جەتكىزۋشىلەرمەن بەلسەندى ءوزارا ءىس-قيمىل جاساۋى, مونوپولياعا قارسى ۆەدومستۆونىڭ اۋماقتىق بولىمشەلەرىن تارتۋ ارقىلى كوممۋنالدىق-تۇرمىستىق قاجەتتىلىكتەر مەن تۇرعىندار ءۇشىن كومىر باعاسىنىڭ زاڭسىز ۇلعايۋىن بولدىرماۋ بويىنشا شارالار قابىلداۋى قاجەت», دەپ اتاپ ءوتتى يدم باسشىسى.