* كەدەن وداعى قۇرىلعالى قازاقستاندا اۆتوموبيل ءوندىرىسى 24 ەسەگە ءوستى. ەكونوميكا جانە بيۋدجەتتىك جوسپارلاۋ مينيسترلىگى حالىقارالىق ەكونوميكالىق ينتەگراتسيا دەپارتامەنتىنىڭ ديرەكتورى ەرنار باكەنوۆتىڭ ايتۋىنشا, وسى ارالىقتا شەت ەلدەرگە اككۋمۋلياتور ەكسپورتتاۋ 1,7 ەسەگە, كوندەنساتور شىعارۋ 1,3 ەسەگە وسكەن. «بۇل ۇكىمەتتىڭ ينتەگراتسيالىق ءۇردىس اياسىندا وتكىزىپ وتىرعان وقيعالارىمەن دە بايلانىستى», – دەدى ول.
* 2017 جىلعى ۋنيۆەرسيادانىڭ نىساندارى بەلگىلەنگەن مەرزىمدە تاپسىرىلۋى ءتيىس. الماتى قالاسىنىڭ اكىمى احمەتجان ەسىموۆ كەشە وڭتۇستىك مەگاپوليستىڭ ينفراقۇرىلىمىنا قوسىلاتىن قۇرىلىستاردى كورۋ بارىسىندا وسىنداي تاپسىرما بەردى.
* استانادا 15 مامىردا ەسىلدەگى كەمە ءجۇزۋ ماۋسىمى اشىلادى. قازىر وسىنى قامتاماسىز ەتەتىن كاسىپورىن فلوتىندا 8 كەمە قىزمەت كورسەتۋگە ساقاداي-ساي دايىن تۇر. بۇعان قوسا, وزەن بويىندا «كەنەسارى» جانە «رەديسسون» دەپ اتالاتىن 2 ايلاق قۇرىلعان.
* شىمكەنتتە اۆتوموبيل شىعاراتىن زاۋىت سالۋعا نيەت جاسالدى. مۇنداي ءمامىلەگە كورەيادا وتكەن وڭتۇستىك قازاقستاننىڭ ينۆەستيتسيالىق ءمۇمكىندىكتەرى كورمەسىندە قول جەتتى. فورۋمدا تۇستىك ولكەنىڭ «جيلسترويندۋستريا» جشس مەن كورەيالىق «Seolim Trading» كومپانياسى اراسىندا «Daewoo» اۆتوكولىكتەرىن شىعاراتىن كاسىپورىن اشۋ جونىندەگى كەلىسىمگە قول قويىلدى.
* وسكەمەندە قازاق ءتىلى مەن ادەبيەتى پانىنەن حالىقارالىق وليمپيادا ءوتتى. كسرو مەملەكەتتىك سىيلىعىنىڭ لاۋرەاتى, اكادەميك قانيپا بىتىباەۆا اتىنداعى ءبىلىم سايىسىنا قازاقستان ايماقتارىنان ءبولەك, قىرعىزستان, وزبەكستان, موڭعوليا, قىتاي جانە رەسەي مەملەكەتتەرىنەن كەلگەن 9-10 سىنىپ وقۋشىلارى قاتىسىپ, قازاق تىلىنەن ءبىلىم جارىستىردى.
* قىزىلوردا وبلىسىنىڭ قازالى اۋدانىندا اپاتتى جاعدايدا تۇرعان 7 مەكتەپ عيماراتتارى جاڭارتىلادى. مۇنىڭ جايىن بۇرناعى كۇنى وڭىردە وتكەن اكتيۆ جينالىسىنا قاتىسقان وبلىس اكىمى قىرىمبەك كوشەرباەۆ تارقاتىپ ايتتى. ءبىلىم عيماراتتارى كەلەر جىلدىڭ سوڭىنا دەيىن سالىنادى. ايماق باسشىسىنىڭ ايتۋىنشا, ولارداعى جارىق ماسەلەسىن شەشۋگە وبلىستىق بيۋدجەتتەن 182 ملن. تەڭگە قاراستىرىلادى.
* اقمولا وبلىسىنىڭ اتباسار قالاسىندا تاسقىننان زارداپ شەككەن تۇرعىندارعا جاڭا ۇيلەر سالىنىپ جاتىر. ساراپشى ۇيىمداردىڭ شەشىمدەرى بويىنشا 45 پاتەردەن تۇراتىن 4 ءۇي سالۋ جوسپارلاندى. سول سياقتى مەديتسينا كوللەدجىنىڭ بۇرىنعى جاتاقحاناسى كۇردەلى جوندەۋدەن وتكىزىلىپ, 29 بولمەسى زارداپ شەككەندەرگە بەرىلمەكشى.
«قازاقپارات», «قازاقستان جاڭالىقتارى», Egemen.kz
حابارلارى بويىنشا دايىندالدى.