ءبىلىم كۇنىندە باتىس قازاقستان وبلىسىنداعى وقۋشىلاردى مەكتەپكە تاسۋ ءۇشىن سۋ جاڭا 9 اۆتوبۋس تارتۋ ەتىلدى. الداعى ەكى اي ىشىندە بارلىعى 56 اۆتوبۋس بالالار يگىلىگىنە بەرىلمەك.
بۇل اۆتوبۋستار اۋىلدىق جەردە تۇراتىن, مەكتەپكە بارۋ ءۇشىن الىس جول جۇرۋگە تۋرا كەلەتىن وقۋشىلارعا ارنالعان. بالالار جىلىنا ورايلاستىرىلعان يگى ءىس رەسپۋبليكالىق بيۋدجەتتىك كوميسسياسىنىڭ شەشىمىنە سايكەس اتقارىلىپ وتىر.
وڭىردە ءوز مەكتەبى جوق 73 ەلدى مەكەندە 4 062 بالا تۇرادى. ولار ءبىلىم الۋى ءۇشىن كۇن سايىن ءار جەردەگى 56 مەكتەپكە كولىكپەن جەتكىزىلەدى. مىنە, وسى بالالاردى تاسىمالداۋ ءۇشىن ليزينگ ارقىلى جاڭا اۆتوكولىكتەر الىنعان.
– مەملەكەت باسشىسى قاسىم-جومارت توقاەۆ بيىلعى جىلدى بالالار جىلى دەپ جاريالاعان بولاتىن. ەلىمىزدىڭ ەرتەڭىن قالايتىن جاسوسپىرىمدەردىڭ ساپالى ءبىلىم الۋى جانە قاۋىپسىزدىگىن قامتاماسىز ەتۋ ءۇشىن قولايلى جاعداي جاساۋىمىز قاجەت. وسى ورايدا, وقۋشىلاردى مەكتەپكە كۇندەلىكتى تاسىمالداۋدى ساپالى ۇيىمداستىرۋ جانە اۆتوكولىكتەردى جاڭارتۋ ماقساتىندا وبلىسقا جاڭا 56 اۆتوبۋس بەرىلەدى. «پاز» ماركالى اۆتوبۋسىن اقجايىق, بايتەرەك, جاڭاقالا, قازتالوۆ, سىرىم اۋداندارىنىڭ مەكتەپتەرىنە سالتاناتتى تۇردە تابىستايمىز. جاڭا كولىكتەر وقۋشىلارىمىزدىڭ يگىلىگى ءۇشىن قىزمەت ەتسىن! وقۋ جىلى تابىستى بولسىن! – دەدى وبلىس اكىمىنىڭ ورىنباسارى باقىتجان نارىمبەتوۆ.
بۇگىندە جاڭا اۆتوبۋستاردىڭ ەكەۋى سىرىم جانە جاڭاقالا اۋداندارىنا جەتكىزىلدى. بايتەرەك جانە اقجايىق اۋدانىنا – ەكەۋدەن, قازتالوۆ اۋدانىنا ءۇش اۆتوبۋس بۇيىردى. بۇل – 21 ورىندىق پاز ماركالى اۆتوكولىكتەر.
– اۆتوبۋستاردى ليزينگ ارقىلى ساتىپ الۋ ءۇشىن جالپى كولەمى 2 ملرد 799 ملن 599,7 مىڭ تەڭگە ءبولىندى. قالعان 45 اۆتوبۋس قاراشانىڭ اياعىنا دەيىن جەتكىزىلەدى دەپ جوسپارلانۋدا, – دەدى وبلىستىق ءبىلىم باسقارماسىنىڭ ءبولىم باسشىسى لۋارا باتىرعاليەۆا. ايتا كەتەيىك, مەكتەپ جاسىنداعى بالالاردى تاسىمالداۋعا ارنالعان بۇل اۆتوبۋستار 56 مەكتەپتىڭ قۇزىرىنا بەرىلەدى.
باتىس قازاقستان وبلىسى