اتىراۋدا مۇگەدەك سپورتشىلاردان قۇرالعان ۆولەيبولشىلار كومانداسى بار. بىرنەشە جىلدان بەرى تەك مۇنايلى ءوڭىردىڭ عانا ەمەس, تاۋەلسىز قازاقستاننىڭ ابىرويىن حالىقارالىق سايىستاردا ءساتتى قورعاپ ءجۇر. تاياۋدا عانا يراننىڭ مەشحەد قالاسىندا وتكەن ازيا چەمپيوناتىندا ەل نامىسىن قولدان بەرمەي, قۇرلىقتىق سايىستىڭ كۇمىس جۇلدەسىن يەلەندى.
مۇگەدەك ۆولەيبولشىلار ۆولەيبولدى وتىرىپ وينايدى. ءبىر ەرەكشەلىگى, ۆولەيبولدى وتىرىپ ويناۋدان ەل قۇراماسى اتىراۋلىق مۇگەدەكتەردەن جاساقتالعان. «ءمۇگەدەكتەر» سپورت كلۋبىنىڭ ديرەكتورى-باس جاتتىقتىرۋشى باۋىرجان تاحاۋوۆتىڭ ايتۋىنشا, ەل قۇراماسى سانالاتىن اتىراۋلىق كوماندا ازيا چەمپيوناتىندا موڭعوليا, جاپونيا, يراك قۇرامالارىنان ايقىن باسىمدىعىن تانىتىپتى. تەك اقتىق باسەكەدە عانا يران ەلىنىڭ كومانداسىنان ۇتىلعان. بىرنەشە رەت الەمدىك باسەكەلەردە توپ جارعان يراندىق ۆولەيبولشىلارعا ەسە جىبەرگەن اتىراۋلىق مۇگەدەك ۆولەيبولشىلار پولشادا وتەتىن الەم چەمپيوناتىنا بەرىلەتىن ءۇش جولدامانىڭ ءبىرىن ۇتىپ الدى. الەم چەمپيوناتى ماۋسىم ايىندا وتكىزىلمەك.
– ال كۇزدە كورەيادا وتەتىن ريو دە-جانەيروداعى پاراوليمپيادالىق ويىندارعا ليتسەنزيا بەرەتىن سايىستارعا قاتىسامىز. شەبەرلىگىمىز سىنعا تۇسەتىن سول سايىستا پاراوليمپيادالىق ويىندارعا قاتىسۋ جولداماسىنا يە بولۋدى كوزدەپ وتىرمىز, – دەيدى مۇگەدەك ۆولەيبولشىلار كومانداسىنىڭ باس جاتتىقتىرۋشىسى باۋىرجان تاحاۋوۆ.
جولداسبەك شوپەعۇل,
«ەگەمەن قازاقستان».
اتىراۋ وبلىسى.
سۋرەتتە: ازيا چەمپيوناتىنىڭ كۇمىس جۇلدەسىن يەلەنگەن ۆولەيبولشىلار.