«سپارتاكتىڭ» قارسىلاسى انىقتالدى

قازىرگى كەزدە رەسەيدىڭ اسا (Absolute Championship Akhmat) گران-پري ءتۋرنيرى ءوتىپ جاتقانى بەلگىلى. جەڭىل سالماقتىلار اراسىنداعى جارىستىڭ جۇلدە قورى 800 مىڭ اقش دوللارىن قۇريدى. سول سومانىڭ 200 مىڭى باس جۇلدەنى ولجالاعان وعىلانعا بەرىلەدى. باق سىناۋشىلار قاتارىندا «سپارتاك» دەگەن جاناما اتپەن تانىلعان ءبىزدىڭ ارتەم رەزنيكوۆ تا بار. شىعىس قازاق­ستان وبلىسى ريددەر قالاسىندا دۇنيەگە كەلگەن ول ءوزىنىڭ تۇساۋكەسكەر كەزدە­سۋىندە برازيليالىق دەيۆي راموستى ۇپاي سانىمەن ۇتتى. جارتىلاي فينالدا جەرلەسىمىز داعىستاندىق راشيد ماگومەدوۆ پەن چەركەس ءالي باگوۆ اراسىنداعى باسەكەنىڭ جەڭىم­پازىمەن كۇش سىناسۋعا ءتيىس ەدى. الايدا وسىدان ءبىراز ۋاقىت بۇرىن ولار جەكپە-جەككە شىققانىمەن, ءبىر-بىرىنە سوققى جۇمساماي, وكتاگوندى اينالىپ ءجۇرىپ الدى. سان مىڭ كورەرمەن ابدەن مەزى بولدى. سوعان قاتتى نارازى بولعان اسا پروموۋشەنىنىڭ قوجايىنى مايربەك حاسيەۆ ەكەۋىن دە جارىستان شەتتەتكەن ەدى.

سول كەزدەن بەرى «ەندى ارتەم كىممەن ايقاسادى؟» دەگەن ساۋال جەكپە-جەك دەسە, دەلەبەسى قوزاتىن جانكۇيەرلەردى ءجيى مازالادى. كۇنى كەشە اسا باسشىلارىنىڭ كىمگە تاڭداۋى تۇسكەنى بەلگىلى بولدى. جەلتوقسان ايىندا ماسكەۋدە جالاۋى جەلبىرەيتىن جارىستا «سپارتاك» اندرەي كوشكينمەن كۇش سىناسادى. 25 قىركۇيەكتە 32 جاسقا تولعالى وتىرعان رەسەي سپورتشىسىنىڭ پانكراتيوننان ەكى دۇركىن الەم چەمپيونى دەگەن اتاعى بار. جاۋىنگەرلىك قويان-قولتىق ايقاستان دا ءبىراز بەلەستى باعىن­دىرعان. 2013 جىلدان بەرى ارالاس جەكپە-جەككە مىقتاپ دەن قويدى. سول ارالىقتا 30 مارتە وكتاگونعا شىعىپ, 22 رەت باسىم­دىق تانىتتى. 12 قارسىلاسىن ەسىنەن تاندىر­دى. كوبىنە-كوپ ول قول مەن اياقتىڭ سوققىلارىنا جۇگىنەدى. ياعني تىك تۇرىپ جاقسى توبەلەسەدى. وسىدان تۋرا توعىز جىل بۇرىن كوشكيننىڭ قازاقستاندىق يگور سۆيريدپەن سايىسقا تۇسكەنى دە ەسىمىزدە. سول جارىستا سۆيريد قارسىلاسىن ءبىرىنشى راۋند­تا-اق قىلقىندىرىپ تاستاعان ەدى. ال 2014 جىلدىڭ كوكتەمىندە ول تاعى ءبىر جەرلەسىمىز يسلام دزادزيەۆتى نوكاۋتپەن ۇتتى.

2017 جىلى كوشكين اسا-نىڭ چەم­پيوندىق بەلبەۋى ءۇشىن تالاستى. الايدا ماس­كەۋدە ۇيىمداستىرىلعان جەكپە-جەكتە ول جەر­گىلىكتى سپورتشى ەدۋارد ۆارتانيانعا ەسە جىبەردى. ءوزىنىڭ سوڭعى جەكپە-جەگىن رەسەيلىك فايتەر ۇستىمىزدەگى جىلدىڭ 22 شىلدەسىندە قىرعىزستاندىق التىنبەك ماماشەۆقا قارسى وتكىزىپ, ونى ۇپاي سانىمەن ۇتتى. نەگىزىنەن اندرەي ءوزىنىڭ اۋىر سوققىلارىنا سەنىم ارتسا, ارتەم رەزنيكوۆتىڭ مىقتى بالۋان ەكەنى بارشاعا ءمالىم. كەزىندە ول ەركىن كۇرەستەن جاقسى ناتيجەلەر كورسەتكەن.

ال اسا گران-ءپريىنىڭ ەكىنشى جارتىلاي فينالدىق باسەكەسى ەرەۆاندا دۇنيەگە كەلىپ, بۇل كۇندەرى ماسكەۋدە تۇرىپ جاتقان 31 جاستاعى ەدۋارد ۆارتانيان مەن ساراتوۆ وبلىسىندا تۋعان 27 جاستاعى چەشەن جىگىتى يۋسۋف رايسوۆتىڭ اراسىندا وتەدى.