قازاقستان پرەزيدەنتىنىڭ اتىنا وڭتۇستىك كاليفورنيا ۋنيۆەرسيتەتىنىڭ مەملەكەتتىك باسقارۋ قۇرمەتتى پروفەسسورى چەستەر نيۋلاندتان حات كەلدى, دەپ حابارلادى پرەزيدەنتتىڭ ءباسپاسوز قىزمەتى.
ءوز حاتىندا پروفەسسور قازاقستاننىڭ الەۋمەتتىك-ەكونوميكالىق جانە ساياسي جەتىستىكتەرىنە, ونىڭ وڭىرلىك ءارى جاھاندىق كوشباسشى رەتىندەگى 1992 جىلدان بەرگى ورنىقتى دامۋىنا توقتالعان.
چ.نيۋلاند تاۋەلسىزدىكتىڭ باستاپقى جىلدارىندا جۇرگىزىلگەن وزگەرىستەردى ىسكە اسىرۋ كەزىندەگى باتىلدىقتى ەرەكشە اتاپ وتكەن.
«زەينەتكەرلەر مەن وزگە دە كوپشىلىك كومەككە اسا مۇقتاج بولعان قيىن كەزەڭدەگى ءسىز بەن ءبىزدىڭ از ۋاقىت قانا كەزدەسكەنىمىز ەسىمدە. ءسىز حالىقتىڭ اتىنان ولاردىڭ كۇنكورىسىنە عانا ەمەس, قازاقستاننىڭ جارقىن بولاشاعىنا كەپىلدىك بەرە وتىرىپ, سەنىمدى ارەكەت ەتتىڭىز. استانانىڭ قالىپتاسۋىنىڭ العاشقى كەزدەرىندەگى كوپتەگەن قيىندىقتار دا ويعا ورالادى, قازىر بۇل سول كەزدە كوپتەگەن سىن-قاتەرلەر قارساڭىندا تۇرعان ەلدىڭ ەڭ ءبىر كورەگەن شەشىمى رەتىندە مويىندالىپ وتىر», – دەپ جازادى اۆتور.
پروفەسسور قابىلدانعان «قازاقستان-2050» ستراتەگياسى ەلدىڭ ودان ءارى ورنىقتى دامۋىن قامتاماسىز ەتەدى دەگەن ءپىكىرىن بىلدىرەدى. سونداي-اق, ول قازاقستاننىڭ بۇگىندە كونستيتۋتسيالىق ينستيتۋتتاردىڭ نىعايۋى, زاڭنىڭ ۇستەمدىگى سالاسىندا كوش باسىنان كورىنۋىن جالعاستىرىپ وتىرعانىن ايتادى.
چ.نيۋلاند ساياسي لاۋازىمعا تاعايىندالاتىندار سانىنىڭ قىسقارتىلۋى, «ا» باسقارۋشىلار كورپۋسىنىڭ قۇرىلۋى جانە مەملەكەت باسشىسىنىڭ باسشىلىعىمەن مەملەكەتتىك قىزمەتتىڭ كەڭ اۋقىمدا كاسىبيلەندىرىلۋى ماڭىزدى جەتىستىكتەر ەكەنىنە نازار اۋدارعان.
حاتىنىڭ سوڭىندا اۆتور قازاقستانعا الەمدەگى جاھاندىق سىن-قاتەرلەر جاعدايىندا اتقارىپ وتىرعان ايرىقشا ءرولى ءۇشىن ريزاشىلىق, سونداي-اق, ەلىمىزدىڭ ودان ءارى قاراي قارقىندى دامۋىنا دەگەن سەنىم بىلدىرەدى.